Dentro do plan de actividades da Escola Galega de Administración Pública para o 2003 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Cultura, Comunicación Social e Turismo, unhas xornadas sobre leis, actos, sentencias e propiedade intelec
tual, convocatoria que se desenvolverá conforme as seguintes bases:
1. Obxectivos.
As leis, os actos administrativos e as sentencias son considerados, en si mesmos, obras da linguaxe, xa oral, xa escrita, a pesar do que e con base nos intereses xerais superiores, os dereitos de autor sobre elas están restrinxidos. Trátase de coñecer con exactitude o alcance de tales restriccións e os supostos nos que a propiedade intelectual subsiste; trátase de saber cándo existen límites a ela, cándo e en qué medida dominio público; trátase de saber, en fin e entre outras moitas cousas, cómo afecta o asunto estudiado a lexislación sobre segredos oficiais ou o segredo de sumario e cando hai delictos ou ilícitos á vista e qué nos depara Internet ó respecto.
2. Contido.
Trataranse estes temas:
-Censura e monopolio das leis. Publicidade destas. O interese xeral como razón de ser do artigo 13 da Lei de propiedade intelectual. Antecedentes e xestación.
-Debates parlamentarios e dereitos de autor.
-As leis e as súas recompilacións e anotacións como obxecto de propiedade intelectual.
-Escritos e informes forenses, sentencias e propiedade intelectual.
-Actos, acordos, deliberacións e dictames dos organismos públicos, asuntos reservados e segredos oficiais.
-Descubrimento e revelación de segredos.
-O artigo 13 da Lei de propiedade intelectual e os delictos contra ela.
-Leis, actos, sentencias, bases de datos e Internet.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos do Instituto San Paio en Tui (rúa Casal Aboy, 11, da citada localidade) os días 22 e 23 de setembro de 2003.
5. Inscrición.
-Prazo: remata o xoves, día 18 de setembro de 2003.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurí
dico das administracións públicas e do procedemento administrativo común. Admitiranse tamén inscricións por telefax (981 54 63 30).
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 19 de setembro, das 8.30 ás 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 24 de agosto de 2003.
Domingo Bello Janeiro
Director da Escola Galega
de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA