En sesión que tivo lugar o día 8 de febreiro de 2012, o tribunal nomeado pola Orde do 10 de maio de 2011 para cualificar o proceso selectivo para o ingreso no corpo de xestión da Administración da Xunta de Galicia, subgrupo A2, escala técnica de finanzas, e de conformidade co disposto nas bases da convocatoria, adoptou os seguintes acordos:

Primeiro. Realizar os trámites oportunos para publicar as cualificacións obtidas polos aspirantes no terceiro exercicio do proceso selectivo para o ingreso no corpo de xestión da Administración da Xunta de Galicia, subgrupo A2, escala técnica de finanzas, que figuran no anexo desta resolución, no lugar onde se realizou o exercicio, no taboleiro de anuncios do Servizo de Información e Atención ao Cidadán da Consellería de Presidencia, Administracións Públicas e Xustiza e na páxina web da Xunta de Galicia (www.xunta.es).

De conformidade coa base II.1.1.5 da convocatoria superaron o terceiro exercicio os aspirantes que obtiveron unha cualificación mínima, obtida da suma das dúas partes do exame, de 17,50 puntos. A suma non se pode efectuar se a nota acadada nalgunha das partes é inferior a 8,75 puntos, en cuxo caso non se terá superado o exercicio.

Segundo. Os aspirantes poderán presentar as alegacións que consideren oportunas en relación coas notas no prazo de 10 días hábiles contados desde o día seguinte ao da publicación desta resolución no Diario Oficial de Galicia.

Terceiro. Conforme o disposto na base II.1.1.5, os aspirantes que superaron este exercicio deberán presentar no prazo de dez (10) días hábiles contados, a partir do día seguinte ao da publicación no Diario Oficial de Galicia desta resolución, os documentos, orixinais ou fotocopias debidamente compulsadas, que xustifiquen a exención de realizar o terceiro exercicio do proceso selectivo.

Cuarto. De conformidade co disposto na base IV.13 da convocatoria, contra estes acordos poderase interpoñer recurso de alzada nos termos previstos nos artigos 114 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 8 de febreiro de 2012.

Eva María García Pérez
Presidenta do tribunal

Anexo
Escala técnica de finanzas – 3.º exercicio – Lista de notas por orde alfabética