Examinado o expediente instruído a pedimento de Somozas Energías Renovables, S.A. (Somersa) con enderezo para efectos de notificacións no lugar de Igrexa, 1, 15565 As Somozas (A Coruña) sobre autorización de instalacións do parque eólico denominado Requeixo; resultan os seguintes

Antecedentes de feito:

Primeiro.-O 6 de setembro de 2001, Manuel Candocia Ramos, en nome e representación de Somozas Energías Renovables, S.A., solicitou a autorización administrativa do parque eólico denominado Requeixo, de 10,5 MW.

Segundo.-O proxecto someteuse a información pública para os efectos de presentación de solicitudes en competencia, previstos non artigo 11 do Decreto 205/1995, polo que se regula ou aproveitamento da enerxía eólica en Galicia, mediante acordo da Delegación Provincial da Consellería de Industria e Comercio da Coruña do 20 de decembro de 2001, publicado no DOG do 11 de xaneiro de 2002 e no BOE do 15 de xaneiro de 2002.

Terceiro.-O 1 de marzo de 2002, Manuel Candocia Ramos, en nome e representación de Somozas Energías Renovables, S.A., solicitou a autorización administrativa, aprobación de proxecto de execución e ou recoñecemento da condición de instalación acollida ó réxime especial de producción de enerxía eléctrica do parque eólico denominado Requeixo, de 10,5 MW, achegando a documentación establecida para o efecto polo Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica e o Decreto 205/1995, do 6 de xullo, polo que se regula o aproveitamento da enerxía eólica na Comunidade Autónoma de Galicia, de aplicación ó presente expediente en virtude do disposto na disposición transitoria terceira do Decreto 302/2001, do 25 de outubro, polo que se regula o aproveitamento da enerxía eólica na Comunidade Autónoma de Galicia e o Real decreto 2818/1998, do

23 de decembro, sobre producción de enerxía eléctrica por instalacións abastecidas por recursos ou fontes de enerxía renovables, residuos e coxeración.

Cuarto.-O proxecto someteuse a información pública para os efectos previstos nos decretos 442/1990, do 13 de setembro, de avaliación de impacto ambiental para Galicia, Decreto 327/1991, do 4 de outubro, de avaliación de efectos ambientais para Galicia, artigos 53 e 54 da Lei 54/1997, do 27 de novembro, do sector eléctrico; Real decreto 1955/2000, xa mencionados, e o Decreto 205/1995, polo que se regula o aproveitamento da enerxía eólica en Galicia, mediante resolución da Delegación Provincial da Coruña do 5 de marzo de 2002, publicada no diario La Voz de Galicia do 15 de marzo de 2002, no BOP da Coruña do 30 de febreiro de 2002, no DOG do 21 de marzo de 2002 e no taboleiro de anuncios do Concello das Somozas.

Durante o período de información pública non foron presentadas alegacións.

Quinto.-O 24 de outubro de 2002 a Delegación Provincial da Consellería de Innovación, Industria e Comercio da Coruña emitiu informe favorable sobre o citado proxecto, coas seguintes características básicas:

-Localización e coordenadas poligonais:

-Nº de aeroxeradores: 7.

-Potencia unitaria por aeroxerador: 1.500 kW.

-Xeradores: Ecotecnia 1.500.

-Potencia total instalada: 10,5 MW.

-Producción anual estimada: 26.775 MWh/ano.

-Investimento previsto: 8.543.690,64 euros.

Características técnicas da infraestructura eléctrica de transformación e interconexión:

-7 centros de transformación de 1.500 kVA e relación de transformación 0,69/20 kV, instalados unitariamente en interior de torre de aeroxerador coa súa correspondente paramenta de seccionamento, manobra e protección.

-Rede eléctrica subterránea a 20 kV realizada en conductor R.H.Z.1 15/25 kV de 1x500 mm Al e 1x300 mm para a interconexión dos aeroxeradores e estes coa subestación transformadora.

-Subestación transformadora intemperie equipada con transformador de potencia nominal 12 MVA e relación de transformación 20/132 kV, celas de media tensión 20 kV, transformador de servicios auxiliares de 50 kVA e relación 20/0,4 kV, aparellos de medida, protección, telemando e telecontrol.

Sexto.-O 21 de maio de 2003, a Dirección Xeral de Calidade e Avaliación Ambiental resolveu formula-la declaración de impacto ambiental do citado parque eólico, a cal foi publicada por Resolución do 19 de xuño de 2003, da Dirección Xeral de Industria, Enerxía e Minas, no DOG do 27 de xuño. Establecéndose o trazado das gabias do cableado e a localización definitiva da subestación transformadora unha vez sexa recibida, avaliada e informada favorablemente a documentación requirida nos puntos 10.1º e 10.2º da declaración de impacto ambiental.

Sétimo.-O expediente incluíuse de forma automática dentro do conxunto de solicitudes presentadas á convocatoria anual, realizada conforme o artigo 15 do Decreto 302/2001, publicada no DOG do 25 de novembro de 2002. Por Resolución do 3 de marzo de 2003 desta consellería, publicada no DOG do 11 de marzo, acordouse que proseguise a tramitación administrativa de autorización deste parque eólico.

