De conformidade co establecido na disposición adicional quinta da Lei 5/2000, do 28 de decembro, do Parlamento de Galicia, de medidas fiscais e de réxime orzamentario e administrativo, esta consellería, no uso das competencias que lle atribúe a Lei 4/1988, do 26 de maio, da función pública de Galicia segundo a redacción que lle deu a Lei 4/1995, do 10 de abril (DOG nº 76, do 20 de abril), así como do disposto no Decreto 200/2002, do 6 de xuño, polo que se aproba a oferta de emprego público correspondente a diversas prazas de corpos e escalas de Administración xeral da Comunidade Autónoma de Galicia para o ano 2002,

DISPÓN:

Convoca-lo proceso selectivo para o acceso a escala de profesores do Instituto Nacional de Educación Física de Galicia (INEF-Galicia), no corpo superior -grupo A- de Administración xeral da Xunta de Galicia e que ten como competencias as propias da función docente establecidas para o profesorado na Lei orgánica 6/2001, do 21 de decembro, de universidades, segundo o previsto na Lei 5/2000, do 28 de decembro, do Parlamento de Galicia, con suxeición ás seguintes,

Bases da convocatoria.

I. Normas xerais.

I.1. O obxecto do proceso selectivo é a cobertura de 22 prazas da Administración da Xunta de Galicia, da escala de profesores do Instituto Nacional de Educación Física (INEF) de Galicia vacantes, prevista no punto 3 da disposición adicional quinta da Lei 5/2000 do Parlamento de Galicia, que establece o sistema de concurso-oposición de acceso libre para o proceso selectivo, que se celebrará publicamente, ofertándose os postos vacantes.

O proceso selectivo rexerase por esta convocatoria, e no non previsto nela, aplicaranse de xeito integrado a normativa de carácter xeral en materia da función pública, tanto estatal como autonómica e, no que proceda, na normativa vixente de aplicación.

I.2. Especificacións dos postos docentes para efectos do proceso selectivo.

Os códigos e as denominacións de cada un dos 22 postos docentes da escala de profesores do INEF de Galicia, e as especificacións das actividades docentes, para efectos do proceso selectivo, atópanse desenvolvidas no anexo I. A existencia de especificacións en ningún caso supón unha limitación engadida para quen obteña a praza, un dereito de vinculación exclusiva a esa actividade docente, nin limitación da competencia da Xunta de Galicia, ou órgano competente que a substitúa, para asignarlle distintas obrigas docentes ou de investigación.

I.3. Requisitos dos candidatos.

I.3.1. Para ser admitidos á realización das probas selectivas os aspirantes deberán reuni-los seguintes requisitos.

I.3.1.1. Ser español ou nacional dun Estado membro da Unión Europea, ou nacional do Reino de Noruega, ou nacional da República de Islandia.

Tamén poderá participa-lo cónxuxe, e descendentes do cónxuxe, dos españois e dos nacionais de países membros da Unión Europea, de Noruega ou de Islandia, sempre que non estean separados de dereito, menores de vinteún anos ou maiores da dita idade que vivan ás súas expensas.

Este último beneficio será igualmente de aplicación a familiares de nacionais doutros estados cando así se prevexa nos tratados internacionais celebrados pola Comunidade Europea e ratificados por España.

I.3.1.2. Estar en posesión do título de licenciado, enxeñeiro ou arquitecto.

I.3.1.3. Non estar separado do servicio de ningunha Administración pública en virtude de expediente disciplinario nin estar inhabilitado por sentencia firme para o exercicio de funcións públicas.

I.3.1.4. Ter cumpridos os dezaoito anos.

I.3.1.5. Non padecer enfermidade nin estar afectado por limitación física ou psíquica que sexa incompatible co desempeño das correspondentes funcións.

I.3.2. Tódolos requisitos enumerados na base 1.3.1. deberán posuírse no día da finalización do prazo de presentación de solicitudes.

I.4. Solicitudes e documentación.

I.4.1. Os que desexen tomar parte no proceso selectivo deberán facelo constar mediante instancia que se axustará ó modelo que se publica como anexo II desta convocatoria. Á instancia xuntarase fotocopia

do documento nacional de identidade e xustificante de ter aboados os dereitos de exame, expedido pola entidade bancaria correspondente. Para o cumprimento deste requisito poderase utilizar unha fotocopia do documento correspondente que como anexo III forma parte desta convocatoria.

