Dentro das actividades programadas para o ano 2003 en colaboración coa Deputación Provincial de Pontevedra, en virtude do convenio de formación asinado entre a Consellería de Xustiza, Interior e Administración Local e a Deputación Provincial de Pontevedra, anúnciase a realización dun curso sobre dereitos humanos e ética policial, que deberá desenvolverse conforme as seguintes bases:

Obxectivos.

-Coñece-los cambios sociais que afectan as relacións policía-cidadán, así como a recomendación 10-2001 do Comité de Ministros do Consello de Europa sobre o Código Europeo de Ética da Policía.

-Coñece-los criterios de comportamento profesional: principios básicos de actuación, integridade moral e dignidade profesional.

-Domina-los valores de importancia nas relacións corporativas: trato cos superiores, iguais e inferiores; disciplina e xerarquía.

-Ter claros os principios que rexen nas relacións coa comunidade: corrección, atención, calidade e imaxe pública da policía.

Publicación.

Esta actividade formativa, e tamén todas aquelas que se desenvolvan en colaboración coa Deputación Provincial de Pontevedra, será obxecto de publicación no Diario Oficial de Galicia e no BOP de Pontevedra.

Destinatarios.

O curso vai dirixido ós membros dos corpos de Policía Local da provincia de Pontevedra.

Inscrición.

A inscrición dos participantes será totalmente gratuíta.

Prazas.

30 prazas.

Solicitudes.

1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.

2. O prazo para a presentación de instancias rematará o día 13 de maio de 2003, ás 14 horas.

3. As instancias deberán enviarse á Deputación Provincial de Pontevedra (Área de Recursos Humanos e Formación (fax: 986 80 41 41): avda. Montero Ríos, s/n, 36001 Pontevedra; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Datas.

O curso realizarase en datas do 19 ó 23 de maio de 2003.

O horario será de 16.30 a 20.30 horas.

Contido.

O curso desenvolverase en sesións de tarde, de luns a venres, e nel trataranse os seguintes módulos:

I. Integridade e dignidade socioprofesional.

II. Relacións corporativas.

III. Relacións coas autoridades.

IV. Relacións coa comunidade.

Relación de admitidos.

A relación de admitidos farase publica o día 15 de maio a partir das 14 horas, tanto pola Deputación Provincial de Pontevedra como pola Academia Galega de Seguridade. Os interesados poden coñecer e confirma-la súa asistencia chamando ós teléfonos 986 59 00 21 (AGS) ou 986 80 41 00 ext. 306/307 (Área de Recursos Humanos e Formación da Deputación Provincial de Pontevedra).

Lugar.

O curso desenvolverase na aula de formación da Deputación Provincial de Pontevedra, sita no pazo da deputación na avda. Montero Ríos, s/n, 36001 Pontevedra.

Certificado de asistencia.

Ó remate do curso entregaráselle un certificado de asistencia a aquelas persoas que acrediten a súa participación continuada a el.

Modificacións.

Tanto a Academia Galega de Seguridade como a Deputación Provincial de Pontevedra, se é o caso, poderase modifica-lo desenvolvemento normal do curso para adaptalo ás necesidades da Administración e ás continxencias que poidan xurdir.

A Estrada, 22 de abril de 2003.

Juan José Fariñas-Ferro Rodríguez

Director xeral da Academia Galega de Seguridade