A Orde do 30 de decembro de 2002 pola que se particulariza para o exercicio 2003 o procedemento de concesión de axudas para a creación, renovación, modernización e innovación tecnolóxica das empresas de manipulación, transformación, conservación, tratamento e comercialización dos productos da pesca, o marisqueo e a acuicultura (DOG nº 252, do 31 de decembro de 2002) establece no seu artigo 2º o importe da contía máxima das axudas que ó abeiro dela poderán ser concedidas ós seus solicitantes.
Posteriormente foi publicada a Orde do 20 de marzo de 2003 (DOG nº 61, do 27 de marzo) pola que se modifica a Orde do 30 de decembro de 2002 no relativo ó importe da contía máxima das axudas. Como consecuencia da modificación desta orde, o importe máximo para este tipo de axudas quedou fixado en 15.235.326,83 euros.
Non obstante, e por canto no mesmo programa de gasto destinado para o efecto existen outras dotacións que poden ser utilizadas para os mesmos fins, é polo que cómpre amplia-lo importe da contía máxima das axudas que poderán ser concedidas ó abeiro da referida Orde do 30 de decembro de 2002 coa finalidade de achegalas ó maior número de beneficiarios posible.
Por todo o exposto e no uso das facultades que me foron conferidas
DISPOÑO:
Artigo único.
Primeiro.-Amplíase o importe da contía máxima das axudas que se van conceder ó abeiro da Orde do 30 de decembro de 2002 (DOG nº 252, do 31 de decembro de 2002) na cantidade de 4.000.000,00 de euros con cargo á aplicación orzamentaria 12.03.722A.770.0 que figura dotada nos orzamentos xerais da Comunidade Autónoma de Galicia para 2003.
Segundo.-A presente modificación non afecta o prazo establecido na referida orde para a presentación de solicitudes.
Santiago de Compostela, 15 de setembro de 2003.
Enrique César López Veiga
Conselleiro de Pesca e Asuntos Marítimos