Outorgada a declaración de utilidade pública que leva implícita a urxente ocupación dos bens e dereitos afectados polas instalacións do parque eólico

do Vilán, no concello de Camariñas (expediente 8/1999), por resolución da Consellería de Industria e Comercio do 13 de setembro de 2002 a favor da entidade beneficiaria Unión Fenosa Energías Especiales, S.A., con domicilio na rúa Betanzos, nº 1-1º esq., 15004 A Coruña.

Esta delegación acorda sinala-lo día 11 de novembro de 2002 para o levantamento das actas previas á ocupación, de conformidade cos artigos 52 da Lei de expropiación forzosa, do 16 de decembro de 1954, e 56 do seu regulamento, do 26 de abril de 1957, nas que se describirán os bens ou dereitos expropiables e de imposición de servidumes por producción e paso de enerxía eléctrica contidos na relación de predios que se expón xunto con esta resolución no taboleiro de edictos do Concello de Camariñas, deducida da que se someteu a información pública no Diario Oficial de Galicia, no BOP e no diario La Voz de Galicia de datas 1 de xullo, 8 de xullo e 27 de xuño de 2002, respectivamente; acto ó que deberán concorre-los propietarios propostos dos predios afectados, ós que se lles practicará notificación individual, sinalándose os horarios de toma de datos sobre o terreo e do levantamento efectivo das actas nas oficinas da referida casa consistorial.

Esta publicación realízase igualmente para os efectos do artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común, cando os titulares dos predios propostos sexan descoñecidos ou se ignore o lugar de notificación; e así, dirixir ó Ministerio Fiscal, as dilixencias que se produzan destes, de conformidade co artigo 5 da citada Lei de expropiación forzosa.

A Coruña, 30 de setembro de 2002.

Jesús Espada Martínez

Delegado provincial da Coruña