Dentro do Plan de Actividades da Escola Galega de Administración Pública para o 2002 e de acordo
coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración co Ministerio de Agricultura, Pesca e Alimentación e coa Asociación Española de Derecho Agrario, o I Congreso Nacional de Dereito Agrario Autonómico, convocatoria que se desenvolverá conforme as seguintes bases:
1. Obxectivos.
O MAPA ten como prioridade, na presente lexislatura, a elaboración do libro branco da agricultura e do desenvolvemento rural e quere facelo co máximo respecto e participación das comunidades autónomas.
O dereito agrario ten sido, e continúa sendo, o dereito da terra, polo cal os dereitos agrarios autonómicos elaborados na proximidade dos campos por homes que coñecen profundamente a problemática agraria, rural e ambiental de cada lugar, constitúe unha referencia obrigada e sumamente útil para ese libro branco.
O congreso convocado suporá, sen dúbida, unha achega sistemática de ideas e de normas, así como unha reflexión colectiva e plural de enorme valor para que as propostas do dito libro branco se axusten á moi variada realidade do agro español.
2. Contido.
Trataranse estes temas:
-O dereito agrario autonómico e o libro branco da agricultura e do desenvolvemento rural.
-O dereito agrario autonómico andaluz.
-O dereito agrario autonómico aragonés.
-O dereito agrario autonómico asturiano.
-O dereito agrario autonómico balear.
-O dereito agrario autonómico canario.
-O dereito agrario autonómico cántabro.
-O dereito agrario autonómico castelán-manchego.
-O dereito agrario autonómico castelán-leonés.
-O dereito agrario autonómico catalán.
-O dereito agrario autonómico estremeño.
-O dereito agrario autonómico galego.
-O dereito agrario autonómico rioxano.
-O dereito agrario autonómico murciano.
-O dereito agrario autonómico navarro.
-O dereito agrario autonómico vasco.
-O dereito agrario autonómico valenciano.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: o congreso convocado desenvolverase no salón de actos da EGAP (polígono das Fontiñas, rúa de Madrid, 2-4, Santiago de Compostela) os días 13, 14 e 15 de novembro de 2002.
5. Inscrición.
-Prazo: remata o luns, día 11 de novembro de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4 - 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por fax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obte-la confirmación da súa posible admisión, chamando por teléfono, o día 12 de novembro, das 8.30 ás 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do congreso, así como o de cancelalo, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste congreso, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
8. Retransmisión pola Internet.
As persoas interesadas en segui-lo desenvolvemento deste congreso pola Internet, poden facelo a través do seguinte enderezo: www.egap.xunta.es.
Santiago de Compostela, 7 de outubro de 2002.
Domingo Bello Janeiro
Director da Escola Galega de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA