En cumprimento do disposto no artigo 13 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, faise público o acordo, do quince de maio deste ano, adoptado polo Consello da Xunta de Gali
cia, polo que se aproba definitivamente o proxecto sectorial para a nova comandancia da Garda Civil en Pontevedra, que literalmente di:
1º Aprobar definitivamente o proxecto sectorial para a nova comandancia da Garda Civil en Pontevedra para os efectos establecidos na Lei 10/1995, do 23 de novembro, de ordenación do territorio de Galicia, e no Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal.
2º Declara-la utilidade pública das obras, instalacións e servicios previstos, así como a necesidade de ocupación, se é o cao, para os efectos de expropiación dos bens e dereitos necesarios para a execución do proxecto sectorial para a nova comandancia da Garda Civil en Pontevedra.
3º Declarar de marcado carácter territorial as obras previstas no proxecto sectorial para os efectos do disposto no artigo 11.3) do Decreto 80/2000, do 23 de marzo, e na disposición adicional primeira 2) da Lei 10/1995, de ordenación do territorio de Galicia, segundo a redacción recollida na disposición derradeira primeira da Lei 9/2002, do 30 de decembro, de ordenación urbanística e protección do medio rural de Galicia.
4º Consonte o disposto nos artigos 24 da citada Lei 10/1995 e 11.2) do xa citado Decreto 80/2000, deberase modifica-lo planeamento urbanístico dos municipios de Poio e Pontevedra para adecua-las súas determinacións ó proxecto aprobado conforme nel se recolle.
5º O proxecto sectorial de referencia entrará en vigor o día seguinte ó da publicación deste acordo no Diario Oficial de Galicia.
Contra o devandito acordo cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses contados desde o día seguinte ó da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdicción contencioso-administrativa.
Santiago de Compostela, 15 de maio de 2003.
Martín Fernández Prado
Director xeral de Urbanismo