Aprobado inicialmente pola Comisión de Goberno, en sesión do 22 de agosto de 2002, o proxecto técnico para a contratación da obra de abastecemento e auga: Obra, Sabrexo, S. Pedro, redactado polo enxeñeiro de camiños Alfonso Enríquez Moure, queda exposto ó público na Secretaría deste Concello, durante o prazo de quince días hábiles, -que empezarán a contarse desde o día seguinte ó da inserción do presente edicto no BOP-, para efectos de exame e reclamacións.

Na mesma sesión tamén se aprobaron os pregos de cláusulas administrativas que rexerán o citado concurso público, por procedemento aberto e urxente, da citada contratación, expoñéndose ó público por un prazo de quince días hábiles, para os efectos de que os interesados poidan examinalos e formula-las alegacións que consideren oportunas.

Á súa vez convócase licitación pública para a adxudicación da citada obra, que quedaría aprazada no suposto de presentarse reclamacións ó proxecto técnico ou ó prego de bases, restablecéndose o que reste a partir do día seguinte da resolución destas.

Obxecto: é a adxudicación, mediante concurso polo procedemento aberto e urxente, da obra de abastecemento e auga: Obra, Sabrexo, S. Pedro.

Tipo de licitación: é o seguinte: 86.696,34 euros.

Prazo de execución: 6 meses desde a notificación da adxudicación.

Garantía: a provisional establécese en 1.733,93 euros. A definitiva será igual ó 4% do importe da adxudicación.

Presentación de proposicións: presentaranse na Secretaría do Concello, de 9 a 13 horas, durante o prazo de 13 días naturais, contado a partir do día seguinte ó da publicación deste anuncio no BOP.

Apertura de plicas: terá lugar ás 9 horas do primeiro día hábil seguinte a aquel en que termine o prazo de presentación de proposicións. Se este fose sábado, terá lugar o primeiro día hábil seguinte.

Criterios de adxudicacióin: serán os fixados na correspondente cláusula do prego de condicións.

Modelo de proposición: o recollido na correspondente cláusula do prego de condicións. Os licitadores presentarán simultaneamente coa proposición e en sobre pechado os documentos que se indican na referida cláusula.

Gastos: serán por conta do adxudicatario os gastos dos anuncios así como tódolos derivados do contrato.

Vila de Cruces, 26 de agosto de 2002.

O alcalde presidente

Rubricado