As diversas leis sectoriais en materia de medio ambiente veñen atribuíndo expresamente a competencia sancionadora ós diferentes órganos nos que se estructura a Consellería de Medio Ambiente, en función da cualificación das infraccións en leves, graves e moi graves.
A Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, dispón expresamente no parágrafo segundo do artigo 127 que «o exercicio da potestade sancionadora correspóndelles ós órganos administrativos que a teñan expresamente atribuída, por disposición de rango legal ou regulamentario». Pola súa banda o artigo 13 desta mesma lei sinala que «Os órganos das diferentes administracións públicas poderán delega-lo exercicio das competencias que teñan atribuídas noutros órganos da mesma Administración, aínda que non sexan xerarquicamente dependentes ou das entidades de dereito vinculadas ou dependentes daquelas».
Consecuentemente co exposto e recoñecida expresamente a posibilidade de delega-lo exercicio da potestade sancionadora noutros órganos da mesma Administración e en uso das facultades previstas no artigo 34 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988,
DISPÓÑO:
Artigo 1º
Delega-lo exercicio da potestade sancionadora dos expedientes administrativos cando a súa resolución corresponda ó conselleiro de Medio Ambiente, nos directores xerais desta consellería en atención ó ámbito de competencia material determinada no Decreto 14/2002, do 24 de xaneiro, polo que se establece a estructura orgánica da Consellería de Medio Ambiente, e neste sentido:
1. Delégase no director xeral de Montes e Industrias Forestais a resolución dos expedientes admi
nistrativos sancionadores que lle correspondan ó conselleiro en materia de montes e incendios forestais.
2. Delégase no director xeral de Conservación da Natureza a resolución dos expedientes administrativos sancionadores que lle correspondan ó conselleiro en materia de caza, pesca, protección de animais domésticos e salvaxes en catividade, conservación da natureza e animais potencialmente perigosos.
3. Delégase no director xeral de Calidade e Avaliación Ambiental a resolución dos expedientes administrativos sancionadores que lle correspondan ó conselleiro en materia de residuos e protección ambiental.
Artigo 2º
As resolucións e actos administrativos que se adopten facendo uso das delegacións contidas nesta orde sinalarán expresamente esta circunstancia e considereranse dictadas polo órgano delegante.
Artigo 3º
En calquera momento o conselleiro de Medio Ambiente poderá reclama-lo exercicio das atribucións que son delegadas por esta orde, da que quedan excluídos, en todo caso, os supostos previstos no artigo 13.2º da Lei 30/1992, do 26 de novembro, de réxime xurídico das administracións públicas e do procedemento administrativo común e no artigo 42.2º da Lei 1/1983, do 22 de febreiro, reguladora da Xunta e do seu presidente.
Disposición derradeira
Única.-A presente disposición entrará en vigor o día seguinte ó da súa publicación no Diario Oficial de Galicia.
Santiago de Compostela, 16 de xullo de 2003.
Jose Luis Barreiro Fernández
Conselleiro de Medio Ambiente