Con data do 11 de febreiro de 2003, publicouse no Diario Oficial de Galicia a orde da Consellería da Presidencia, Relacións Institucionais e Administración Pública do 5 de febreiro de 2003, pola que se clasifica como de interese benéfico-social a Fundación Parque Científico-Tecnológico Río do Pozo, adscribíndose á Consellería de Innovación, Industria e Comercio, que terá que exerce-lo protectorado plenamente sobre ela.
Esta fundación, de acordo co establecido no artigo 7 dos seus estatutos, ten por obxecto e finalidade:
a) Impulsar, por en marcha e xestionar un parque científico-tecnolóxico que dispoña dos espacios e as infraestructuras persoais e materiais necesarias para o desenvolvemento das investigacións e das novas tecnoloxías.
b) Impulsa-la conexión do labor investigador da Universidade da Coruña e os seus centros I+D coa actividade de empresas tecnoloxicamente avanzadas e as institucións.
c) Facilita-la transparencia da tecnoloxía desde os centros universitarios ás empresas establecidas no parque, co fin de mellora-la eficiencia da actividade investigadora e colaborar no incremento da competitividade das empresas.
d) Fomenta-los proxectos conxuntos de investigación entre a Universidade da Coruña e as empresas de Galicia en áreas tecnolóxicas de recoñecida importancia.
e) Favorece-la creación de empregos cualificados, procurando mellora-las expectativas de traballo e as condicións laborais dos titulados universitarios.
f) Crear un marco de excelencia ambiental e un espacio de creatividade e calidade ó servicio da investigación e á empresa.
g) Promove-lo fomento e o desenvolvemento dos sectores empresariais tradicionais de Galicia, dentro dun marco de competitividade, tecnoloxía e información.
h) Calquera outro fin acorde co disposto nestes estatutos.
Por todo isto, e en virtude das competencias que me confire o artigo 34.12º da Lei 1/1983, do 22 de febreiro, reguladora da Xunta e do seu presidente, e segundo o establecido nos artigos 8 da Lei 7/1983, do 22 de xuño, de réxime das fundacións de interese galego, e 32.3º do Decreto 248/1992, do 18 de xuño, polo que se aproba o réxime de organización e funcionamento do protectorado das fundacións de interese galego.
Na súa virtude,
DISPOÑO:
Artigo único.
1. Declarar de interese galego a Fundación Parque Científico-Tecnolóxico Río do Pozo ó cumpri-los seus estatutos as prescricións que, para tal efecto, sinala a vixente lexislación en materia de fundacións de interese galego.
2. Ordena-la inscrición da Fundación Parque Científico-Tecnológico Río do Pozo na sección do Rexistro de Fundacións da Consellería de Innovación, Industria e Comercio para os efectos constitutivos que sinala a Lei 7/1983, do 22 de xuño, de réxime das fundacións de interese galego, modificado pola Lei 11/1991, do 8 de novembro.
Disposición derradeira
Esta orde entrará en vigor o día da súa publicación no Diario Oficial de Galicia.
Santiago de Compostela, 10 de marzo de 2003.
Juan Rodríguez Yuste
Conselleiro de Innovación, Industria e Comercio
CONSELLERÍA DE POLÍTICA AGROALIMENTARIA E
DESENVOLVEMENTO RURAL