Visto o texto do convenio colectivo da empresa Automóviles de Tuy, S.A., con nº de código 3600132, que tivo entrada nesta delegación provincial o día 17-7-2002, subscrito en representación da parte eco-
nómica pola representación da empresa, e da parte social, polo comité de empresa, en data 4-6-2002. De conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial
ACORDA:
Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Vigo, 8 de agosto de 2002.
P.A.
Luis Boullosa Nores
Secretario provincial de Pontevedra
Convenio colectivo da empresa
Automóviles de Tuy, S.A.
Artigo 1º.-Ámbito de aplicación.
Este convenio afectará a tódolos traballadores da empresa Automóviles de Tuy, S.A., así como a aqueles que entren ó servicio desta durante a súa vixencia.
Artigo 2º.-Ámbito persoal.
Estas normas obrigan a totalidade do persoal ocupado pola empresa, tanto se realizan función técnica como manual, agás unicamente aquelas persoas ás que alude o artigo 2 do vixente Estatuto dos traballadores. Tódolos conceptos salariais teñen carácter normativo e condición mínima indispensable.
Artigo 3º.-Compensación de melloras.
As condicións pactadas son compensables na súa totalidade coas que xa viñeran rexendo por mellora voluntaria concedida pola empresa.
Artigo 4º.-Absorción.
As melloras que por disposición legal ou regulamentaria poidan establecerse no futuro serán absorbibles polos acrecentamentos acordados neste convenio, sempre e cando superen os beneficios que se concedan no seu conxunto.
Artigo 5º.-Situacións persoais.
Respectaranse as situacións persoais que con carácter de cómputo anual excedan destas normas estrictamente ad personam.
Artigo 6º.-Duración, vixencia, prórrogas e denuncia.
Este convenio terá unha duración de dous anos.
A súa vixencia, para tódolos efectos, comezará con data do 1 de abril de 2002.
O convenio entenderase tacitamente prorrogado por períodos anuais, en tanto non sexa denunciado por calquera das partes, en forma e en data, e cunha anticipación mínima de treinta días ós seus respectivos vencementos, con traslado da denuncia á outra parte e no devandito prazo, axustándose en canto a esa materia se refira ó vixente Estatuto dos traballadores.
Artigo 7º.-Xornada de traballo.
A xornada de traballo ordinaria será de 1.826 horas e 27 minutos de traballo efectivo, non podendo realizar máis de 9 horas diarias e 40 semanais. Sen embargo, acórdase a distribución da xornada nos termos que se reflicten no cadro de quendas que se estableza, á marxe deste convenio (non formando parte del), de tal xeito que o posible exceso da xornada nalgunha quenda se poida compensar con outro de xornada inferior, de xeito que no cómputo trisemanal non se excedan as 40 horas de traballo efectivo, respectándose o criterio actual de descanso semanal existente coas adaptaciones necesarias para cumpri-la lexislación vixente.
Artigo 8º.-Organización do traballo.
A organización do traballo é facultade e responsabilidade da dirección da empresa.
Sen mingua desa facultade, a modificación das quendas ou establecemento doutras novas deberá ser negociada entre a dirección e o comité de empresa, podendo este último presentar propostas ou emitir informes ó respecto.
Se non se produce acordo entre as partes, a implantación dun novo sistema de traballo, (entendendo como tal a modificación substancial ou implantación de novas quendas), será facultade e decisión da dirección da empresa. Con independencia das accións xudiciais que lles poidan corresponder ós afectados, a dirección e o comité comprométense a non opoñerse en caso de que os afectados soliciten a intervención do AGA, ó abeiro do disposto no regulamento deste.
Artigo 9º.-Licencias.
No caso de matrimonio, as licencias serán de quince días naturais, aboándose co salario convenio.
Artigo 10º.-Permisos.
A empresa concederá permisos ó persoal segundo segue:
-Por intervención cirúrxica grave ou enfermidade grave do cónxuxe, fillos ou pais, 3 días.
-Por morte do cónxuxe, 4 días.
-Por morte de fillos, pais ou irmáns, 3 días.
-Por morte de avós, 2 días.
