Examinado o expediente instruído por instancia da empresa Gas Galicia SDG, S.A., con CIF n.º A15383284 e enderezo, para os efectos de notificacións, na rúa Lisboa, edificio Área Central, local 31-HIJ, 15707 Santiago de Compostela (A Coruña), resultan os seguintes:

Antecedentes de feito.

Primeiro. A autorización administrativa para a distribución de gas natural canalizado no termo municipal de Ortigueira (A Coruña) foi solicitada o 27.5.2009 por Endesa Gas Distribución, S.A.U. e o 3.8.2010 por Gas Galicia SDG, S.A.

Segundo. O 20.9.2010 a Dirección Xeral de Industria, Enerxía e Minas resolveu iniciar, coa solicitude de Endesa Gas Distribución, S.A.U. (a primeira presentada), o trámite de competencia para o outorgamento da dita autorización administrativa.

Esta resolución foi publicada no Diario Oficial de Galicia do 4.11.2010 e durante o prazo establecido (30 días) non se presentaron outras solicitudes en concorrencia; ademais, o 26.10.2010 a empresa Endesa Gas Distribución, S.A.U. desistiu da súa solicitude.

Terceiro. En consecuencia, continuouse co procedemento de outorgamento de autorización administrativa solicitada por Gas Galicia SDG, S.A. As características básicas das instalacións son as seguintes:

A subministración de gas natural á localidade de Ortigueira realizarase desde unha planta de gas natural licuado (GNL), que se situará no polígono industrial de Cuíña, no termo municipal de Ortigueira. A rede de distribución proxectada, que aparece reflectida nos planos de planta de trazado incluídos no proxecto, está formada por:

– Unha rede básica de distribución en rango de presión 2 < MOP (presión máxima de operación) ≤ 5 bar, que parte do punto de subministración e chega ás inmediacións do núcleo urbano de Ortigueira.

– E unha rede secundaria de distribución en rango de presión 0,1 < MOP ≤ 2 bar, que parte da rede básica cara aos distintos puntos de consumo.

Esta rede deséñase en polietileno de alta densidade PE 100 SDR 17,6, de diámetro variable de 160 a 90 mm, segundo necesidades. A lonxitude prevista para a rede proxectada é da orde dos 11.179 m, dos cales 8.104 m corresponden á rede básica e 3.075 m á rede secundaria.

O seu orzamento ascende á cantidade de setecentos oitenta e nove mil trescentos cincuenta e dous euros con trinta e dous céntimos (789.352,32 €).

Cuarta. O 11.7.2011 a Dirección Xeral de Industria, Enerxía e Minas resolveu someter a información pública a solicitude de autorización administrativa da rede de distribución de gas natural no termo municipal de Ortigueira (A Coruña). Esta resolución publicouse no Diario Oficial de Galicia do 25 de agosto de 2011, no Boletín Oficial da provincia da Coruña do 12 de agosto e nos xornais La Voz de Galicia e Diario de Ferrol do 26 de agosto, e tamén estivo exposta no taboleiro de anuncios do devandito concello entre o 2 de xullo e o 13 de agosto de 2011.

Durante o período de información pública non se presentaron alegacións.

Quinta. A Xefatura Territorial da Coruña da Consellería de Economía e Industria emitiu informe favorable sobre o proxecto de referencia o 4.8.2011.

Fundamentos de dereito.

Primeiro. A Dirección Xeral de Industria, Enerxía e Minas é a competente para resolver este expediente con fundamento no Estatuto de autonomía de Galicia, no Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas, no Decreto 132/1982, do 4 de novembro, sobre asunción de competencias en materia de industria, enerxía e minas, e a súa asignación á Consellería de Industria, Enerxía e Comercio, e no Decreto 324/2009, do 11 de xuño, polo que se establece a estrutura orgánica da Consellería de Economía e Industria, modificado polo Decreto 8/2011, do 23 de xaneiro, polo que se fixa a estrutura orgánica das consellerías da Xunta de Galicia, en relación coa Lei 34/1998, do 7 de outubro, do sector de hidrocarburos, co Real decreto 1434/2002, do 27 de decembro, polo que se regulan as actividades de transporte, distribución, comercialización, subministración e procedementos de autorización de instalacións de gas natural, co Decreto 62/2010, do 15 de abril, polo que se regula o trámite de competencia e os criterios de valoración no suposto de concorrencia de dúas ou máis solicitudes de autorización administrativa de instalacións de transporte secundario e distribución de gas natural e redes de distribución de gases licuados do petróleo (GLP) e coa Lei 30/1992, do 26 de novembro, de réxime xurídico das administracións públicas e do procedemento administrativo común.

