Aprobados pola Comisión de Goberno deste concello na sesión celebrada o día 30 de outubro de 2003, tanto o prego de cláusulas administrativas particulares, como o prego de prescricións técnicas que rexerán o concurso por procedemento aberto, para adxudica-los traballos necesarios para a redacción do Plan Xeral de Ordenación Municipal do Concello de Arzúa, expoñense ó público nas oficinas municipais, por un prazo de oito días hábiles, para efectos de reclamacións, en cumprimento do disposto no artigo 122.1 do Real decreto lexislativo 781/1986, do 18 de abril.
Transcorrido ó dito prazo sen presentación de reclamacións, e de conformidade co disposto no artigo 122.2 do refirido Real decreto lexislativo 781/1986, ábrese un período de licitación para proceder á dita adxudicación, se ben esta licitación se aprazará canto resulte necesario e así se fará público, no suposto de que se formulasen reclamacións contra os ditos pregos de condicións.
O contido do prego de cláusulas administrativas particulares é o seguinte:
1. Obxecto do contrato: a contratación polo sistema de concurso por procedemento aberto, mediante o trámite de urxencia, dos traballos de redacción dun Plan Xeral de Ordenación Municipal, coa documentación e contido que se definen na Lei 9/2002, do 30 de decembro, de ordenación urbanística e protección do medio rural de Galicia, no Regulamento de planeamento urbanístico, aprobado por Real decreto 2159/1978, do 23 de xuño, e no referido prego de cláusulas administrativas particulares.
2. Prazo de execución: fíxase en 16 meses, contados a partir do día seguinte ó que figure como data da sinatura do contrato.
3. Prezo do contrato: o importe desta contratación ascende á cantidade de 126.212,54 euros (IVE incluído).
Efectuándose o pagamento dos traballos a medida que se dea cumprimento ás fases de execución, previstos na cláusula duodécima do prego de cláusulas administrativas, e de acordo co financiamento a que se refire a cláusula cuarta do referido prego.
4. Revisión de prezos: non se procederá, en ningún caso, á revisión de prezos deste contrato, e por tanto, non se aplicará ningunha fórmula de revisión.
5. Capacidade para contratar: poderán concorrer por si ou por medio de representantes autorizados, os equipos multidisciplinares a que se refire o artigo 84.2 da Lei 9/2002, do 30 de decembro (de ordenación urbanística e protección do medio rural de Galicia) que reúnan os requisitos do artigo 15 do Real decreto lexislativo 2/2000, do 16 de xuño (polo que se aproba o texto refundido da Lei de contratos das administracións públicas).
6. Presentación de proposicións: na secretaría do concello, durante o prazo de trece días naturais, contados desde o seguinte a aquel no que rematara o prazo de oito días hábiles de exposición ó público, para reclamacións, deste prego de cláusulas administrativas que agora se expón no BOP e no DOG, desde as 9.00 ás 13.00 horas.
7. Modelo de proposición: irá incluída no sobre A oferta económica no cal figurará a denominación seguinte: «Proposición para tomar parte na contratación por concurso e procedemento aberto para a redacción do Plan Xeral de Ordenación Municipal do Concello de Arzúa».
O modelo é o seguinte:
«D... de estado... profesión... con domicilio en... e DNI nº..., actuando en nome propio (ou en representación de...), toma parte no concurso convocado polo Concello de Arzúa, e publicado no BOP nº... (ou no DOG nº...), de datas..., para a redacción do Plan Xeral de Ordenación Municipal, e fai constar que coñece e acepta o prego de cláusulas administrativas, así como o prego de prescricións técnicas, e de cartografía, e comprométese a realiza-lo citado traballo con suxeición ás referidas cláusulas, no prezo de... euros (letra e número) (IVE 16% incluído).
O licitador (Lugar, data e sinatura)».
8. Outra documentación: no sobre B coa denominación: «Personalidade xurídica e xustificantes para tomar parte no concurso» e no sobre C coa denominación «Referencias técnicas», incluirase aquela documentación que figura indicada na cláusula novena do prego de cláusulas administrativas particulares.
9. Garantía provisional e definitiva: os licitadores constituirán unha fianza provisional de 2.524,25 euros, equivalente ó 2% do tipo de licitación.
O adxudicatario está obrigado a constituír unha garantía definitiva polo importe do 4% do orzamento de adxudicación.
As ditas garantías constituiranse na caixa da corporación, podendo constituírse en metálico, en aval bancario ou ben por calquera outra forma autorizada pola lei.
10. Gastos: serán por conta do adxudicatario os gastos que orixinen a publicación dos anuncios de licitación, así como os tributos que, se é o caso, pesen sobre o obxecto do contrato.
11. Criterios de selección: serán os previstos na cláusula décimo novena do prego de cláusulas administrativas particulares.
12. Apertura de plicas: a apertura de plicas terá lugar nun acto público no salón de sesións da Casa Consistorial, ás once horas do terceiro día hábil seguinte ó que remate o prazo sinalado para a presentación de proposicións.
A mesa de contratación procederá á apertura das proposicións presentadas polos licitadores e, tras realizar o estudio destas, efectuará a correspodente proposta de adxudicación provisional; co que dará por rematado o acto, dispoñendo que as proposicións presentadas, e a acta que se levante para o efecto (contendo as observacións que se realizasen e a proposta de adxudicación) pasen á Comisión de Goberno, para que poidan adopta-lo acordo de adxudicación do contrato, o cal se efectuará dentro do prazo máximo de tres meses, contados desde a data de apertura de plicas.
Arzúa, 3 de novembro de 2003.
Xaquín García Couso
Alcalde