O Pleno da Corporación do Concello de Santiago de Compostela, en sesión que tivo lugar o día 18 de outubro de 2002, tomou coñecemento do avance da revisión do Plan Xeral de Ordenación Municipal, no que se conteñen a estratexia, as directrices e os obxectivos xerais do plan, que van orientar-la súa redacción.

En cumprimento do esixido polo artigo 41.1º da Lei 1/1997, do 24 de marzo, do solo de Galicia, o avance sométese a información pública polo prazo dun mes, contado a partir do día seguinte ó da publicación deste anuncio no Diario Oficial de Galicia e nun xornal dos de maior circulación na provincia.

Durante este prazo, os interesados poderán consulta-lo documento na Oficina Municipal de Atención ó Cidadán, sita na praza da Trindade, e formular, mediante escrito dirixido ó presidente da corporación, as suxestións, propostas e convenios urbanísticos que coiden procedentes para orienta-la redacción do plan.

Así mesmo, o avance será exposto para consulta dos cidadáns no Colexio de Fonseca, desde o día 23 de outubro ata o 29 de novembro deste ano.

En todo caso, o período de información pública, para os efectos de presentación de suxestións, propostas e convenios, será dun mes contado desde o día seguinte ó da publicación deste anuncio no Diario Oficial de Galicia.

Santiago de Compostela, 18 de outubro de 2002.

Xosé A. Sánchez Bugallo

Alcalde