A través deste proxecto de decreto preténdese establecer a natureza, fins, composición e adscrición do Consello Galego das Mulleres, o cal foi creado na disposición adicional quinta da Lei 11/2007, do 27 de xullo, como órgano colexiado e institucional de Galicia, de carácter consultivo, de participación e asesoramento en materia de políticas de igualdade. Así mesmo, tamén se pretende a creación, en canto que órganos colexiados e institucionais de Galicia, do Observatorio Galego da Violencia de Xénero e da Comisión Interdepartamental de Igualdade, así como da Comisión Asesora de Publicidade Non Sexista dentro do antedito observatorio.
De acordo co exposto e de conformidade co establecido no parágrafo segundo do artigo 42.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, que establece que, cando o contido e a repercusión da disposición o aconsellen, será sometida a información pública
RESOLVO:
Someter a información pública, por un prazo de 15 días hábiles, contados desde o seguinte ao da publicación desta resolución, o proxecto de Decreto polo que se desenvolve a Lei 11/2007, do 27 de xullo, galega para a prevención e o tratamento integral da violencia de xénero no relativo aos órganos consultivos e de participación.
O proxecto de decreto poderase consultar na páxina web da Secretaría Xeral da Igualdade:
http://igualdade.xunta.es/sites/default/files/files/documentos/PROXECTO_DECRETO_LEI_11_2007.pdf
As persoas interesadas, dentro do prazo sinalado, poderán enviar as súas alegacións preferentemente mediante correo electrónico ao seguinte enderezo: xestion.igualdade@xunta.es ou, alternativamente, mediante a presentación de escrito dirixido á Secretaría Xeral da Igualdade en calquera dos lugares previstos no artigo 38.4 da Lei 30/92, do 26 de novembro, de réxime xurídico das administracións públicas e do procedemento administrativo común.
Santiago de Compostela, 2 de xaneiro de 2012.
Susana López Abella
Secretaria xeral da Igualdade