Na Lei 5/2000, do 28 de decembro, de medidas fiscais e de réxime orzamentario e administrativo (DOG nº 251, do 29 de decembro), disponse a creación da Axencia Galega de Desenvolvemento Rural (Agader) como o instrumento básico de actuación da Xunta de Galicia no fomento e coordinación do desenvolvemento do territorio rural galego para mellora-las condicións de vida e evita-lo despoboamento dese territorio.
Dentro dos obxectivos da Axencia Galega de Desenvolvemento Rural atópase a mobilización da iniciativa privada coa finalidade de impulsa-lo desenvolvemento das áreas rurais. Neste sentido, entre os traballos que está a levar a cabo Agader, cabe sinala-la posta en práctica de actuacións públicas complementarias que animen a participación privada e contribúan á conservación do contorno rural.
En consonancia con todo o anterior, o Consello de Dirección do 19 de setembro de 2003, aprobou o Regulamento do premio Agader ó embelecemento do medio rural galego. Así mesmo, aprobou a con
vocatoria para o ano 2003 e acordou delegar na directora xeral de Agader a facultade para levar a cabo as actuacións precisas para o desenvolvemento da convocatoria e a concesión do premio Agader ó embelecemento do medio rural galego.
De acordo co exposto,
RESOLVO:
Primeiro.-Regulamento.
Publícase o Regulamento do premio Agader ó embelecemento do medio rural galego, que figura como anexo desta resolución.
Segundo.-Convocatoria de 2003.
Faise pública a convocatoria do premio Agader ó embelecemento do medio rural galego correspondente ó ano 2003, que se suxeitará ás normas contidas no regulamento que figura como anexo desta resolución.
O prazo de presentación de candidaturas rematará ás 14 horas do día 17 de novembro de 2003.
O premio constará dun diploma e unha dotación en metálico de 12.000 A.
Ademais haberá dous accésit, que terán unha dotación en metálico de 3.000 A cada un.
Santiago de Compostela, 25 de setembro de 2003.
Belén Hernández Lafuente
Directora xeral de Agader
ANEXO
Regulamento do premio Agader ó embelecemento do medio rural galego
Artigo 1º.-O premio Agader ó embelecemento do medio rural galego poderá concederse á parroquia, localidade, aldea, núcleo de poboación ou grupo humano da Comunidade Autónoma de Galicia que destacase de xeito notable polo embelecemento e coidado do medio rural, así como pola defensa e conservación do seu contorno natural ou ecolóxico, do seu patrimonio histórico, cultural ou artístico ou na realización de obras comunais ou outras manifestacións de solidariedade extraordinaria.
Artigo 2º.-Os grupos de acción local de Galicia, institucións, entidades, empresas, así como os cidadáns que o desexen, poderán presentar propostas razoadas de candidaturas ó premio Agader ó embelecemento do medio rural galego durante o prazo que determine a axencia na correspondente convocatoria.
As propostas poderán ser enviadas por correo certificado, correo electrónico (infoAgader*xunta.es) ou presentadas na sede de Agader, avda. do Camiño Francés, 10-baixo-15771 Santiago de Compostela (A Coruña).
Artigo 3º.-A documentación que deberá ser incluída na presentación de cada candidatura é a seguinte:
1. Proposta formal, explicando os motivos polos que se presenta a candidatura.
2. Documentación acerca da parroquia, localidade, aldea, núcleo de poboación ou grupo humano proposto.
Poden presentarse tamén, se se considera oportuno, apoios á candidatura e, en xeral, cantos datos e información se consideren axeitados para fortalece-la proposta.
Artigo 4º.-As propostas de candidaturas que non cumpran os requisitos anteriores non serán admitidas.
En todo caso, a documentación presentada non será devolta, nin se manterá correspondencia sobre ela.
Artigo 5º.-En cada convocatoria o premio terá o seu propio xurado. Os membros deste serán designados por Agader, que determinará, de entre aqueles, quen será o secretario.
Artigo 6º.-Na primeira xuntanza do xurado o secretario declararao constituído. A continuación elixirase o presidente do xurado de entre os seus membros.
Correspóndelle ó presidente dirixi-las deliberacións e, se é o caso, as votacións que se produzan, e ó secretario, con voz e sen voto, levantar acta das sesións e interpreta este regulamento.
Artigo 7º.-O xurado será libre para elixir entre as candidaturas presentadas ou outorga-lo premio a outra parroquia, localidade, aldea, núcleo de
poboación ou grupo humano presentado documentalmente polos membros do xurado.
Artigo 8º.-O premio outorgarase á candidatura que obteña a maioría dos votos do xurado. O voto deberá ser emitido persoalmente por cada un dos membros do xurado durante as xuntanzas formais que este celebre. No caso de empate decidirá o voto do presidente.
Artigo 9º.-O premio será outorgado a unha soa parroquia, localidade, aldea, núcleo de poboación ou grupo humano. Excepcionalmente poderá ser compartido.
Artigo 10º.-O xurado poderá declarar deserto o premio.
Artigo 11º.-O premio Agader ó embelecemento do medio rural galego constará dun diploma e da dotación en metálico que se estableza na convocatoria anual correspondente. Ademais do premio, o xurado poderá conceder dous accesits, que terán a dotación económica que se estableza na convocatoria anual correspondente.
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA