O IGAEM (Instituto Galego das Artes Escénicas e Musicais) convoca o II Certame de Creación Coreográfica de Galicia aberto a tódolos coreógrafos, e que se celebrará no mes de abril de 2004 no Salón Teatro de Santiago de Compostela.
1. Obxecto.
O certame preséntase como unha plataforma de exhibición e encontro de novos coreógrafos, tendo como obxectivo fundamental a promoción da nova creación coreográfica e a estimulación xeral da actividade profesional do sector. Preténdese fomenta-la investigación, a innovación e as postas en escena imaxinativas.
2. Premios.
Primeiro premio. 3.500 euros e a posibilidade, a través da Federación Española de Asociaciones de Profesionales de la Danza, de incluí-la obra gañadora do certame dentro da programación nacional de coreografías premiadas que ten previsto realizar no ano 2004.
Segundo premio. 2.000 euros.
Terceiro premio. 1.500 euros.
Premio a un bailarín sobresaínte. 1.200 euros.
Se o xurado considera oportuno entregar algunha mención, esta será premiada con 1.200 euros.
Os premios están suxeitos ós impostos aplicables.
O IGAEM tamén amosa o seu interese en cooproducir un espectáculo con algunha das coreografías premiadas, dentro dos seus obxectivos de difusión e promoción da danza ós que fai referencia o artigo 9 da súa lei, condicionado a súa inclusión no plan de actividades do IGAEM cara ó ano 2005 aprobado polo Consello Rector do IGAEM.
3. Coreografías.
-Poderán participar todas aquelas coreografías orixinais ou estreadas no ano 2003 e 2004, e que non foran premiadas en ningún concurso nacional ou internacional. As obras estreadas con anterioridade ó 1 de xaneiro de 2003 non serán aceptadas.
-As coreografías deben ser interpretadas por un mínino de tres bailaríns e un máximo de seis. Non se aceptan os solos. A duración da obra non poderá exceder de quince minutos.
4. Xurado.
-O xurado comporase de profesionais expertos do mundo da danza, das artes escénicas e musicais. Se a xuízo do xurado ningunha coreografía fora merecedora do premio, este poderá declararse deserto.
-O xurado terá os seguintes criterios de avaliación para as coreografías participantes: orixinalidade, capacidade de invención, innovación e risco nas propostas, manexo da linguaxe coreográfica e utilización do espacio escénico e dos seus elementos.
5. Selección.
-Desenvolvemento do certame:
Os coreógrafos que desexen participar neste certame deberán enviar un vídeo VHS coa gravación da coreografía (sen cortes e en plano xeral fixo), coa totalidade dos seus intérpretes, en roupa de ensaio e sen efectos de luz.
Un comité de pre-selección, que incluirá membros do xurado, efectuará a preselección con base nos vídeos. As coreografías seleccionadas presentaranse no Salón Teatro de Santiago de Compostela o día 16 de abril, onde o xurado fallará os premios.
Xunto coa cinta de video deberán remitir unha ficha cos seguintes datos:
-Nome do coreógrafo.
-Enderezo e teléfono.
-Título da coreografía.
-Título da música e nome do compositor.
-Deseñadores de luz e son.
-Nomes dos bailaríns.
-Duración da coreografía.
-Indicar se a coreografía foi estreada con anterioridade e cando.
6. Condicións técnicas.
-Cada coreógrafo deberá achegar un rexedor para indica-los efectos de luz, os niveis de son e pausas ós técnicos do teatro.
-A organización enviará a cada coreógrafo planos da montaxe estándar da iluminación con detalles da localización, enfoques, cores e tipos de aparatos, permitíndose un máximo de 15 efectos de luz.
A música presentarase en CD.
-Non se admitirán elementos colgados de varas nin substancias líquidas ou inflamables, que deterioren ou ensucien o espacio que se vaia utilizar.
-Cada grupo terá un periodo de ensaio dunha hora o día da actuación. Neste horario de ensaio gravaranse os efectos de luz, repaso da coreografía, e probas de son.
-A organización non se responsabiliza de ningún dano físico ou material dos participantes no certame.
-Así mesmo, os organizadores resérvanse o dereito de grava-la gala final con fins publicitarios ou culturais.
7. A participación neste certame supón a aceptación destas bases e condicións. Calquera outro suposto non recollido nas presentes bases, será resolto pola dirección do comité organizador.
8. A decisión do xurado será inapelable.
9. As coreografías premiadas anunciaranse sempre en futuras presentacións en programas de man, carteis e prensa con Premio do II Certame de Creación Coreográfica de Galicia.
10. Contra a presente resolución poderán os interesados interpoñer recurso potestativo de reposición ante o mesmo órgano no prazo dun mes contado a partir do día seguinte ó da publicación desta resolución no Diario Oficial de Galicia ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contado desde o día seguinte ó da publicación desta resolución no Diario Oficial de Galicia.
Toda a documentación para participar deberá enviarse antes do 1 de marzo de 2004 a:
Certame de Creación Coreográfica de Galicia
Pavillón de Galicia San Lázaro s/n, 15703 Santiago
Máis información 981 57 71 26. programacionigaem.1*xunta.es
Santiago de Compostela, 5 de novembro de 2003.
José Manuel Soto Virulegio
Xerente do Instituto Galego das Artes
Escénicas e Musicais