Fundamentos de dereito:

Primeiro.-A Dirección Xeral de Industria, Enerxía e Minas é competente para resolver este expediente con fundamento no Estatuto de autonomía de Galicia; Real decreto 2563/1982, do 24 de xullo; o Decreto 132/1982, do 4 de novembro; o Decreto 223/2003, do 11 de abril, polo que se establece a estructura orgánica da Consellería de Innovación, Industria e Comercio; en relación co Real decreto 1955/2000, do 1 de decembro, Decreto 205/1995, do 6 de xullo, e o Real decreto 2818/1998, do 23 de decembro, xa citados.

Segundo.-No expediente instruído para o efecto cumpríronse os trámites regulamentarios. Así mesmo, a instalación e o seu proxecto de execución reúnen tódolos requisitos técnicos esixibles.

Esta dirección xeral, de acordo co que antecede e no exercicio das competencias que ten atribuídas,

RESOLVE:

1. Autorizar a Somozas Energías Renovables, S.A., a instalación dos equipos electromecánicos do parque eólico denominado Requeixo, para unha potencia total de 10,5 MW, que se situará no concello das Somozas (A Coruña).

2. Aproba-lo proxecto de execución da dita instalación.

3. Recoñecerlle a esa instalación a condición de instalación acollida ó réxime especial do Real decreto 2818/1998, e incluíla no grupo b.2) do artigo 2 do dito real decreto.

Todo iso de acordo coas condicións seguintes:

Primeira.-Somozas Energías Renovables, S.A., para os efectos de garanti-lo cumprimento das súas obrigas, deberá constituír, no prazo dun mes contado desde o outorgamento da presente autorización, unha fianza de 170.873,81 euros, importe do 2% do orzamento que figura no expediente para garanti-lo cum

primento das súas obrigas, conforme o disposto no artigo 15 do citado Decreto 205/1995, do 6 de xullo.

A dita fianza constituirase na caixa xeral de depósitos da Consellería de Economía e Facenda da Xunta de Galicia, en calquera das formas sinaladas no artigo 1.1º, punto 39 do Decreto 1775/1967, do 22 de xullo, e será devolta unha vez que se formalice a acta de posta en marcha das instalacións.

Segunda.-As instalacións que se autorizan terán que realizarse de acordo coas especificacións e planos que figuran no proxecto presentado pola empresa cun orzamento de 8.543.690.64 euros.

Terceira.-Para introducir modificacións nas instalacións que afecten a datos básicos do proxecto será necesaria a previa autorización desta dirección xeral. Así mesmo, a Delegación Provincial da Coruña poderá autoriza-las modificacións de detalle do proxecto que resulten procedentes, debendo comunicar a esta dirección xeral tódalas resolucións que dicte en aplicación da dita facultade.

Cuarta.-O prazo para a posta en marcha das instalacións que se autorizan será de dezaoito meses, contados a partir da data de ocupación dos terreos.

Quinta.-Como requisito necesario para a aplicación á citada instalación do réxime especial, o promotor deberá inscribila no Rexistro de Instalacións de Producción de Enerxía Eléctrica en Réxime Especial da Comunidade Autónoma de Galicia, creado pola orde da Consellería de Industria e Comercio do 5 de xuño de 1995 (DOG do 14 de xullo), para o que acreditará o cumprimento das condicións previstas no artigo 12 do Real decreto 2818/1998, presentando a documentación que figure nas instruccións que dicte esta dirección xeral en desenvolvemento da dita orde. O parque conectarase co sistema de captación e procesamento de datos de producción enerxética de Galicia regulado por Orde do 29 de xullo de 2002 (DOG do 13 de agosto).

Sexta.-Con carácter previo á posta en marcha das instalacións, o órgano competente verificará o cumprimento dos condicionados impostos nesta resolución, na declaración de impacto ambiental do 21 de maio de 2003, así como aquelas que no seu día se emitan conforme o disposto no artigo 7.1º do Decreto 442/1990, do 13 de setembro, de avaliación de impacto ambiental para Galicia.

Sétima.-A Administración resérvase o dereito de deixar sen efecto a presente autorización por calquera das causas establecidas no artigo 34 do Decreto 1775/1967, do 22 de xullo, por incumprimento das condicións impostas ou por calquera outra causa excepcional que o xustifique.

Oitava.-Esta autorización outórgase sen prexuízo de terceiros e independentemente das autorizacións, licencias ou permisos de competencia municipal, provincial ou outros necesarios para a realización das obras das instalacións autorizadas.

Contra a presente resolución, que non é definitiva en vía administrativa, cabe interpoñer recurso de

alzada ante o conselleiro de Innovación, Industria e Comercio no prazo dun mes contado a partir do día seguinte ó da notificación desta resolución, sen prexuízo de que os interesados poidan interpoñer calquera outro recurso que estimen pertinente.

Santiago de Compostela, 22 de xullo de 2003.

Ramón Ordás Badía

Director xeral de Industria, Enerxía e Minas