-Por morte de tíos carnais, afíns e consanguíneos, 1 día.
-Por matrimonio de fillos, irmáns ou pais, coincidindo co día da súa voda, 1 día.
-Por traslado do seu domicilio habitual, 1 día.
-Polo tempo necesario para o cumprimento dun deber inescusable de carácter público e persoal.
-Para funcións sindicais ós representantes do persoal: aplicarase o lexislado nesta materia.
No caso de morte ou enfermidade grave ou intervención cirúrxica grave do cónxuxe, pais ou fillos, a partir de 300 km, 1 día máis por cada viaxe.
Artigo 11º.-Vacacións.
Os traballadores afectados por este convenio desfrutarán dun período de vacacións anual de trinta días naturais e un día máis por cada oito anos de traballo.
No caso do que o traballador estea desfrutando vacacións e sexa chamado pola dirección para traballar durante un período non inferior a unha semana, o devandito traballador terá dereito a desfruta-lo período que lle reste de vacacións e un día máis, nas datas nas que segundo as necesidades de organización da empresa se fixen de común acordo co traballador.
O pagamento das vacacións farase efectivo no derradeiro día de traballo antes do comezo do desfrute, para aqueles traballadores que o soliciten cunha antelación mínima de cinco días. O resto dos traballadores percibirán o importe daquelas coa nómina de fin do mes.
Artigo 12º.-Horas extraordinarias estructurais.
Para efectos do previsto no Real decreto 92/1983, e na Orde do 1 de marzo do 1983, do Ministerio de Traballo e Seguridade Social, sobre cotización adicional de horas extraordinarias estructurais, consideraranse como tales as que se realicen con ocasión de accidentes ou para solucionar necesidades urxentes e premantes que veñan esixidas de inmediato polo servicio, as que obedecen a períodos punta de producción, ausencias imprevistas, cambios de quenda e outras circunstancias de carácter estructural derivadas da propia natureza da actividade do
transporte. A toma e deixa do servicio computarase adaptándose á ordenanza laboral de transportes por estrada.
A hora extraordinaria aboarase a 6,68 euros.
Artigo 13º.-Soldos e salarios.
Os soldos e salarios que corresponden ó persoal afectado por este convenio son os que figuran nas táboas anexas, máis antigüidade, se é o caso. Páctase o acrecentamento dos salarios, que terá efecto con data do 1 de abril de 2003, consistente no IPC que oficialmente se determine a 31 de decembro de 2002 correspondente ó dito ano de 2002.
Artigo 14º.-Gratificacións extraordinarias.
As gratificacións extraordinarias do ano aboaranse na contía de trinta días e serán calculadas sobre a táboa salarial que corresponde, máis a antigüidade, se é o caso. Denominaranse, 25 de xullo, Nadal e paga de marzo, e serán feitas efectivas antes do 22 de xullo, 22 de decembro e 15 de marzo, respectivamente.
Artigo 15º.-Conductores-perceptores.
O conductor-perceptor, cando desempeña ó mesmo tempo as funcións de conductor e cobrador, percibirá, ademais da remuneración correspondente á súa categoría, un complemento salarial por posto de traballo, igual ó 20% do seu salario base máis antigüidade, se é o caso, por tal cometido.
Artigo 16º.-Complemento de transporte e complemento de entrega de recadación.
Tal e como figura na táboa anexa, os traballadores da empresa terán dereito a percibir un complemento de transporte e entrega por recadación cotiá, na contía que se especifica en cada categoría profesional. Páctase o acrecentamento destes conceptos que terá efecto con data do 1 de abril de 2003, consistente no IPC que oficialmente se determine a 31 de decembro de 2002 correspondente ó dito ano de 2002.
Artigo 17º.-Axudas de custo.
Devengarán axudas de custo enteiras os que saian da súa residencia antes das 12 horas e regresen despois das cero horas.
Percibirase o importe correspondente ó xantar sempre que o traballador saia da súa residencia antes das 12 horas e volte despois das 14 horas.
O importe das axudas de custo será o que a continuación se reflicte:
Comida de servicios discrecionais: 9,62 euros.
