Por Orde do 11 de abril de 2003 autorízase o desdobramento dos conservatorios superiores de música da Coruña e de Vigo, creándose en cada cidade un conservatorio superior e un conservatorio profesional de música.

Así mesmo, a disposición adicional décimo cuarta da Lei orgánica 1/1990, do 3 de outubro, de ordenación xeral do sistema educativo, establece que as ensinanzas correspondentes ó grao superior de música serán impartidas polos funcionarios do corpo de catedráticos de música e artes escénicas, mentres que corresponde ós funcionarios do corpo de profesores de música e artes escénicas a impartición das ensinanzas correspondentes ós graos elemental e medio e, excepcionalmente, aquelas materias do grao superior que se determinen, polo que parece razoable efectuar unha adscrición definitiva do profesorado que ten recoñecido o nivel de complemento de destino 26 ós conservatorios superiores de música, mentres que os restantes profesores do corpo de profesores de música e artes escénicas deben quedar adscritos con carácter definitivo ós conservatorios profesionais de música, sen prexuízo de que con carácter provisional, unha parte deste profesorado continúe desenvolvendo a docencia no grao

superior.

Na súa virtude, e en uso da habilitación establecida na disposición derradeira primera da Orde do 11 de abril de 2003, esta Dirección Xeral de Persoal

DISPÓN:

Primeiro.-Adscríbese con carácter definitivo ó Conservatorio Superior de Música da Coruña o profesorado que se relaciona no anexo I.

Segundo.-Adscríbese con carácter definitivo ó Conservatorio Superior de Música de Vigo o profesorado que se relaciona no anexo II.

Terceiro.-Adscríbese con carácter definitivo ó Conservatorio Profesional de Música da Coruña o profesorado que se relaciona no anexo III.

Cuarto.-Adscríbese con carácter definitivo ó Conservatorio Profesional de Música de Vigo o profesorado que se relaciona no anexo IV.

Quinto.-As adscricións ás que se refire esta orde terán efectividade do 1 de setembro de 2003, e non implicarán a perda da permanencia ininterrompida

no centro para os efectos da puntuación nos futuros concursos de traslados.

Disposicións adicionais

Primeira.-Os funcionarios de carreira do corpo de profesores de música e artes escénicas que obtiveron destino definitivo no Conservatorio Superior de Música da Coruña ou de Vigo, pola Resolución do 2 de xuño de 2003, entenderase que obtiveron destino definitivo nos conservatorios profesionais de música da Coruña e Vigo, respectivamente.

Segundo.-Os funcionarios de carreira do corpo de profesores de música e artes escénicas adscritos ós conservatorios profesionais de música da Coruña e Vigo que no curso académico 2002-2003 estiveron impartindo as ensinanzas de grao superior continuarán impartíndoas, co mesmo carácter provisional, mentres siga existindo a necesidade de persoal e non estea regulado o acceso ó corpo de catedráticos de música e artes escénicas.

As posibles novas necesidades de profesorado dos conservatorios superiores de música da Coruña e Vigo serán cubertas por profesorado con destino definitivo no correspondente conservatorio profesional, prioritariamente por esta orde:

a) Funcionarios de carreira do corpo de profesores de música e artes escénicas da especialidade correspondente, que estean en posesión do título superior.

b) Maior antigüidade no corpo.

c) Maior antigüidade no centro.

d) Maior puntuación no procedemento selectivo.

Santiago de Compostela, 10 de xuño de 2003.

Severino Somoza Gómez

Director xeral de Persoal

ANEXO I

ANEXO II

ANEXO III

ANEXO IV