O Decreto 14/2002, polo que se establece a estructura orgánica da Consellería de Medio Ambiente contempla entre os seus órganos a Dirección Xeral da Conservación da Natureza, que pola súa vez, conta con dúas subdireccións xerais, a Subdirección Xeral de Espacios Naturais e Biodiversidade e a Subdirección Xeral de Recursos Cinexéticos e Piscícolas.
A Subdirección Xeral de Recursos Cinexéticos e Piscícolas, ten encomendadas as funciones de programación, fomento e xestión dos recursos cinexéticos e piscícolas en augas continentais, a través da ordenación dos ditos recursos, con especial incidencia na divulgación, formación e promoción específica destas materias. Da devandita subdirección depende o Servicio de Caza e Pesca Fluvial.
No ámbito provincial as funciones e competencias da consellería son exercidas polas delegacións provinciais contando para iso con unidades con nivel orgánico de servicio, dispoñendo dun único servicio, o de Conservación da Natureza, para efectos de exerce-las funcións da Dirección Xeral de Conservación da Natureza, neste ámbito.
A crecente amplitude e complexidade dos cometidos encargados ós servicios provinciais de Conservación da Natureza fan aconsellable o seu desdobramento, en dous servicios provinciais, que reproduzan a estructura da Dirección Xeral de Conservación da Natureza, nun servicio provincial de espacios naturais e biodiversidade, e outro encargado de caza e da pesca fluvial, modificando, en consecuencia, a denominación e funcións do actual Servicio de Conservación da Natureza.
Dese xeito racionalizarase máis a estructura administrativa, facilitando as relaciones entre os servicios centrais e os periféricos e atenderanse mellor os traballos e sectores implicados, contribuíndo a asenta-la proposta galega para a rede Natura 2000, atendendo á aplicación da normativa de protección de animais domésticos e salvaxes en catividade, e cubrindo as demandas dos máis de cen mil pescadores e dos preto de oitenta mil cazadores existentes nesta Comunidade Autónoma.
En consecuencia, por proposta do conselleiro de Medio Ambiente, tralo de informe das consellerías da Presidencia, Relacións Institucionais e Administración Pública e de Economía e Facenda e logo de deliberación do Consello da Xunta de Galicia na súa reunión do día vintedous de novembro de dous mil dous,
DISPOÑO:
Artigo 1º
Dar nova redacción ó parágrafo sexto do artigo 9.3 do Decreto 14/2002, que regula o Servicio de
Conservación da Natureza, quedando redactado como segue:
Servicio de Espacios Naturais e Biodiversidade: exercerá no ámbito provincial as funciones da Dirección Xeral de Conservación da Natureza en materia de espacios naturais e biodiversidade, así como a aplicación da normativa de protección de animais domésticos e salvaxes en catividade.
Artigo 2º
Engadir un novo parágrafo o artigo 9.3º do Decreto 14/2002:
Servicio de Caza e Pesca Fluvial: exercerá no ámbito provincial as funcións da Dirección Xeral de Consevación da Natureza en materia de caza e pesca fluvial.
Disposición derrogatoria
Quedan derrogadas cantas disposicións de igual ou inferior rango que se opoñan ó disposto neste decreto.
Disposicións derradeiras
Primeira.-Autorízase o conselleiro de Medio Ambiente para dicta-las disposicións precisas para o desenvolvemento deste decreto.
Segunda.-Este decreto entrará en vigor o día seguinte ó da súa publicación en Diario Oficial de Galicia.
Santiago de Compostela, 22 de novembro de 2002.
Manuel Fraga Iribarne
Presidente
José Carlos del Álamo Jiménez
Conselleiro de Medio Ambiente