Con data do 21 de xuño o Instituto Galego de Promoción Económica (Igape) e 18 entidades financeiras, asinaron un convenio co obxecto de establecer unha liña de axudas de apoio financeiro ó sector pesqueiro galego, complementarias das axudas directas concedidas ó abeiro do Decreto 201/2000, da Consellería de Pesca, Marisqueo e Acuicultura.
Entendendo cumpridos os obxectivos previstos neste convenio e tendo en conta que os novos proxectos que se leven a cabo neste ámbito poden ser atendidos dentro dos límites legais máximos de axuda, no marco actual dos convenios subscritos polo Igape e as entidades financeiras para o financiamento subsidiado ós proxectos de investimento que levan a cabo as Pemes galegas, estímase oportuno dar por finalizada no exercicio 2003 a vixencia do convenio, deixando atendidos os proxectos con resolución favorable da Consellería de Pesca ata o dito exercicio.
Polo que antecede, e en virtude das facultades que teño conferidas mediante o artigo 12 a) da Lei 5/1992, do 10 de xuño, de creación do Instituto Galego de Promoción Económica e do artigo 11.1º a) do Decreto 317/1992, do 12 de novembro, polo que se aproba o seu regulamento
RESOLVO:
Facer público, como anexo a esta resolución, o texto do acordo de modificación con data do 21 de
xullo de 2003 do convenio de apoio ó sector pesqueiro galego subscrito entre o Igape e as entidades financeiras o 21 de xuño de 2001, e se denuncia con efectos desde o 1 de xaneiro de 2004.
Santiago de Compostela, 23 de xullo de 2003.
Margarita Rodríguez Rama
Directora xeral do Instituto Galego
de Promoción Económica
ANEXO
Acordo polo que se modifica o convenio de apoio financeiro ó sector pesqueiro galego subscrito entre o Igape e as entidades financeiras, e se denuncia con efectos desde o 1 de xaneiro de 2004
En Santiago de Compostela a 21 de xullo de 2003,
Reunidos:
Dunha parte, o conselleiro de Economía e Facenda e presidente do Instituto Galego de Promoción Económica, José Antonio Orza Fernández, en nome e representación do dito instituto.
Doutra parte ... (en adiante, a entidade financeira), representada por D./Dª ..., con poder suficiente para obrigarlle neste acto.
Expoñen:
O Igape e a Consellería de Pesca e Asuntos Marítimos, con data do 21 de xuño de 2001, asinaron un convenio de colaboración co obxecto de establecer unha liña de apoio financeiro específico para o sector pesqueiro de Galicia, dentro da política de apoio á pequena e mediana empresa e que constitúe unha axuda complementaria ós incentivos que para este sector ten establecido a citada consellería, entendendo cumpridos os obxectivos previstos neste convenio e tendo en conta que os novos proxectos que se levan a cabo neste ámbito poden ser atendidos dentro dos límites legais máximos de axuda, no marco actual dos convenios subscritos polo Igape e as entidades financeiras para o financiamento subsidiado ós proxectos de investimento que leven a cabo as Pemes galegas, estímase oportuno dar por finalizada no exercicio 2003 a vixencia do convenio, deixando atendidos os proxectos con resolución favorable da Consellería de Pesca ata o dito exercicio.
Polo que antecede, as partes reunidas, en relación ó convenio de apoio financeiro ó sector pesqueiro asinado o 21 de xuño de 2001 (DOG nº 133, do 10 de xullo) e modificado mediante addenda do 1 de xullo de 2001 (DOG nº 177, do 12 de setembro),
Acordan:
Primeiro.-Engádese un novo parágrafo á cláusula 4ª Modalidade e destino das axudas co seguinte texto:
«No ano 2003 o Igape unicamente atenderá os proxectos de investimento que tiveran unha resolución de concesión de subvención ó abeiro das ordes da Consellería de Pesca, Marisqueo e Acuicultura con datas do 14 de xullo de 2000, 17 de xullo de
2000, 26 de xullo de 2000 e 21 de setembro de 2000 de data anterior ó 1 de xaneiro de 2003, e que presenten a súa solicitude no Igape antes do 31 de outubro de 2003. A concesión da axuda do Igape estará condicionada á existencia de crédito adecuado e suficiente, resolvéndose as solicitudes por estricto orde de entrada no Igape.».
Segundo.-Denúnciase o convenio con efectos desde o 1 de xaneiro de 2004, comprometéndose as partes a deixar atendidas fronte ós beneficiarios as obrigas legalmente contraídas polas dúas partes ata o dito momento.
Terceiro.-A modificación acordada na cláusula primeira terá efectos desde o 1 de xaneiro de 2003.
Pola entidade financeira ...:Polo Igape:
Asdo.: ... Asdo.: José Antonio Orza Fernández
DNI: ...Presidente do Igape
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA