Os traballos de defensa contra incendios forestais teñen, pola súa propia natureza, un carácter especial que aconsella, na procura dun mellor cumprimento dos principios de economía, celeridade e eficacia, delegar nos delegados provinciais o exercicio da competencia para efectua-las contratacións do persoal laboral temporal necesario para o seu desenvolvemento e execución.
Na súa virtude, facendo uso das facultades que me confiren os artigos 13 da Lei 30/1992, do 26 de novembro, de réxime xurídico das administracións públicas e do procedemento administrativo común modificada pola Lei 4/1999, e 43 da Lei de Galicia 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, e demais disposicións de aplicación,
DISPOÑO:
Artigo 1º
Delégase nos delegados provinciais o exercicio da competencia para efectua-las contratacións de persoal laboral temporal dos servicios provinciais de defensa contra incendios forestais ós que sexa de aplicación o acordo do 28 de xullo de 1995 (DOG do 8 de setembro).
Artigo 2º
As contratacións que se realicen facendo uso da delegación contida nesta orde indicarán expresamente esta circunstancia e consideraranse efectuadas polo órgano delegante.
Artigo 3º
O conselleiro poderá avocar para si en calquera momento o exercicio das competencias delegadas nesta orde.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 21 de maio de 2003.
José Manuel Barreiro Fernández
Conselleiro de Medio Ambiente