A Consellería de Innovación, Industria e Comercio, a través da Dirección Xeral de Industria Enerxía e Minas, ten entre as súas competencias a inspección, o control e a vixilancia do cumprimento dos regulamentos e das normas de seguridade sobre instalacións e actividades industriais.

O obxecto desta orde é a convocatoria de subvencións para a substitución de guindastres-torre desmontables para obras (en diante G.T.D.O.), con data de fabricación anterior ó 1 de xaneiro de 1977, por outras de nova fabricación. As G.T.D.O. que se vaian substituír deberán ser achatarradas.

No marco de tales actividades, coa finalidade de mellora-la seguridade nos guindastres, consígnase, na Lei de orzamentos xerais da Comunidade Autónoma de Galicia, na partida orzamentaria 08.02.622-A.770.0, unha previsión de gasto para subvenciona-la substitución de G.T.D.O., con data de fabricación anterior ó 1 de xaneiro de 1977, baixo o epígrafe: subvencións para seguridade industrial.

O contido desta orde de axudas axústase ó Decreto 287/2000, do 21 de novembro, polo que se desenvolve o réxime de axudas e subvencións da Comunidade Autónoma de Galicia, e o establecido polo Decreto 172/2001, do 12 de xullo, sobre incentivos para o desenvolvemento económico e fomento da actividade empresarial na Comunidade Autónoma de Galicia.

Esta convocatoria desenvolve o procedemento do anexo V da Orde do 11 de marzo de 2002, na que se establecen as bases reguladoras, de axudas e subvencións en materia de enerxía, minería, tecnoloxía e desenvolvemento sectorial, comercio e consumo.

Consecuentemente con todo o anterior e no exercicio das facultades que me confire o artigo 34 da Lei 1/1983, do 22 de febreiro, reguladora da Xunta de Galicia e do seu presidente,

DISPOÑO:

Artigo 1º.-Obxecto.

O obxecto desta orde é proceder á convocatoria de axudas e subvencións do programa de apoio á substitución de G.T.D.O, recollido no anexo V da Orde do 11 de marzo de 2002, pola que se establecen as bases reguladoras de axudas e subvencións en materia de enerxía, minería, tecnoloxía e desenvolvemento sectorial, comercio e consumo.

Tal como se establece no artigo 3.2º da dita orde, o obxecto, requisitos dos beneficiarios e criterios obxectivos de adxudicación, son os establecidos para cada programa de incentivos no anexo desta, aplicándose, no non previsto nela, o que se establece nos seguintes artigos.

Artigo 2º.-Crédito orzamentario e contía máxima da axuda.

As axudas financiaranse con cargo á partida 08.02.622-A.770.0 Subvencións para seguridade industrial cun crédito de 300.000 euros, consignados nos orzamentos xerais da Comunidade Autónoma de Galicia para o ano 2004.

O crédito e a aplicación orzamentaria son os que se indican a continuación:

Aplicación: 08.02.622-A.770.0.

Denominación: G.T.D.O: actuacións en materia de seguridade industrial.

Importe en euros: 300.000.

O gasto que se proxecta tramitarase como expediente anticipado e está condicionado á existencia de crédito adecuado e suficiente nos orzamentos do exercicio para 2004, de acordo co disposto no artigo 3.3º in fine da Orde do 27 de novembro de 2000, pola que se modifica a Orde do 11 de febreiro de 1998, sobre tramitación anticipada de expedientes de gasto.

Esas cantidades poderanse incrementar en función das solicitudes presentadas e de acordo coa dispoñibilidade de crédito.

A contía máxima da subvención neta equivalente poderá alcanzar ata o 20% do custo da inversión subvencionable.

En todo caso, esta convocatoria quedará pechada unha vez esgotada a dotación económica.

Artigo 3º.-Actuacións subvencionables.

Será subvencionable a substitución de G.T.D.O, con data de fabricación anterior ó 1 de xaneiro de 1977, instaladas polo menos nunha ocasión antes do 8 de abril.

Artigo 4º.-Solicitudes, prazo de presentación e documentación.

As solicitudes, xunto coa documentación, dirixiranse ó conselleiro de Innovación, Industria e Comercio, e presentaranse no rexistro xeral da Consellería de Innovación, Industria e Comercio, nas delegacións provinciais ou a través dalgunha das formas establecidas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, entre as que se inclúen os rexistros dos concellos que teñan subscrito o convenio de colaboración para a implantación dun sistema intercomunicado do rexistro coa Administración da Comunidade Autónoma de Galicia.

O prazo para a presentación das solicitudes iniciarase ó día seguinte da publicación desta orde no DOG e rematará o día 30 de xaneiro de 2004.

As solicitudes cubertas segundo modelo do anexo I e a seguinte documentación deberán presentarse por duplicado:

-Fotocopia cotexada do documento acreditativo da persoa ou entidade solicitante (DNI, NIF) ou, de se-lo caso, da representación na que se actúa. No caso das persoas xurídicas, poder do asinante e escritura pública de constitución da sociedade.

-Memoria técnica do guindastre que se vaia substituír, onde se especifique a marca, o tipo e o número de fabricación.

-Fotocopia cotexada do certificado de construcción emitido polo fabricante ou importador.

-Documentación onde se acredite estar inscrita no rexistro de G.T.D.O. da Consellería de Innovación, Industria e Comercio e ser instalada polo menos nunha ocasión antes do 8 de abril de 1997.

