O Decreto 244/2003, do 24 de abril, de homologación sanitaria de receitas oficiais para a prestación farmacéutica, regula o proceso a través do cal se verifican, con carácter previo á súa dispensación, as prescricións en receita oficial de determinados medicamentos, productos sanitarios e dietoterápicos complexos, incluídos na prestación farmacéutica e complementaria do Sistema Nacional de Saúde, co obxecto de valida-lo cumprimento dos requisitos establecidos para a súa prescrición, de acordo coas indicacións terapéuticas establecidas na autorización de comercialización, coas súas fichas técnicas e cos demais requisitos de prescrición, ó abeiro da normativa vixente na materia.
No seu artigo 4 establécese que a devandita homologación esixe informe clínico do facultativo médico que inicie o tratamento, de acordo co modelo que, mediante orde, determine a Consellería de Sanidade e que conterá, polo menos, os datos referentes á identificación do paciente, do facultativo e centro sanitario no que se prescribe, diagnóstico, prestación farmacoterapéutica e indicacións. A validez deste informe non será superior ós seis meses.
Para tal fin, de acordo coas atribucións que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1998, do 20 de outubro,
DISPOÑO:
Artigo único.
1. Aproba-lo modelo de informe clínico -incluído no anexo- que cómpre para o proceso de homologación sanitaria de receitas, regulado no Decreto 244/2003, do 24 de abril.
2. O contido deste informe comprende os seguintes puntos:
-Identificación do paciente, do facultativo e do centro sanitario no que se prescribe.
-Datos clínicos (diagnóstico e probas).
-Datos farmacoterapéuticos (indicación e tratamento).
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 30 de maio de 2003.
José Mª Hernández Cochón
Conselleiro de Sanidade