O Consello da Xunta de Galicia acordou, na súa reunión do 3 de febreiro de 2011, declarar o proxecto L.A.T. 132 kV P.E. Serra de Oribio-Subestación Triacastela, promovido pola empresa Fergo Galicia Vento, S.L., como de incidencia supramunicipal, para os efectos previstos na Lei 10/1995, de ordenación do territorio de Galicia.

Polo tanto, en cumprimento do disposto no artigo 13.2 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, segundo o cal os plans ou proxectos que o Consello da Xunta de Galicia declare como de incidencia supramunicipal se someterán por un prazo mínimo dun mes aos trámites de información pública, mediante o correspondente anuncio no Diario Oficial de Galicia e nun dos xornais de maior circulación na comunidade autónoma e de audiencia aos concellos afectados polo plan ou proxecto,

RESOLVE:

Someter a información pública o proxecto sectorial L.A.T. 132 kV P.E. Serra de Oribio-Subestación Triacastela, declarado como de incidencia supramunicipal polo Acordo do Consello da Xunta de Galicia do 3 de febreiro de 2011, por un prazo dun mes contado a partir da publicación desta resolución no Diario Oficial de Galicia.

Os interesados disporán do citado prazo dun mes para examinar o proxecto sectorial na Dirección Xeral de Industria, Enerxía e Minas da Consellería de Economía e Industria, na Xefatura Territorial da Consellería de Economía e Industria de Lugo e nos concellos de Samos e Triacastela (Lugo), e presentar as alegacións que consideren pertinentes.

Santiago de Compostela, 20 de decembro de 2011.

Ángel Bernardo Tahoces
Director xeral de Industria, Enerxía e Minas