Por orde da Consellería de Industria e Comercio do 30 de abril de 2002 convocáronse as axudas correspondentes ó Programa de Tecnoloxías de Deseño e Producción Industrial, do Plan Galego de Investigación, Desenvolvemento e Innovación Tecnolóxica 2002-2005, de acordo coas bases aprobadas pola Orde do 29 de abril de 2002, da Consellería da Presidencia, Relacións Institucionais e Administración Pública.
No artigo 5 da orde de convocatoria establécese que para o libramento das subvencións concedidas será preciso presenta-los documentos requiridos para a súa xustificación antes do 31 de outubro do exercicio ó que correspondan.
Tendo en conta o atraso producido na resolución das devanditas axudas, motivado polo longo proceso de avaliación, considérase preciso amplia-lo prazo de xustificación dos gastos realizados no ano 2002 nos proxectos subvencionados ó abeiro da Orde do 30 de abril de 2002.
En consecuencia, no uso das atribucións que me foron concedidas,
DISPOÑO:
Artigo único.-Ampliar ata o día 18 de novembro de 2002 o prazo de presentación dos documentos necesarios para a xustificación dos gastos realizados no ano 2002 correspondentes ós proxectos subvencionados ó abeiro da Orde do 30 de abril de 2002 do Programa de Tecnoloxías de Deseño e Producción Industrial.
Santiago de Compostela, 15 de outubro de 2002.
Juan Rodríguez Yuste
Conselleiro de Industria e Comercio