Segundo. O citado proxecto cumpre coas exixencias regulamentarias fixadas no Real decreto 919/2006, do 28 de xullo, polo que se aproba o Regulamento técnico de distribución e utilización de combustibles gasosos e as súas instrucións técnicas complementarias ICG 01 a 11.

Terceiro. No expediente instruído para o efecto cumpríronse os trámites regulamentarios.

De conformidade cos preceptos legais citados e os demais de pertinente e xeral aplicación, esta dirección xeral

RESOLVE:

Outorgar á empresa Gas Galicia SDG, S.A. a autorización administrativa para a distribución de gas natural canalizado no termo municipal de Ortigueira (A Coruña), de acordo coas seguintes condicións:

Primeira. Gas Galicia SDG, S.A. constituirá no prazo de dous meses, contado desde o momento do outorgamento da autorización, unha fianza por valor de 15.787,05 €, importe do 2% do orzamento das instalacións, para garantir o cumprimento das súas obrigas, conforme o previsto no artigo 73, pun to 4.º da Lei 34/1998, do 7 de outubro, e no artigo 82 do Real decreto 1434/2002, do 27 de decembro. A dita fianza constituirase na Caixa Xeral de Depósitos da Consellería de Facenda da Xunta de Galicia, en calquera das formas sinaladas no artigo 11, punto 3.º do Decreto 1775/1967, do 22 de xullo, sobre o réxime de instalación, ampliación e traslado de industrias, e será devolta unha vez se formalice a acta de posta en marcha das instalacións.

Segunda. Dentro do prazo de seis meses, contado a partir da data de publicación desta resolución no Diario Oficial de Galicia, a empresa Gas Galicia SDG, S.A. deberá solicitar á Consellería de Economía e Industria da Xunta de Galicia a aprobación do proxecto de execución, para o cal deberá presentar o proxecto detallado das instalacións. En todo caso, deberán cumprirse os prazos previstos no proxecto de autorización administrativa, e poderán os ditos prazos ser prorrogados por causa xustificada, logo da correspondente solicitude acompañada da xustificación técnica ou exposición da causa de forza maior causante da demora.

Terceira. As instalacións e as súas montaxes deberán cumprir as disposicións e normas técnicas que en xeral sexan de aplicación e, en particular, as correspondentes ao Regulamento técnico de distribución e utilización de combustibles gasosos coas súas instrucións técnicas complementarias e as normas que as completan, regulamentos electrotécnicos, normas UNE e demais normativa e directrices vixentes, así como cantas as substitúan ou se diten a nivel estatal ou desta comunidade autónoma, e deberán preverse para responder aos avances tecnolóxicos no eido do gas e lograr abastecementos flexibles e seguros.

Cuarta. A autorización administrativa afecta o termo municipal de Ortigueira, na provincia da Coruña, e prevé a gasificación deste municipio de acordo coas especificacións e planos que figuran no proxecto, subscrito polo enxeñeiro industrial Alfonso Vázquez Varela (colexiado n.º 1.130) e visado polo Colexio Oficial de Enxeñeiros Industriais de Galicia con rexistro n.º 541/10 e data 27.7.2010.

Quinta. A autorización administrativa outórgase sen prexuízo de terceiros e independentemente das autorizacións ou licenzas de competencia doutros organismos ou entidades públicas, necesarios para realizar as instalacións aprobadas.

Sexta. A Administración resérvase o dereito a deixar sen efecto esta autorización administrativa por calquera das causas sinaladas no artigo 34.1 do Decreto 1775/1967, do 22 de xullo, por incumprimento das condicións estipuladas, pola facilitación de datos inexactos ou por calquera outra causa legal ou regulamentaria que así o prevexa.

Contra esta resolución, que non pon fin á vía administrativa, poderá interpoñerse, se é o caso, recurso de alzada ante o conselleiro de Economía e Industria no prazo dun mes, contado a partir do día seguinte ao da súa notificación.

Santiago de Compostela, 18 de novembro de 2011.

Ángel Bernardo Tahoces
Director xeral de Industria, Enerxía e Minas