O pleno da corporación municipal do Concello de Lourenzá, reunido en sesión que tivo lugar o día trinta de outubro de 2002, acordou ceder á Comunidade Autónoma de Galicia un predio situado no termo municipal de Lourenzá, para centro de limpeza e desinfección de vehículos de transporte de gando.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, feita nos termos nos que o Concello de Lourenzá acordou a cesión, logo da deliberación do Consello da Xunta de Galicia na súa reunión do día vinte de novembro de dous mil tres,
DISPOÑO:
Artigo 1º
Acéptase a cesión, feita polo Concello de Lourenzá, a título gratuíto, da parcela de 858 m, situada no lugar de Ponte de Cuñas, 11, termo municipal de Lourenzá e cos seguintes lindeiros: ó norte, propiedade privada; ó sur e ó leste, resto do predio matriz, propiedade do Concello de Lourenzá e ó oeste, río Baos.
Esta parcela figura inscrita no Rexistro da Propiedade de Mondoñedo, a nome do Concello de Lourenzá, no tomo 750, libro 107 de Lourenzá, no folio 76, predio 14.862, inscrición 1ª. Referencia catastral número 8146003PJ3184N0001KK.
Artigo 2º
O inmoble cedido destinarase a centro de limpeza e desinfección de vehículos de transporte de gando.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma de Galicia.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade deste decreto.
Santiago de Compostela, vinte de novembro de dous mil tres.
Manuel Fraga Iribarne
Presidente
José Antonio Orza Fernández
Conselleiro de Economía e Facenda