Visto o texto da acta da revisión do artigo 30 do convenio colectivo para o sector, de limpeza de edificios e locais, con nº de código 3600895, que tivo entrada nesta delegación provincial o día 11-9-2002, subscrito pola comisión paritaria do convenio, con data 10-9-2002. De conformidade co disposto no artigo 90.2º e 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo, e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial
ACORDA:
Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Vigo, 30 de setembro de 2002.
Antonio Coello Bufill
Delegado provincial de Pontevedra
Convenio colectivo do sector de limpeza
de edificios e locais da provincia de Pontevedra
Asistentes:
-CC.OO.:
Carmen Segurana Bedrina.
-UGT:
Rosa Mª Acuña Salgado.
-CIG:
María do Tránsito Fernández Fernández.
-Represención empresarial:
Paulina Díaz Lamela.
Manuel Falque Comesaña.
-Secretario de actas:
Pablo Manuel Búa Burgos.
En Vigo, nos locais da Confederación de Empresarios de Pontevedra, sendo as once horas do día dez de setembro de dous mil dous, reúnense a comisión paritaria do convenio colectivo do sector de limpeza de edificios e locais da provincia de Pontevedra, co obxecto de modifica-lo artigo 30 do presente convenio en vigor, tal e como expresa a disposición adicional segunda do convenio colectivo para os anos 2001/2002, que queda redactado da seguinte maneira:
Artigo 30º.-Xubilación.
Os traballadores que cumpran a idade de 64 anos e demais requisitos esixidos poderanse acoller á modalidade de xubilación determinada no Real decreto lei 14/1981, do 20 de agosto, e Real decreto 1194/1985. Para tal efecto, as empresas obríganse a contratar simultaneamente no lugar do xubilado a outro traballador que sexa titular do dereito a calquera das prestacións económicas de desemprego ou mozo demandante do primeiro emprego, tal e como dispoñen as normas citadas.
Establécese un premio por fidelidade coas seguintes escalas:
De mutuo acordo entre ámbalas partes:
Ós 60 anos: 6 mensualidades de salario real.
Ós 61 anos: 4 mensualidades de salario real.
Ós 62 anos: 2 mensualidades de salario real.
Opción do traballador/a:
Ós 63 e 64 anos: 2 mensualidades de salario real.
Ós 65 anos: establécese un premio dunha mensualidade de salario real.
Co fin de contribuír á realización dunha política de promoción de emprego, a xubilación, para o persoal fixo de empresa, terá carácter de forzosa ó cumpri-la idade de 65 anos.
Aqueles traballadores que, ó chegaren a esta idade, non cumprisen o período mínimo de cotización á Seguridade Social para teren dereito á referida prestación, poderán continuar prestando servicios ata cumpriren o citado período de cotización, momento no que se causará baixa de maneira inmediata.
A empresa cubrirá o posto de traballo segundo necesidade do serivico, non tendo que ser coincidente a xornada efectiva de traballo do que se xubila coa do traballador entrante.
Ámbalas partes acordan a súa remisión á autoridade laboral para efectos do seu rexistro e posterior publicación no BOP e no Diario Oficial de Galicia.
Non habendo máis asuntos que tratar, levántase a sesión sendo as once e trinta horas do día arriba indicado.