O artigo 28.2º da Constitución española recoñece, como dereito fundamental da persoa, o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1998, do 9 de xuño (DOG nº 116, do 20 de xuño), entre os que se atopa a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde e ante cada situación de folga, decidan o mínimo de actividade necesaria para asegura-lo mantemento de tales servicios, así como para determina-lo persoal necesario para a súa prestación.
Convocada folga polas organizacións sindicais CIG, CC.OO., UGT e Cemsatse, desde as 11 ás 11.30 horas, os días 27 de febreiro, 6, 13, 20 e 27 de marzo; 3, 10 e 24 de abril; 8, 15, 22 e 29 de maio de 2003, que afecta a todo o persoal dependente da Xerencia de Atención Primaria de Ourense, oído o comité de folga,
DISPOÑO:
Artigo 1º
A folga convocada desde as 11 ás 11.30 horas, os días 27 de febreiro, 6, 13, 20 e 27 de marzo; 3, 10 e 24 de abril; 8, 15, 22 e 29 de maio de 2003, que afecta a todo persoal dependente da Xerencia de Atención Primaria de Ourense, enténdese condicionada ó mantemento dos servicios mínimos segundo os criterios que se dispoñen nesta orde.
Os servicios mínimos que se fixan resultan totalmente imprescindibles para mante-la adecuada cobertura dos servicios esenciais de asistencia sanitaria nos centros sanitarios, para evitar que se produzan graves prexuízos ós usuarios.
Tales mínimos responden á necesidade de compatibiliza-lo respecto ineludible ó exercicio do dereito á folga coa atención ós usuarios, que, baixo ningún concepto, poden quedar desasistidos polas características do servicio dispensado.
Os servicios mínimos que se fixan resultan totalmente imprescindibles para mante-la adecuada cobertura dos servicios esenciais de asistencia sanitaria nos centros sanitarios, para evitar que se produzan graves prexuízos ós usuarios.
A actividade de asistencia sanitaria en atención primaria no horario ordinario comprende a atención programada, máis a atención urxente e inaprazable que se produza; tendo en conta que os días en que está convocada a folga son laborables, e que o horario de funcionamento dos PAC é das 15 ás 8 horas do día seguinte, e no UN é das 17 ás 9 horas do día seguinte, cómpre garanti-lo 100% da atención urxente e inaprazable durante a folga, das 11 ás 11.30 horas. En consecuencia, e tendo en conta a demanda de atención urxente e inaprazable para os cidadáns, é imprevisible, sen que se poida facer planificación da demanda, senón que a dita actividade se planifica para garanti-la asistencia, os servicios mínimos deben se-los seguintes:
Persoal facultativo:
-Cobertura do 100% da actividade urxente en cada categoría.
-En centros de ata oito profesionais: 1 efectivo de cada categoría.
-En centros de nove ou máis profesionais: 2 efectivos de cada categoría.
Persoal sanitario non facultativo.
-Cobertura do 100% da actividade urxente en cada categoría.
-En centros de ata oito profesionais: 1 efectivo.
-En centro de nove ou máis profesionais: 2 efectivos.
Persoal non sanitario.
A actividade do persoal non sanitario nos centros de saúde de atención primaria complementa a actividade asistencial, e participa do principio do traballo en equipo.
Ademais, resulta imprescindible mante-la continuidade da organización, sen rupturas ou efectos traumáticos evitando calquera prexuízo ou discriminación daqueles que se poidan ver afectados durante a folga, polo que os servicios mínimos que se deben nomear para garantí-la atención urxente ou inaprazable e para mante-la continuidade da organización son os seguintes:
*1 efectivo cando a designación corresponda a persoal de servicios xerais e dous no caso de que coincida na categoría de celadores ou auxiliares administrativos (1 celador e 1 auxiliar administrativo).
*Servicios de mantemento: un número equivalente ós domingos ou festivos.
*Servicios administrativos na sede da xerencia e para o efectivo control das incidencias derivadas
da folga: o 40% dos efectivos do servicio de persoal e das secretarías de dirección.
*Almacén e contabilidade: o 25% do persoal en cada unha das unidades.
* Outras áreas de traballo ou servicios: establecerase, con carácter xeral, un número equivalente ós domingos ou festivos.
Artigo 2º
A designación nominal, que deberá recaer nos profesionais de xeito rotatorio, será determinada polo director-xerente e notificada ós profesionais designados.
Artigo 3º
Os paros e alteracións no traballo por parte do persoal necesario para o mantemento dos servicios mínimos serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).
Artigo 4º
O disposto nos artigos anteriores non significará ningún tipo de limitación dos dereitos que a normativa reguladora da folga lle recoñece ó persoal nesta situación, nin tampouco sobre a tramitación e efectos das peticións que a motiven.
Artigo 5º
Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos establecementos sanitarios.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 25 de febreiro de 2003.
José Mª Hernández Cochón
Conselleiro de Sanidade
