A Orde do 18 de novembro de 2002, modificada pola Orde do 3 de decembro de 2002, establece as medidas transitorias urxentes para facer fronte ás consecuencias do accidente do buque Prestige, co obxecto de palia-las repercusións máis inmediatas sobre a actividade pesqueira e marisqueira.

Estas medidas urxentes contemplan axudas para os mariscadores, tripulantes e armadores dos buques que tiveran que cesa-la súa actividade como consecuencia do cesamento da actividade pesqueira e marisqueira provocada pola contaminación producida.

Agora ben, o mantemento no tempo das circunstancias que deron orixe a estas medidas urxentes, obriga a que teña que considerarse a ampliación destas axudas a outras actividades, que non sendo extractivas, si se ven seriamente afectadas pola prolongada inactividade pesqueira e marisqueira da zona afectada pola vertedura do buque Prestige.

Visto o anterior,

DISPOÑO:

Artigo 1º

Poderán acollerse ás presentes axudas os colectivos que, cumprindo o establecido no artigo seguinte, a continuación se definen:

-Redeiros e colaboradores familiares de embarcacións.

-Persoal laboral das confrarías.

-Operarios das lonxas e fábricas de xeo.

-Comercializadores de primeiro nivel que poidan amosa-la súa dependencia do recurso afectado.

Artigo 2ª

Será requisito obrigatorio para poder acollerse ás axudas:

-Que tivesen que paralizar completamente as súas actividades, como consecuencia da inactividade pesqueira e marisqueira, decretada pola Consellería de Pesca e Asuntos Marítimos, e

-Que tivesen o seu ámbito de actividade vinculado á zona xeográfica, ós portos e ás confrarías de pescadores, incluída, en cada momento, na zona de peche decretada.

Artigo 3ª

O período máximo cuberto por esta orde será coincidente co período de vixencia da Orde do 18 de novembro de 2002, modificada pola do 3 de decembro de 2002, é dicir, durante un período de seis meses, tódolos días naturais, que poderá ser prorrogado no caso de que as circunstancias así o recomenden, comezando desde o día 18 de novembro de 2002.

As axudas establecidas para cada un dos grupos será de 30 euros por día de inactividade:

Estas imputaranse ós conceptos orzamentarios 12.03.614.B.480.90. e 12.03.614.470.90

Artigo 4º

Para acollerse ás referidas axudas os afectados deberán presentar unha solicitude dirixida ó conselleiro de Pesca e Asuntos Marítimos, xunto coa seguinte documentación:

* En tódolos casos:

-Solicitude normalizada do anexo I.

-Declaración xurada (segundo o anexo II).

-Certificación da entidade bancaria que acredite o número de conta do beneficiario para o aboamento da axuda

* Cada caso en particular:

Caso dos redeiros e colaboradores familiares de embarcacións:

-Copia cotexada do boletín TC1/20, do pagamento das cotas da Seguridade Social inmediatamente anterior á prohibición da pesca e o marisqueo.

* Caso do persoal laboral das confrarías de pescadores.

-Certificación da confraría conforme o traballo que se realiza para a mencionada confraría.

-Copia cotexada dos TC do último mes controlado, inmediatamente anterior á prohibición da pesca e o marisqueo.

* Caso dos operarios de lonxa e fábricas de xeo:

-Copia cotexada dos TC do último mes controlado ou do último boletín TC1/15, do pagamento das cotas da Seguridade Social, anterior á prohibición da pesca e o marisqueo.

-Certificación do responsable da lonxa, conforme o solicitante desenvolve a actividade no establecemento.

* Caso dos comercializadores de primeiro nivel.

-Copia cotexada dos TC do último mes controlado ou do último boletín TC1/15 do pagamento das cotas da Seguridade Social anteriores á prohibición da pesca e o marisqueo.

-Certificación do responsable da lonxa ou lonxas, ou documento cotexado de ter autorización para realiza-la actividade de comprador (non necesario, no caso de traballadores por conta allea)

-Certificación detallada expedida polo responsable da lonxa ou lonxas das zonas onde desenvolva a súa actividade, das compras realizadas no último trimestre.

Toda a documentación deberá ser presentada antes do 20 de decembro de 2002, nas delegacións territoriais ou comarcais da Consellería de Pesca e Asuntos Marítimos.

Calquera variación nas circunstancias declaradas polos beneficiarios destas axudas deberá ser notificada de inmediato.

Artigo 5º

Á vista das solicitudes presentadas, e logo da proposta do director xeral de Estructuras e Mercados da Pesca, resolverá o conselleiro de Pesca e Asuntos Marítimos.

Artigo 6º

Estas axudas serán incompatibles con:

1. A realización polo perceptor de calquera actividade laboral, durante o período establecido.

2. O recoñecemento do dereito á protección por desemprego e co resto das prestacións do sistema

da Seguridade Social, non compatibles co traballo do beneficiario.

Disposicións transitorias

Primeira.-Tódolos actos de trámite dictados nos expedientes de gasto regulados nesta orde entenderanse condicionados a que, ó dictarse o acordo de compromiso de gasto, subsistan as mesmas circunstancias de feito e de dereito, existentes no momento en que foron producidos aqueles actos.

Segunda.-No caso de que as circunstancias varíen no que respecta á extensión das áreas, poderá modificarse a zona afectada, e polo tanto, os portos nos que estes sectores terán dereito á percepción das axudas así como as modalidades de pesca implicadas.

Neste suposto, facúltase o director xeral de Estructuras e Mercados da Pesca para dicta-las normas necesarias para amplia-lo alcance desta orde ás novas circunstancias.

Terceira.-Facúltase, así mesmo, o director xeral de Estructuras e Mercados da Pesca, para dicta-las disposicións necesarias para o desenvolvemento desta orde.

Disposición adicional

Única.-As medidas que se establecen nesta norma ningún caso supoñen recoñecemento de responsabilidade da Comunidade Autónoma polos referidos danos e adóptanse sen prexuízo do dereito que asiste a Comunidade Autónoma para reclamar dos responsables os importes das indemnizacións que corresponda.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 11 de decembro de 2002.

Enrique César López Veiga

Conselleiro de Pesca e Asuntos Marítimos