Os representantes das organizacións sindicais na mesa sectorial de negociación do persoal das institucións sanitarias do Sergas e os representantes da División de Recursos Humanos do Sergas acordaron darlles publi
cidade no Diario Oficial de Galicia ós compromisos derivados da negociación e vinculados ó acordo de mellora retributiva e profesional do persoal do Sergas.
Polo anterior, a División de Recursos Humanos do Servicio Galego de Saúde
RESOLVE:
Que se publique no Diario Oficial de Galicia o texto asinado polos representantes da Administración sanitaria e das organizacións sindicais que figuran no pé deste e que se xunta como anexo.
Santiago de Compostela, 21 de novembro de 2003.
José Ignacio Lema Piñeiro
Director xeral da División de Recursos Humanos
ANEXO
Outros compromisos derivados da negociación e vinculados ó acordo de mellora retributiva e profesional do persoal do Sergas:
1. Adaptación a TIS: exclusión.
Non se procederá á adaptación ó sistema TIS das retribucións do persoal o réxime retributivo do cal estea regulado pola Orde do 8 de agosto de 1986 (cota e zona), pola propia aplicación do seu réxime xurídico.
2. Retribución de atención domiciliaria.
O incremento previsto no número 4.2.2.3 do acordo calcúlase sobre a base dun euro diario pola xornada de traballo efectivo, co obxecto de remunera-la obriga do persoal de presta-la atención domiciliaria, sempre que non se lle facilite vehículo nas unidades e servicios de atención primaria.
3. Profesionais de cota de atención especializada.
A Administración comprométese a iniciar no ano 2004 a elaboración e posterior negociación da norma que habilite a xerarquización deste persoal.
4. Acceso do persoal de cota e zona de atención primaria á participación nos programas de obxectivos de calidade para o servicio público determinados pola dirección.
A Administración sanitaria estudiará a viabilidade de fórmulas para que os profesionais de cota e zona de atención primaria poidan ser remunerados pola súa participación na consecución dos obxectivos de calidade do servicio público que estableza a Administración.
5. Convocatorias unitarias de provisión de prazas.
5.1. As convocatorias de concurso de traslados que se realicen durante a vixencia do acordo formalizaranse de xeito conxunto para o persoal, o réxime do cal o permita, poida optar indistintamente a prazas de atención primaria e atención especializada.
5.2. Habilitaranse as vías necesarias para facilita-la promoción interna temporal entre niveis e de mobilidade temporal do persoal entre postos das institucións sanitarias dos diferentes niveis asistenciais.
6. Revisión de cargas de atención continuada en quendas complexas.
A Administración sanitaria comprométese a analizar e estudia-las cargas de traballo derivadas da prestación en réxime de quendas rotatorias complexas co obxecto
de analiza-la viabilidade de establecer fórmulas que alixeiren as ditas cargas para o persoal maior de 55 anos.
7. Gardas localizadas.
A Administración comprométese a retomar, no mes de setembro de 2003, a negociación para a regulación dos descansos compensatorios, que está interrompida pola actual negociación no seo da mesa sectorial, para o seu peche.
8. Réxime de ordenación funcional dos cadros de persoal.
A Administración promoverá a elaboración da norma sobre ordenación funcional dos cadros de persoal.
Para a súa configuración teranse en conta os criterios que se establezan, en atención ás características específicas dos postos de traballo que se determinen, o cal terá tratamento no seo da mesa sectorial.
9. Configuración do réxime de traballo en gardas, noites e domingos e festivos.
A Administración e os sindicatos con representación na mesa sectorial analizarán a actual configuración do réxime retributivo da prestación de servicios en gardas e noites, e particularmente a concorrencia destas últimas con domingos e festivos.
10. Medidas que favorezan a homologación do persoal non estatutario que presta servicios nas institucións sanitarias do Sergas.
A Administración e os sindicatos con representación na mesa sectorial estudiarán as vías que favorezan a integración no réxime estatutario do persoal que no seu momento optou pola non integración, en ofertas anteriores de homologación, co obxecto de mellora-lo clima laboral.
Exposto o anterior, as organizacións sindicais farán consta-lo seguinte en canto á sinatura do acordo e compromisos anteriores:
A organización sindical CC.OO. non asiste á reunión á que foi previamente convocada, se ben achegou un escrito que se xunta á acta no que manifesta a súa actual non adhesión ó acordo e demais compromisos.
A representante da UGT confirma a sinatura da organización.
O representante da CIG manifesta a sinatura da súa organización.
A representante de SAE expresa tamén a sinatura da súa organización.
O representante de CSI-CSIF alega que non subscriben o acordo e demais compromisos por non responder actualmente ás expectativas da súa organización.
Os representantes de CEMSATSE manifestan a sinatura da súa organización.
Para expresa-la conformidade cos contidos da presente acta asinan:
-Pola Administración sanitaria:
O director xeral da División de Recursos Humanos, José Ignacio Lema Piñeiro
-Polas organizacións sindicais:
* Pola CIG:
Xan Cons Pintos
María Xosé Abuín Álvarez
* Por UGT:
Delia Irene Martínez Conde
* Por CSI-CSIF:
Daniel Otero Castiñeira
* Por CESM:
Cándido Andión Núñez
* Por SATSE:
Carmen García Rivas
* Por SAE:
Begoña Caínzos Ayerbe
Cecilia Dou Marcos