Outras comidas e cea: 4,81 euros.
Pernoita: 11,41 euros.
Axuda de custos completa: 25,84 euros.
Os desprazamentos a Portugal e restantes países estranxeiros, gastos pagados, segundo xustificantes de facturas.
A empresa terá a facultade de asumi-lo pagamento do aloxamento e comida do traballador en substitución das axudas de custo.
Artigo 18º.-Traballos en domingos e festivos.
Os domingos e festivos aboaranse a 42,07 euros, salvo que a empresa de descanso compensatorio.
Artigo 19º.-Uniformes, roupa de traballo.
Todo persoal de movemento será dotado dun xersei cada ano, dous pantalóns, dúas camisas de manga longa e dúas de manga curta tamén cada ano, unha gravata cada dous anos e unha zamarra ou anorak cada cinco anos.
Ó persoal de taller dotaráselle de catro fundas de traballo ó ano e un par de botas de seguridade cada ano.
Ós lavacoches dotaráselles de botas, roupas de auga ou calquera outra peza necesaria para o desempeño da súa función.
A entrega de toda prenda nova esixirá, se é caso, a devolución da substituída.
Artigo 20º.-Retirada de carné de conducir.
No caso de que por infracción administrativa se produza a retirada do carné de conducir a un conductor por un período non superior a cento oitenta días, durante a vixencia do convenio, ben sexa conducindo un vehículo da empresa ou particular, e neste caso de vehículo particular, sempre que sexa á ida ou á volta do traballo, esta comprométese a facilitarlle ó conductor afectado o posto de traballo máis axeitado, de acordo á súa categoría profesional, sempre que non proceda como consecuencia de alcoholemia e/ou consumo de drogas.
Artigo 21º.-Pagamento de multas.
As multas por infraccións de tráfico imputables á culpa ou imprudencia do traballador serán aboadas por este. No caso de que a infracción sexa imputable á empresa, será aboada por esta.
Artigo 22º.-Seguros de accidente laboral.
No caso de falecemento do traballador por accidente laboral ó servicio da empresa, esta comprométese a aboarlle ó traballador, ben directamente ou por medio dunha compañía de seguros coa que contrate unha póliza que cubra o dito risco, a contía de 4.207,08 euros.
Se a consecuencia de accidente laboral ó servicio da empresa, a comisión médica cualificadora da Seguridade Social determina a incapacidade permanente absoluta ou a grande invalidez do traballador, a empresa comprométese a lle aboar nas mes
mas condicións do parágrafo anterior, a contía de 15.656,31 euros ó devandito traballador.
Artigo 23º.-Incapacidade temporal.
Nas situacións de incapacidade temporal derivadas de accidente de traballo, a empresa completará cun máximo de tres meses, contados desde a data da baixa, a prestación económica da Seguridade Social ata o importe íntegro do salario do convenio.
Nas situacións de incapacidade temporal derivadas de accidente de traballo que motive hospitalización, a empresa completará, polo tempo que dure a hospitalización, e cun máximo de seis meses, incluíndo o período de tres meses citado no parágrafo anterior, a prestación económica da Seguridade Social ata o importe íntegro do salario do convenio.
Nas situacións de incapacidade temporal derivadas de enfermidade común que motive hospitalización, a empresa completará, polo tempo que dure a hospitalización, e cun máximo de seis meses, a prestación económica da Seguridade Social ata o importe íntegro do salario do convenio.
Artigo 24º.-Xubilación.
1. A empresa e traballadores poderán pactar, previa a existencia de común acordo por ámbalas dúas partes, xubilacións anticipadas ós 64 anos, de conformidade co disposto no Real decreto 1194/1985, do 14 de xullo, debendo a empresa substituílos simultaneamente ó seu cesamento por xubilación por outros traballadores nas condicións previstas no devandito real decreto.
2. O traballador que se xubile anticipadamente, sempre que leve ó servicio da empresa un mínimo de cinco anos ininterrompidos, percibirá desta un premio por xubilación, segundo a táboa seguinte:
Ós 60 anos: 8.414,17 euros.
Ós 61 anos: 6.611,13 euros.
