A actividade administrativa da Consellería de Familia, Xuventude e Voluntariado supón unha concentración de funcións arredor da súa titular que aconsella, dado o seu volume, recorrer á delegación de competencias nos delegados provinciais respectivos da consellería sen esquece-lo debido respecto ós principios que informan a actividade administrativa e que a nosa Constitución recolle no seu artigo 103.1º.
A delegación de competencias permite a axilización administrativa necesaria e redunda en beneficio dos cidadáns, dentro do máis rigoroso respecto ás garantías xurídicas que a tutela dos intereses públicos esixe.
Na súa virtude, facendo uso das facultades que me confiren os artigos 43.3º e 44 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, e o artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro,
DISPOÑO:
Artigo 1º
Deléganse nos delegados provinciais da Consellería de Familia, Xuventude e Voluntariado, no seu respectivo ámbito territorial, as seguintes competencias:
a) A contratación de servicios relativos a gastos correntes con cargo ó capítulo II dos orzamentos de gastos da Comunidade Autónoma.
b) A contratación de subministracións de bens funxibles, con cargo ó capítulo II, necesarios para o funcionamento diario dos centros e servicios xestionados polos órganos periféricos.
c) A realización de tódolos trámites previos e o asinamento dos contratos individuais para o ingreso de menores de características especiais en centros sen convenio e para o ingreso en garderías infantís, así como toda a xestión ulterior das obrigas xurdidas do seu asinamento.
d) En relación ós puntos a), b) e c) desta orde, a autorización dos gastos xerais dos servicios dentro do ámbito territorial da respectiva delegación, ata o límite dos créditos autorizados e non reservados á aprobación do Consello da Xunta de Galicia, así como a autorización e disposición de créditos e de recoñecemento de obrigas e a facultade de solicitar da Consellería de Economía e Facenda a ordenación dos pagamentos correspondentes.
e) A competencia para efectua-las contratacións de persoal interino que se realicen ó abeiro da normativa vixente, as cales serán tramitadas e subscritas por eles.
f) As autorizacións das comisións de servicio con dereito a indemnización no ámbito provincial a todo o persoal adscrito ás delegacións.
Artigo 2º
As resolucións administrativas que se adopten facendo uso das delegacións contidas nesta orde farán constar expresamente esta circunstancia e consideraranse dictadas pola autoridade que as conferiu.
Artigo 3º
En calquera momento a conselleira poderá revogar ou avoca-lo exercicio das competencias delegadas por esta orde, das que quedan excluídas, en todo caso, as recollidas no artigo 13.2º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e no artigo 44.2º da Lei 1/1983, do 22 de febreiro, reguladora da Xunta e o seu presidente, na súa redacción dada pola Lei 11/1998, do 20 de outubro.
Disposición derrogatoria
Queda derrogada a Orde do 19 de xaneiro de 1998 sobre delegación de atribucións nos delegados provinciais e cantas disposicións de igual ou inferior rango se opoñan ó establecido nesta orde.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 14 de marzo de 2003.
Pilar Rojo Noguera
Conselleira de Familia, Xuventude e Voluntariado