En cumprimento do disposto no artigo 28 do regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto no artigo 60.1º da Lei 30/1992, do 26 de novembro, de réxime xurídico das administracións públicas e do procedemento administrativo común, faise constar que:

O Xurado Provincial de Clasificación de Montes Veciñais en Man Común de Pontevedra, dictou a seguinte resolución:

Asistentes:

-Presidente:

José A. López Rodríguez (delegado provincial da Consellería de Medio Ambiente).

-Vocais:

Mª Luisa Pardavila Pazos (avogada polo colexio da provincia).

Manuel Francisco Gutiérrez (xefe do Servicio de Montes e Industrias Forestais).

Luis Mª Muiños Vidueira (letrado da Asesoría Xurídica da Xunta de Galicia)

-Secretaria:

Pilar Pita Ponte (xefa de Sección do Servicio Técnico-Xurídico da Delegación de Medio Ambiente).

Na cidade de Pontevedra, ás dezasete horas do día 25 de xuño de 2003, coa asistencia das persoas a marxe indicadas, reúnese na 3ª planta do edificio sito no nº 47 da rúa Benito Corbal o xurado provincial de clasificación de montes veciñais en man común co obxecto de decidir sobre o recurso de reposición dos montes Bouza dos Abalos e Penedo do lugar de Trabanca-Badiña do concello de Vilagarcía de Arousa.

Antecedentes de feito.

Primeiro.-Con data do 2 de xullo de 1997, Manuel Piñeiro Dasilva, presidente da Comunidade de Montes Veciñais en Man Común de Trabanca-Badiña,

solicitou a clasificación como veciñais en man común dos montes Bouza dos Abalos e do Penedo da parroquia de Arealonga, lugar de Trabanca-Badiña, concello de Vilagarcía de Arousa, presentando levantamento topográfico e documentación histórica acreditativa dos dereitos dos veciños do lugar.

Segundo.-O xurado provincial de clasificación de montes veciñais en man común na súa reunión con data do 24-2-1999 acordou inicia-los trámites para a clasificacións do referido monte, así como a remisión do expediente ó Servicio de Montes e Industrias Forestais para o seu estudio e o seu informe.

Terceiro.-Cumprida e observada a tramitación legal e regulamentariamente esixida, procede a apertura do trámite de audiencia no que presentaron alegacións o solicitante e o Concello de Vilagarcía de Arousa.

No prazo esixido comparecen como interesados: os herdeiros de Rémirez de Esparza, presentando documentación histórica e notas simples informativas; e Mª Carmen Llovo Santos presentando informe con documentación histórica, escritura pública, etc.

Cuarto.-Vistos os informes previos e preceptivos do Servicio de Montes e Industrias Forestais e efectuada visita ó terreo, os montes obxecto deste expediente de clasificacción, obedecen á seguinte descrición:

Concello: Vilagarcía de Arousa.

Parroquia: Arealonga.

Lugar: Trabanca-Badiña.

Nome do monte: Bouza dos Abalos e Penedo

Cabida total estimada: 2,84 ha.

Localización xeográfica: as coordenadas extremas na cuadrícula UTM son:

Extremo norte 4717950.

Extremo sur 4716250.

Extremo leste 521200.

Extremo oeste 520800.

No citado monte distínguense dúas parcelas:

Parcela nº 1 Bouza dos Abalos.

Cabida: 0,89 ha. A vexetación consta de matogueira baixo, abundante rexeneración de Pinus Pinaster Ait e unha ducia de pés adultos da mesma especie.

Lindes:

Norte: predios particulares e camiño ó monte Xiabre.

Sur: antigo camiño ó monte Xiabre.

Leste: predios particulares.

Oeste: predios particulares.

Colindantes:

Norte: Mª Jesús Rubiáns Campos, Manuel Rodríguez Rubiáns.

Leste: Victoria Campos, Manuel Rodríguez Rubiáns.

Oeste: Herdeiros de Margarita Patiño, José Isaac Gómez Abalo.

Servidumes:

Atravesada por camiños de Trabanca-Badiña ó monte Xiabre en dous trazados distintos.

Ocupacións:

Obsérvase a presencia de: un depósito de augas, unha canteira abandoada que ocupa máis da metade da parcela no seu desterro, unha vivenda ocupada e en edificación dentro do desterro da canteira, varias chabolas ocupadas e un cercado de bloques e alambrada.

Parcela nº 2 Monte Penedo, O Penedo, Pedra Mallariza ou Pedra Malladiza.

Cabida: 1,95 ha parcialmente rasa, na zona norte aparece masa de Pinus pinaster adulto. Ó oeste monte bravo e rexenerado da mesma especie.

Lindes:

Norte: predios particulares, camiño vello de Trabanca a Cea e pista asfaltada separada por muro.

Sur: predios particulares muro por medio.

Leste: predios particulares e predios particulares muro por medio

Oeste: predios particulares, polígono industrial.

Colindantes:

Norte: Manuel Bentosinos Aguya, herdeiros Luis Mouriños.

Sur: predio Golpelleira (herdeiros de Ballesteros)

Leste: predio Golpelleira (herdeiros de Ballesteros).