-Factura pro forma onde conste orzamento e prazo de entrega da G.T.D.O. substitutiva.

-Documento no que se identifiquen de forma fidedigna os elementos constitutivos da G.T.D.O. que se vaia substituír, que poderán ser verificados polos servicios técnicos da Consellería de Innovación, Industria e Comercio.

-Declaración de outras axudas solicitadas.

-Compromiso por parte do empresario de instala-la G.T.D.O. substitutiva na Comunidade Autónoma de Galicia.

Artigo 5º.-Corrección de defectos.

Conforme o establecido no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, se a solicitude de subvención non reúne os requisitos esixidos nesta orde, o interesado será requirido para que nun prazo de 10 días naturais contados a partir do día seguinte á recepción do dito requirimento, corrixa a falta ou xunte os docu-

mentos preceptivos, con indicación que de non facelo, se considera desistido na súa solicitude, logo de resolución que deberá ser dictada nos termos previstos no artigo 42 da mencionada lei.

Artigo 6º.-Valoración de proxectos.

Conforme o establecido no artigo 9 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, a valoración das solicitudes admitidas realizaraa unha comisión constituída para o efecto, que estará presidida polo director xeral de Industria, Enerxía e Minas ou a persoa na que delegue. Constituirana ademais o subdirector xeral de Administración Industrial, o xefe do Servicio de Administración Industrial que actuará como secretario, e os delegados provinciais da Consellería de Innovación, Industria e Comercio ou as persoas nos que estes últimos deleguen.

Os expedientes completados, revisados e ordenados segundo orde de entrada no rexistro, serán remitidos á comisión de valoración, para que proceda a propoñer aprobación ou denegación de axudas seguindo os criterios establecidos no anexo V da Orde do 11 de marzo de 2002.

A comisión proporá a contía das axudas correspondentes ós investimentos subvencionables ata esgota-lo crédito dispoñible, quedando en reserva o resto dos investimentos subvencionables, para que, se se producise algunha renuncia ou modificación nos proxectos inicialmente subvencionados, puideran ser atendidos co crédito que quede libre.

Á vista do informe emitido pola comisión dictaranse as correspondentes resolucións de acordo co establecido no artigo 4 da Orde do 11 de marzo de 2002.

Artigo 7º.-Xustificación do investimento.

A data limite para executa-las actuacións que foran obxecto de subvención e para xustifica-lo correspondente investimento e pagamento é o 31 de setembro de 2004. Para iso, o beneficiario deberá presentar na Dirección Xeral de Industria, Enerxía e Minas ou nas delegacións provinciais da Consellería de Innovación, Industria e Comercio ou a través de algunha das formas recollidas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, a seguinte documentación, por duplicado:

-Factura acreditativa da adquisición, xustificante de pagamento ou documentos de financiamento da G.T.D.O. adquirida, ou copia cotexada deles.

-Certificado acreditativo do achatarramento da G.T.D.O. que se vaia substituír, o que poderá ser obxecto de comprobación polos servicios técnicos da Consellería de Innovación, Industria e Comercio.

-Xustificante doutras axudas obtidas ou declaración das solicitadas.

-Certificados acreditativos de que se atopa ó día das obrigas tributarias, da Seguridade Social, e que non ten pendente de pagamento ningunha outra débeda, por ningún concepto, coa Administración pública da Comunidade Autónoma, agás no caso de que estean exceptuadas por disposición legal.

-Para o aboamento da subvención uniráselle á documentación xa sinalada unha certificación da conta bancaria, na que conste ordinal bancario, código de banco, código de sucursal e código de conta corrente, onde se debe realiza-lo aboamento, expedida pola propia entidade bancaria.

-Copia cotexada do documento de baixa no rexistro de guindastres-torre, da G.T.D.O. achatarrada na delegación provincial correspondente.

-Copia cotexada do documento de alta no rexistro de guindastres-torre, da G.T.D.O. adquirida na delegación provincial correspondente.

Os órganos competentes da Consellería de Innovación, Industria e Comercio poderán solicita-las aclaracións, informes ou medios de xustificación a que se refire o artigo 15 do Decreto 287/2000, do 21 de novembro, que consideren convenientes. No caso de que non foran remitidos polo beneficiario dentro do prazo que se sinale, entenderase que renuncia á axuda.

Artigo 8º.-Pagamento da subvención.

Conforme o establecido nos artigos 15 e 16 do Decreto 287/2000, do 21 de novembro, a percepción da axuda terá lugar despois de que os servicios técnicos da Consellería de Innovación, Industria e Comercio, trala inspección realizada, de se-lo caso, certifiquen que se realizou o investimento que foi obxecto da subvención e o previsto na resolución de concesión. Ademais, o beneficiario deberá presenta-la documentación adicional que lle sexa requirida por estes servicios técnicos, co obxecto de determina-lo alcance do proxecto e as actuacións subvencionables.

No caso de que o investimento realizado tivese un custo inferior ó inicialmente previsto, e sempre que a minoración do custo non supoña unha realización deficiente do proxecto, a axuda que se conceda verase diminuída nunha porcentaxe proporcional.

Disposición derradeira

Facúltase o director xeral de Industria, Enerxía e Minas para dicta-las disposicións necesarias para o desenvolvemento desta orde.

Santiago de Compostela, 21 de novembro de 2003.

Juan Rodríguez Yuste

Conselleiro de Innovación, Industria e Comercio