Con data 13 de outubro de 2003 foi publicada no Diario Oficial de Galicia a orde da Consellería da Presidencia, Relacións Institucionais e Administración Pública, do 24 de setembro de 2003, pola que se clasifica como benéfico social a Fundación Cabaleiro Goás, adscribíndoa á Consellería de Sanidade que exercerá plenamente o protectorado sobre ela.
Esta fundación, de acordo co establecido no artigo 8 dos seus estatutos ten como obxecto organizar, promover e realizar actividades relacionadas coa información, docencia e investigación en Ciencias da Saúde no Complexo Hospitalario de Ourense e a súa área de influencia, con interese preferente nas áreas biomédicas e na saúde mental.
A planificación das actividades da Fundación Cabaleiro Goás considerará as necesidades do corpo social e orientará sempre a súa actividade de acordo coas directrices, obxectivos e prioridades institucionais da Consellería de Sanidade e do Sergas.
Por todo isto, en virtude das competencias que me confire o artigo 34 da Lei 1/1983, do 22 de febreiro, reguladora da Xunta e do seu presidente, e segundo o establecido no artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro e o artigo 32.3º a) do Decreto 248/1992, do 18 de xuño, polo que se aproba o Regulamento de organización e funcionamento das fundacións de interese galego,
DISPOÑO:
Primeiro.-Declarar de interese galego a Fundación Cabaleiro Goás, ó cumpri-los seus estatutos as prescricións que, para tal efecto, sinala a vixente lexislación en materia de fundacións de interese galego.
Segundo.-Ordena-la inscrición da Fundación Cabaleiro Goás, no rexistro de fundacións de interese galego, sección da Consellería de Sanidade, para os efectos constitutivos que sinala o artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro.
Terceiro.-A devandita fundación queda sometida ó disposto no resto da normativa de xeral aplicación, en especial, á obriga de dar publicidade suficiente ás súas actividades e á ausencia de ánimo de lucro na prestación dos seus servicios, quedando obrigada a renderlle contas anualmente ó protectorado e xustificar, a través dunha memoria anual, o cumprimento das cargas fundacionais, así como a presentarlle o
proxecto de orzamento ó protectorado, con anterioridade ó inicio do exercicio económico para o que se formula e debendo solicita-las preceptivas autorizacións do protectorado cando sexan necesarias.
Santiago de Compostela, 25 de outubro de 2003.
José Mª Hernández Cochón
Conselleiro de Sanidade
CONSELLERÍA DE XUSTIZA, INTERIOR E ADMINISTRACIÓN
LOCAL