Ós 62 anos: 4.808,10 euros.
Ós 63 anos: 2.103,54 euros.
Ós 64 anos: 1.502,53 euros.
Percibiráse a cantidade correspondente á idade de xubilación anticipada segundo a táboa anterior sempre que a dita xubilación se realice dentro do prazo de tres meses desde que o traballador cumpra a idade. De superarse este prazo, a contía será a seguinte inferior.
No suposto de que durante a vixencia do convenio se reducira a idade de xubilación, a escala da táboa anterior reduciríase tamén, co obxecto de que os 8.414,17 euros se percibiran cinco anos antes da idade regulamentaria e correlativamente as demais contías ata chegar ós 1.502,53 euros que se percibirían un ano antes da idade regulamentaria.
Esta contía será independente da liquidación que por cesamento lle corresponda ó traballador.
Este premio non o percibirá o traballador que se acolla ó estabelecido no punto 1 deste artigo sobre xubilación anticipada segundo o Real decreto 1194/1985, do 14 de xullo.
Artigo 25º.-Acción sindical.
Neste punto haberá que aterse ó disposto no Estatuto dos traballadores.
Artigo 26º.-Cota sindical.
Por requirimento individual dos traballadores afiliados a seccións sindicais legalmente constituídas, a empresa descontará da nómina mensual dos traballadores o importe da cota sindical correspondente. O traballador en tal operación remitiralle á dirección da empresa ou ó comité un escrito no que se exprese a súa conformidade.
Artigo 27º.-Modalidades de contratación.
Contrato para o fomento da contratación indefinida.
Co obxecto de facilita-la colocación estable dos empregados suxeitos a contratos temporais, a dirección da empresa poderá converter estes en contratos para o fomento da contratación indefinida no que o réxime xurídico e efectos serán os que establece a disposición adicional primeira da Lei 63/1997, do 26 de decembro.
Artigo 28º.-Lexislación subsidiaria.
En todo o non expresamente previsto neste convenio, haberá que aterse ó disposto na extinguida ordenanza laboral de transportes por estrada mentres non sexa substituída por convenio nacional, así como na lexislación laboral e demais disposicións legais vixentes.
Artigo 29º.-Comisión paritaria.
Para a interpretación e cumprimento das cláusulas deste convenio, e en xeral para entender en cantas cuestións deriven da súa aplicación, establécese unha comisión paritaria integrada por un número igual de representantes económicos e do comité de empresa asinantes do convenio. A comisión devandita elixirá o presidente desta, que non poderá ser membro do devandito órgano.
Artigo 30º.-Partes asinantes.
Este convenio foi asinado polo director xerente da empresa, en representación da parte económica e polos membros do comité de empresa, en representación da parte social.
Este convenio redáctase en galego e castelán.
Disposición adicional
Unha vez extinguido o prazo de validez deste convenio, se no prazo de dous meses non se chegase
a un acordo para a sinatura dun novo convenio de empresa, as partes comprométense a negocia-lo pase ó convenio provincial de transporte de viaxeiros.
Táboa de salarios
transporte recadación
Categorías Pesetas Compl.
Compl. entrega
segundo idade
segundo idade
* Persoal administrativo Oficial de primeira 666,77 mes 39,32 mes --- Oficial de segunda 620,84 mes 39,32 mes --- Auxiliar administrativo 584,44 mes --- --- Aspirante Sal. mín.
---
* Persoal de movemento Inspector 22,74 día 39,32 mes --- Conductor 22,37 día 39,32 mes --- Conductor-perceptor 22,37 día 39,32 mes 14,79 mes Cobrador 19,43 día 39,32 mes 14,79 mes
* Persoal de taller Xefe de taller 837,31 mes 39,32 mes --- Oficial de primeira 22,96 día 39,32 mes --- Oficial de segunda 22,37 día 39,32 mes --- Oficial de terceira 21,54 día 39,32 mes --- Mozo de taller 18,83 día 39,32 mes --- Aprendices Sal. mín.
Lavacoches 631,06 mes 39,32 mes --- Vendedor de billetes 615,90 mes --- ---