A Orde do 11 de decembro de 2002 (DOG nº 248, do 24 de decembro), da Consellería de Cultura, Comunicación Social e Turismo, regula as axudas económicas para a mellora de establecementos de cafeterías, cafés, bares e restaurantes. No seu artigo 1º disponse que as axudas que se establecen no articulado desta orde financiaranse con cargo á aplicación orzamentaria 10.05.751A.770.3, recollida no proxecto de Lei de orzamentos xerais da Comunidade Autónoma de Galicia para o ano 2003, e o importe destinado a elas ascenderá a 272.100 euros.
Dado que o importe establecido na Orde do 11 de decembro de 2002 resulta insuficiente para atende-las axudas solicitadas, faise necesario incrementa-lo dito importe polo que cómpre modifica-la orde no que respecta a este punto.
De acordo co anteriormente exposto e no exercicio das facultades que me confire o artigo 34 da
Lei 1/1983, do 22 de febreiro, reguladora da Xunta de Galicia e do seu presidente,
DISPOÑO:
Artigo único.-Modifica-lo artigo 1º da Orde do 11 de decembro de 2002, da Consellería de Cultura, Comunicación Social e Turismo, pola que se anuncian subvencións para a mellora de establecementos de cafeterías, cafés, bares e restaurantes que queda redactado do seguinte xeito:
Artigo 1º.-Destinatarios.
A Consellería de Cultura, Comunicación Social e Turismo poderá conceder subvencións ás persoas físicas e xurídicas titulares (en calquera das formas de posesión que determina o Código Civil) de establecementos de cafeterías, cafés, bares e restaurantes en funcionamento.
Estas concesións, que se rexen polos principios de publicidade, concorrencia competitiva e obxectividade, imputaranse á aplicación orzamentaria 10.05.751A.770.3 e a elas destínase un crédito máximo de 479.700 euros, sendo nestas axudas posible a concorrencia con calquera outra axuda para o mesmo obxecto e finalidade pero o seu importe, en ningún caso, poderá ser de tal contía que, en concorrencia con subvencións e axudas doutras administracións públicas ou doutros entes públicos ou privados, nacionais ou internacionais, superen a porcentaxe máxima do investimento subvencionable que legalmente estea establecido.
Disposicións derradeiras
Primeira.-Autorízase a directora xeral de Turismo para dicta-las disposicións que sexan necesarias para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 4 de abril de 2003.
Jesús Pérez Varela
Conselleiro de Cultura, Comunicación Social
e Turismo