Con data 4 de abril de 2002, a Comunidade Autónoma de Galicia e a Cámara Oficial de Comercio e Industria de Ourense outorgaron escritura pública de constitución, a título gratuíto, do dereito real de superficie sobre a parcela 7G do Parque Tecnolóxico de Galicia, a favor da dita cámara para a construcción dun centro de incubación de empresas, logo do acordo do Consello da Xunta de Galicia mediante o Decreto 425/2001, do 28 de decembro (DOG nº 10, do 15 de xaneiro de 2002).

Segundo a cláusula 2 do artigo 2º do dito decreto, fixábase a duración do dereito real de superficie en dez anos; transcorrido o dito prazo o edificado pasará a ser propiedade da Comunidade Autónoma de Galicia, sen que deba satisfacerse indemnización ningunha. Non obstante, antes do seu vencemento, poderá prorrogarse a situación superficiaria por períodos sucesivos, de igual duración, se así o acordase expresamente o Consello da Xunta de Galicia, por proposta da Consellería de Economía e Facenda, logo de petición da superficiaria con anterioridade ó vencemento do período anterior, ata un prazo máximo de corenta anos excluído o período inicial.

Con data 23 de maio de 2003, a dita cámara solicita a modificación do dereito de superficie concedido e constituído, no sentido de amplia-lo prazo de duración inicial a vinte anos, con base en que, para a construcción do edificio do viveiro de empresas, a cámara solicitou axuda financeira á Fundación Instituto Cameral para la Creación y Desarrollo de la Empresa (INCYDE), dependente do Consello Superior de Cámaras de Comercio; axuda que se canaliza a través do Feder e a súa concesión require que o período de afección mínimo do terreo á actividade de viveiro de empresas non sexa inferior a quince anos desde a posta en funcionamento.

A Secretaría Xeral e do Patrimonio, dependente da Consellería de Economía e Facenda, logo dos informes favorables da Asesoría Xurídica e da Intervención Xeral da Comunidade Autónoma de Galicia, tramitou o expediente de modificación do dereito de superficie, de acordo co previsto nos artigos 30 da Lei 3/1985, do 12 de abril, do patrimonio da Comunidade Autónoma de Galicia, e 83 e seguintes do seu regulamento.

Ó abeiro dos artigos 30.2º da Lei 3/1985, do 12 de abril, do patrimonio da Comunidade Autónoma

de Galicia, e 86.1º do seu regulamento aprobado polo Decreto 50/1989, do 9 de marzo, o acordo de modificación do dereito de superficie adoptará a forma de decreto do Consello da Xunta de Galicia, por proposta da Consellería de Economía e Facenda.

Na súa virtude, por proposta do conselleiro de Economía e Facenda logo da deliberación do Consello da Xunta de Galicia na súa reunión do día dez de outubro de dos mil tres,

DISPOÑO:

Artigo único.-Acórdase a modificación da cláusula 2ª do artigo 2 do Decreto 425/2001, do 28 de decembro (DOG nº 10, de 15 de xaneiro de 2002), que queda redactada como segue:

«O dereito real de superficie terá unha duración de vinte anos, transcorrido o dito prazo o edificado pasará a ser propiedade da Comunidade Autónoma de Galicia, sen que deba satisfacerse indemnización ningunha. Non obstante, antes do seu vencemento, poderá prorrogarse a situación superficiaria por períodos sucesivos de dez anos, se así o acordase expresamente o Consello da Xunta de Galicia, por proposta da Consellería de Economía e Facenda, logo de petición da superficiaria con anterioridade ó vencemento do período anterior, ata un prazo máximo de trinta anos excluído o período inicial».

Disposición derradeira

A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.

Santiago de Compostela, dez de outubro de dous mil tres.

Manuel Fraga Iribarne

Presidente

José Antonio Orza Fernández

Conselleiro de Economía e Facenda