Oeste: polígono industrial, Manuel Bentosinos Aguya, Elisa Barreiro García.

Servidumes: atópase atravesada por camiño.

Quinto.-Mediante resolución do xurado, adoptada na súa sesión do 20 de febreiro de 2003, acordou:

Non clasificar como veciñais en man común os montes Bouza dos Abalos e O Penedo por non quedar acreditado o seu aproveitamento veciñal.

Sexto.-Contra a dita resolución, Belén Raposo Pérez presentou recurso de reposición, alegando:

-Que a resolución denegatoria fúndase en que non resulta acreditado o uso veciñal das parcelas.

-Que os veciños de Trabanca-Badiña veñen realizando aproveitamentos das parcelas desde tempos inmemoriais.

-Que para tal fin achegouse no seu día documentación histórica e incluso oficio do concello de 1990 no que se refire que a extracción de areas efectúase por autorización dos veciños de Trabanca-Badiña no monte da súa propiedade. Achegan novamente copia.

-Documentación histórica relativa ás parcelas que se remonta ó Catastro Marqués da Ensenada e que se prolonga ata a actualidade, incluíndo cédulas de propiedade expedidas polo Ministerio de Facenda e relacións catastrais.

-Que a dita documentación proba que as parcelas estiveron censadas a favor dos veciños de Trabanca desde sempre.

-Que os actos de aproveitamentos dos veciños de Trabanca son sobradamente coñecidos e achegan:

1. Acta notarial de manifestacións dos veciños-comuneiros de máis idade de Trabanca-Badiña.

2. Acta notarial de manifestacións dos presidentes das comunidades de Cea e Loenzo.

3. Acta notarial de manifestacións do representante legal de Áridos de Pontearnelas manifestando que extraeu areas e pedras con autorización dos veciños.

4. Documento privado de manifestacións de Manuel Lago Barcala recoñecendo realizar traballos de desbrozamento e corta de piñeiros na parcela Pedra Malladiza ou Penedo, pola Comunidade de Montes de Trabanca Badiña.

Fundamentos de dereito.

Primeiro.-O xurado provincial de clasificación de montes veciñais en man común é o órgano competente para resolve-los recursos de reposición contra das súas resolucións de conformidade co artigo 116 da Lei 30/1992.

Segundo.-Procede admitir a trámite o recurso de reposición interposto por cumplir cos requisitos esixidos polo artigo 117.1º da precitada lei.

Terceiro.-Vistas as mencionadas probas, resulta que:

1. As persoas relacionadas na acta notarial achegada, non resulta acredita relación algunha coa parroquia que fundamenten as súas manifestacións.

2. A extracción de areas por parte da empresa Áridos de Puentearnelas, segundo informa o alcalde de Vilagarcía de Arousa é propiedade dos veciños segundo sentencia do xurado provincial de montes, entendendo que se debe referir a outra parcela xa clasificada e non a estas parcelas xa que o xurado aínda non se pronunciara.

3. En canto a certificación de Manuel Lago Barcala de realizar traballos de desbrozamento e corta de piñeiros o día 5-4-2002, non pode admitirse, xa que segundo o artigo 24 do punto a) e b) do regulamento para a execución da Lei 13/1989, do 10 de outubro, de montes veciñais en man común, ningún terreo afectado por este poderá ser obxecto de alleamento, división ou gravame, ata que o xurado dicte resolución oportuna e deberán depositar na Tesourería Xeral da Xunta de Galicia, por resultas da clasificación, os beneficios netos obtidos dos aproveitamentos habidos e os devengados por estes, depósito do que non se ten constancia.

As facultades atribuídas ós xurados provinciais de montes veciñais en man común refírense o exame da concorrencia no monte de dúas circunstancias: a súa pertenza a agrupacións veciñais e o aproveitamento consuetudinario en man común polos veciños. O aproveitamento non queda acreditado no expediente á vista dos informes perceptivos feitos pola enxeñeira técnica Mercedes González Rosales o día 3 de marzo de 1998 e polo enxeñeiro de montes Guillermo Vega Alonso o 8 de outubro de 2001.

En consecuencia, vistos os preceptos legais citados e demais normativa de xeral e pertinente aplicación, proponse polo instructor e de maneira unánime o xurado

ACORDA:

Desestima-lo recurso de reposición interposto por Belén Raposo Pérez, en representación da Comunidade de Montes Veciñais en Man Común de Trabanca-Badiña, contra da resolución deste xurado do 20 de febreiro do 2003, confirmando integramente a expresada resolución.

Contra esta resolución que pon fin á vía administrativa, poderase interpoñer recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ó da presente notificación, de acordo co disposto nos artigos 109 a) e 116.3º da Lei 30/1992, do 26 de novembro, de réxime xurídico das administracións públicas e do procedemento administrativo común, e nos artigos 8 e 46 da Lei 29/1998, do 13 de xullo, reguladora da xurisdicción contencioso-administrativa.

Pontevedra, 26 de xuño de 2003.

José Antonio López Rodríguez

Presidente do Xurado Provincial de Montes

Veciñais de Man Común de Pontevedra