Por medio do Decreto 365/1996, do 26 de setembro, reguláronse os horarios comerciais no ámbito da Comunidade Autónoma de Galicia, determinándose no parágrafo segundo da súa disposición adicional que regulamentariamente se poderán regula-los horarios comerciais dos establecementos dedicados exclusivamente á venda de productos culturais, e habilitando na disposición derradeira primeira o conselleiro de Innovación, Industria e
Comercio para dicta-las disposicións necesarias para a aplicación, execución e eficacia do devandito decreto.
Con motivo da conmemoración do Día das Letras Galegas, esta consellería considera conveniente autoriza-la apertura dos establecementos comerciais dedicados á venda de libros, o 17 de maio de 2003, para conseguir con isto a maior difusión, mediante a venda de libros, do patrimonio literario galego.
Na súa virtude,
DISPOÑO:
Artigo único.-Autorízanse os establecementos dedicados á venda de libros a abri-lo día 17 de maio de 2003, Día das Letras Galegas.
No caso de establecementos que realicen a venda de libros simultaneamente coa doutros productos, a autorización refírese exclusivamente á venda dos devanditos artigos.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 22 de abril de 2003.
Juan Rodríguez Yuste
Conselleiro de Innovación, Industria e Comercio