Dentro do Plan de actividades da Escola Galega de Administración Pública para 2003, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase a Xornada sobre promoción da acción voluntaria: por un voluntariado de calidade, convocatoria que se desenvolverá conforme as seguintes bases:
1. Obxectivos.
Profundar sobre o papel das entidades de acción voluntaria e impulsa-lo traballo en rede co obxecto de garantir un voluntariado de calidade.
2. Contido.
Trataranse estes temas:
-Papel das administracións no desenvolvemento da acción voluntaria. Límites da súa intervención.
-As entidades de acción voluntaria. Marco normativo. Ética e voluntariado.
-Mesa-coloquio: por un voluntariado de calidade. Modelos de planificación e xestión das entidades de iniciativa social. O papel das novas tecnoloxías na acción voluntaria.
-Importancia de redes e coordinadoras no desenvolvemento da acción voluntaria.
-A formación e sensibilización como eixes da acción voluntaria. Novas canteiras de voluntariado.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e data: a xornada convocada desenvolverase no salón de actos do edificio administrativo da Xunta de Galicia en Vigo (praza da Estrela-Concepción Arenal, nº 8 da citada cidade), o día 9 de abril de 2003.
5. Inscrición.
-Prazo: remata o luns, día 7 de abril de 2003.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de
novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 8 de abril, das 8.30 ás 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento da xornada, así como o de cancelala, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate desta xornada, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 17 de marzo de 2003.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA