A Constitución española, no seu artigo 18.4º, dispón que a Lei limitará o uso da informática para garanti-lo honor e a intimidade persoal e familiar dos cidadáns e o pleno exercicio dos seus dereitos.

Neste sentido, a Lei orgánica 15/1999, do 13 de decembro, de protección de datos de carácter persoal, regula o tratamento de datos de carácter persoal rexistrados en soporte físico, así como toda modalidade de uso posterior deles polos sectores público e privado. Neste marco, é obxecto desta regulación a garantía e protección dos dereitos fundamentais e liberdades públicas das persoas físicas, e especialmente da súa honra e intimidade persoal e familiar.

O artigo 20.1º da devandita lei dispón que a creación, modificación ou supresión dos ficheiros das administracións públicas só poderá facerse por medio de disposición xeral publicada no Boletín Oficial del Estado ou diario oficial correspondente.

As ordes do 27 de xullo de 1994 (DOG nº 146, do 30 de xullo), do 4 de decembro de 1995 (DOG nº 238, do 14 de decembro) e do 15 de decembro de 2000 (DOG nº 249, do 27 de decembro), crearon determinados ficheiros automatizados de datos de carácter persoal na Consellería de Sanidade e no Servicio Galego de Saúde, ó abeiro do disposto na Lei orgánica 5/1992, do 29 de outubro, de regulación do tratamento automatizado de datos de carácter persoal e na Lei orgánica 15/1999, do 13 de decembro, de protección de datos de carácter persoal, que derroga e vén substituí-la anterior.

A conveniencia de adapta-los ficheiros creados polas citadas ordes ás novas necesidades e ó cambio lexislativo operado na materia, xustifica a súa modificación, cancelando neste caso os ficheiros que deixaron de ser útiles ou sexan substituídos por outros novos.

En consonancia, e en virtude das facultades que me confire o artigo 34.6º da Lei 1/1983, do 22 de febreiro, reguladora da Xunta de Galicia e do seu presidente, modificada parcialmente pola Lei 11/1988, do 20 de outubro,

DISPOÑO:

Artigo 1º.-Obxecto.

Esta orde ten por obxecto a modificación das ordes do 27 de xullo de 1994, do 4 de decembro de 1995,

e do 15 de decembro de 2000, polas que se crearon determinados ficheiros automatizados de datos de carácter persoal na Consellería de Sanidade e no Servicio Galego de Saúde, suprimindo os ficheiros que se relacionan no anexo desta orde.

Artigo 2º.-Destino.

Os datos de carácter persoal que se suprimen segundo o disposto no artigo anterior, foron incluídos dentro da declaración doutros dous ficheiros existentes na Consellería de Sanidade e o Servicio Galego de Saúde e os centros dependentes deste, referenciados na táboa anexa.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 1 de outubro de 2003.

José Mª Hernández Cochón

Conselleiro de Sanidade

ANEXO

Relación de centros nos que se procede a dar de baixa os ficheiros referenciados: