O Servicio Galego de Saúde, co fin de mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos de varias ambulancias propiedade deste. Algúns deses vehículos, en virtude do tempo transcorrido, non son útiles na actualidade para a realización de labores de ambulancia e, de acordo co Decreto 42/1998, do 15 de xaneiro, polo que se regula o transporte sanitario, exceden o tempo máximo establecido para o seu destino a fins sanitarios. Por todo o exposto, os concellos da Estrada (Pontevedra) e Crecente (Pontevedra) solicitan a cesión dos vehículos que utilizan para seren destinados a outros fins que redunden no interese xeral do municipio.
Con este fin, o Servicio Galego de Saúde tramitou o expediente de cesión dos anteditos vehículos, de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto).
Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro,
DISPOÑO:
Artigo 1º
Acórdase a cesión dos seguintes vehículos a favor dos concellos da Estrada (Pontevedra) e Crecente (Pontevedra).
VehículoMatrículaConcello
Nissan SerenaC-1139-BLA Estrada
Nissan VanettePO-7505-ADCrecente
Artigo 2º
A cesión queda sometida ás seguintes cláusulas:
a) Os bens cedidos destinaranse a fins de utilidade pública ou interese social do concello, tal e como esixe o artigo 96 bis do Decreto 50/1989 e 35 bis da Lei 3/1985, do patrimonio da Comunidade Autónoma.
b) Coa cesión outorgaráselle ó concello a propiedade do vehículo, comprometéndose este a realizar ante a Xefatura Provincial de Tráfico os trámites precisos para o cambio da titularidade do vehículo.
c) Os bens cedidos destinaranse a outros fins de utilidade pública ou interese social do concello, debendo o concello proceder a retirar do vehículo todo anagrama ou rotulación que puidera identificalo como vehículo sanitario, así como a aboa-los gastos que puidera orixina-la transformación do vehículo.
Artigo 3º
A cesión formalizarase mediante acta subscrita polo director xeral da División de Recursos Económicos do Servicio Galego de Saúde e o órgano competente dos distintos concellos, debendo constar nela o acordo de cesión e a aceptación do cesionario.
Disposición derradeira
O Servicio Galego de Saúde, a través do seu órgano competente, realizará os trámites necesarios para a efectividade de canto se dispón nesta orde.
Santiago de Compostela, 14 de novembro de 2002.
José María Hernández Cochón
Conselleiro de Sanidade