Dentro do Plan de actividades da Escola Galega de Administración Pública para o 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Revista de Derecho Urbanístico y Medio Ambiente, unhas xornadas sobre o procedemento de disciplina urbanística, convocatoria que se desenvolverá conforme as seguintes bases:
1. Obxectivos.
A través destas xornadas preténdese analiza-los problemas máis comúns, relevantes e actuais da disciplina urbanística na lexislación urbanística galega, facendo un especial fincapé nas novidades que achega o proxecto de Lei do solo de Galicia. Desde o réxime xurídico dos dereitos de propietarios e da protección da legalidade urbanística, as clases de solo, ata a tramitación dos expedientes sancionadores, pasando pola prescrición no eido urbanístico, estas xornadas repasarán con amplitude tódalas posibles actuacións tendentes a conseguir un correcto desenvolvemento urbanístico.
2. Contido.
Trataranse estes temas:
-Réxime xurídico dos dereitos e deberes dos propietarios. Clases de solo. A súa vinculación á disciplina, na lexislación galega vindeira (I e II).
-Tramitación dos expedientes de disciplina urbanística: especialidades procedementais e análise dun suposto práctico.
-Tramitación dos expedientes sancionadores: especialidades procedementais e análise dun suposto práctico.
-Réxime xurídico da protección da legalidade urbanística na normativa galega: obras sen licencia en curso de execución, obras terminadas sen licencia e outros actos carentes de autorización.
-Réxime sancionador da normativa urbanística galega: tipificación das infraccións urbanísticas, persoas responsables, sancións e regras para determina-la contía das sancións.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos do edificio administrativo da Xunta de Galicia en Lugo (Ronda da Muralla, 70, da citada cidade), os días 16 e 17 de decembro de 2002.
5. Inscrición.
-Prazo: remata o xoves, día 12 de decembro de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, Polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 13 de decembro, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 19 de novembro de 2002.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA