O punto 23 da Orde do 6 de marzo de 2003 (DOG do 14 de marzo) pola que se convocaba procedemento selectivo de ingreso ó corpo de mestres e adquisición de novas especialidades, establece que os tribunais que xulguen o concurso-oposición estarán integrados por un presidente designado directamente pola Dirección Xeral de Persoal e catro vocais designados por sorteo entre funcionarios do corpo de mestres que conten coa especialidade correspondente.

Resultando necesario facer pública a data e a hora na que terá lugar o sorteo público, esta Dirección Xeral de Persoal

RESOLVE:

Primeiro.-O sorteo para determina-los catro vocais e os suplentes correspondentes, que xulgarán o concurso-oposición para ingreso no corpo de mestres e para adquisición da habilitación en novas especialidades, terá lugar entre funcionarios de carreira do corpo de mestres que conten coa especialidade correspondente, en situación de servicio activo en centros dependentes desta consellería, con destino definitivo ou provisional na provincia na que se celebra o sorteo, o próximo día 6 de maio de 2003 ás 9 horas nos seguintes lugares:

-Delegación Provincial da Consellería de Educación e Ordenación Universitaria, r/ Salvador de Madariaga, s/n (zona Monelos), A Coruña.

-Delegación Provincial da Consellería de Educación e Ordenación Universitaria, r/ Ronda da Muralla, 70-5ª planta (edificio administrativo Xunta de Galicia), Lugo.

-Delegación Provincial da Consellería de Educación e Ordenación Universitaria, r/ Concello, nº 13, Ourense.

-Delegación Provincial da Consellería de Educación e Ordenación Universitaria, r/ Montero Ríos, s/n, Pontevedra.

Santiago de Compostela, 23 de abril de 2003.

Severino Somoza Gómez

Director xeral de Persoal