Esta orde ten por obxecto arbitrar medidas transitorias e urxentes para palia-las repercusións máis inmediatas sobre a actividade pesqueira e marisqueira, da contaminación producida polo accidente do buque petroleiro Prestige en augas próximas á Comunidade Autónoma de Galicia.
Ante a prohibición da actividade pesqueira e marisqueira regulada por Resolución do 16 de novembro de 2002 do conselleiro de Pesca e Asuntos Marítimos é preciso adoptar de xeito inmediato medidas que compensen ós armadores, ós tripulantes e ós mariscadores, pola perda dos ingresos previstos.
Todo isto debe facerse compatible con actuacións coordinadas entre consellerías e con procedementos que garantan o mellor uso dos recursos, cunha tramitación áxil que facilite a máxima celeridade na resposta dado o seu carácter de solución anticipada que, en ningún caso, vai impedi-la repercusión dos gastos cara ás entidades e administracións implicadas.
Estas axudas non afectan ás posibles indemnizacións que por danos e perdas puidesen corresponderlles ós afectados
DISPOÑO:
Artigo 1º
Poderán acollerse ás axudas establecidas nesta orde os armadores, os tripulantes e os mariscadores que, provistos do correspondente permiso de explotación, veñan exercendo a actividade pesqueira e marisqueira, e teñan porto base na zona prohibida, segundo resolucións que, para o caso, dicte o conselleiro de Pesca e Asuntos Marítimos.
Os armadores e tripulantes das embarcacións censadas na modalidade de artes menores e cerco, incluídas no Rexistro de Buques de Pesca, Marisqueo e Acuicultura de Galicia que paralicen a súa actividade deberán deposita-lo rol de despachos na Capitanía Marítima correspondente.
Os tripulantes que non opten polas axudas ás que se refire esta orde e as embarcacións que non desexen para-la súa actividade poderán dedicarse á pesca fóra da zona afectada.
Artigo 2º
O período cuberto por esta orde será desde o día 17 de novembro de 2002 e durante un mes, sen
prexuízo dunha posible modificación, no caso de que as circunstancias o recomenden.
A contía que percibirá cada armador, tripulante ou mariscador durante o período arriba descrito será a seguinte:
* Armadores: (21 euros+4,75 euros por TRB) por día de inactividade.
* Tripulante ou mariscador: 30 euros por día de inactividade.
Estas axudas imputaranse ó concepto orzamentario que corresponda e aboaranse de conformidade co procedemento aprobado por resolución do conselleiro de Economía e Facenda do día 15 de novembro de 2002.
Artigo 3º
Para acollerse ás referidas axudas, os afectados deberán presentar unha solicitude dirixida ó conselleiro de Pesca e Asuntos Marítimos, acompañada da seguinte documentación:
1. En tódolos casos:
-Solicitude normalizada do anexo I.
-Declaración xurada (segundo o anexo II).
-Certificación da entidade bancaria que acredite o número de conta do beneficiario para o aboamento da axuda.
2. Ademais, en cada caso particular:
* No caso dos mariscadores:
-Fotocopia do DNI.
-Fotocopia do permiso de explotación en vigor para o ano 2002.
-Xustificantes de ter realizado vendas en lonxa neste ano.
* No caso dos tripulantes:
-Fotocopia do DNI.
-Copia cotexada da folla da cartilla de navegación onde figure o embarque.
-Copia cotexada da folla do rol onde figuren os embarques.
* No caso dos armadores:
-Fotocopia do DNI ou tarxeta de identificación fiscal no caso de persoas xurídicas.
-Fotocopia do permiso de explotación en vigor para o ano 2002.
-Copia cotexada do rol de despachos do buque dos dous meses inmediatamente anteriores á paralización.
-Acreditación de que o rol da embarcación está depositado na Capitanía Marítima.
-Certificación do Rexistro Mercantil acreditativa da propiedade do buque.
Toda a documentación deberá ser presentada antes do 1 de decembro de 2002 nas delegacións territoriais ou comarcais da Consellería de Pesca e Asuntos Marítimos.
Calquera variación nas circunstancias declaradas polos beneficiarios destas axudas deberá ser notificada de inmediato.
Artigo 4º
Á vista das solicitudes presentadas, e logo da proposta da Dirección Xeral de Estructuras e Mercados da Pesca, resolverá o conselleiro de Pesca e Asuntos Marítimos.
Artigo 5º
1. Estas axudas serán incompatibles coa realización polo perceptor de calquera actividade laboral durante o período establecido.
2. Así mesmo, serán incompatibles coas prestacións ou subsidios que puidesen percibir en concepto de desemprego.
Disposicións transitorias
Primeira.-Tódolos actos de trámite dictados nos expedientes de gasto regulados nesta orde entenderanse condicionados a que, ó dictarse o acordo de compromiso de gasto, subsistan as mesmas circunstancias de feito e de dereito existentes no momento en que foron producidos aqueles actos.
Segunda.-No caso de que as circunstancias varíen no que respecta á extensión das áreas, poderá modificarse a zona afectada, e polo tanto, os portos base nos que os armadores, os tripulantes e os mariscadores terán dereito á percepción das axudas así como as modalidades de pesca implicadas.
Neste suposto, facúltase o director xeral de Estructuras e Mercados da Pesca para dicta-las normas necesarias para amplia-lo alcance desta orde ás novas circunstancias.
Terceira.-Facúltase así mesmo o director xeral de Estructuras e Mercados da Pesca para dicta-las disposicións necesarias para o desenvolvemento desta orde.
Disposicion derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 18 de novembro de 2002.
Enrique César López Veiga
Conselleiro de Pesca e Asuntos Marítimos