De conformidade co disposto no artigo 31.un da Lei 2/2002, do 29 de abril, de orzamentos xerais da Comunidade Autónoma de Galicia para o ano 2002, que modifica o punto 03 do artigo 18 do Decreto lexislativo 1/1992, do 11 de abril, polo que se aproba o texto articulado das bases contidas no capítulo 3 do título II da Lei 13/1991, do 9 de decembro, de taxas, prezos e exaccións reguladoras da Comunidade Autónoma de Galicia, como requisito necesario para participar no proceso selectivo, deberase aboar previamente en concepto de dereitos de exame o importe de 47,54 A e, de se-lo caso, os gastos de transferencia correspondentes, utilizando para iso o impreso de autoliquidación sinalado no anexo III. Este impreso facilitaráselles ós interesados no rexistro xeral da Consellería da Presidencia, Relacións Institucionais e Administración Pública, nos das súas delegacións provinciais, e nas oficinas comarcais da Xunta de Galicia; debendo cubrirse cos códigos que figuran no referido anexo III.

Non obstante ó anterior, para o cumprimento deste requisito poderase utilizar unha fotocopia do documento correspondente que como anexo forma parte desta convocatoria. Estarán exentos do pagamento das taxas por dereitos de inscrición os que posúan unha discapacidade igual ou superior ó 33%, circunstancia que deberá ser acreditada documentalmente xunto coa instancia, presentando copia cotexada da cualificación de minusvalidez.

A non presentación do xustificante do ingreso das taxas, no que figure o selo da entidade bancaria, determinará a exclusión do aspirante. En ningún caso a presentación deste xustificante suporá a substitución do trámite de presentación, en tempo e forma, da solicitude.

O importe aboado en concepto de dereitos de exame devolveráselle, logo dos trámites correspondentes, ós aspirantes excluídos que o soliciten no prazo dun mes contado a partir do día seguinte ó da publicación no Diario Oficial de Galicia da resolución definitiva da Dirección Xeral da Función Pública á que fai referencia o punto terceiro da base I.5.2.

I.4.2. A presentación de solicitudes farase no rexistro xeral da Consellería da Presidencia, Relacións Institucionais e Administración Pública, no das súas delegacións provinciais, oficinas comarcais da Xunta de Galicia e oficinas de correos, así como nos lugares previstos no artigo 38 da Lei de réxime xurídico das administracións públicas e do procedemento administrativo común no prazo de vinte días naturais, computados a partir do seguinte ó da publicación desta convocatoria no Diario Oficial de Galicia e

dirixiranse á directora xeral da Función Pública da Consellería da Presidencia, Relacións Institucionais e Administración Pública.

As solicitudes subscritas no estranxeiro poderanse cursar, no prazo expresado no parágrafo anterior, a través das representacións diplomáticas ou consulares españolas correspondentes, que as remitirán seguidamente ó organismo competente.

I.4.3. Na solicitude os aspirantes deberán indica-lo código, denominación e actividades do posto docente correspondente a praza pola que opta.

O aspirante entregará, xunto coa solicitude:

-Currículo e documentos acreditativos do consignado nel, en orixinal ou copia debidamente compulsada, e un exemplar das publicacións consignadas no currículo.

-Proxecto docente, por quintuplicado, que o candidato propón desenvolver de serlle adxudicada a praza á que concursa; coas especificacións fixadas no anexo I.

I.5. Admisión de aspirantes.

I.5.1. Expirado o prazo de presentación de instancias, a directora xeral da Función Pública dictará resolución de conformidade co establecido no artigo 12 do Regulamento de selección de persoal da Administración da Comunidade Autónoma de Galicia, que se publicará no Diario Oficial de Galicia así como oportunamente nos lugares determinados pola normativa vixente, na que se declarará aprobada a lista de admitidos e excluídos, así como as causas da súa exclusión e a indicación do lugar no que están expostas as listas de admitidos. Na lista deberán constar, en todo caso, os apelidos, nome e número do documento nacional de identidade.

I.5.2. Os aspirantes excluídos disporán dun prazo de dez días, contados a partir do seguinte ó da publicación da resolución, para poder emendar, se é o caso, o defecto que motivase a exclusión.

Para tal efecto a estimación ou desestimación das peticións de emendas entenderase implícita na resolución pola que se publique a lista definitiva.

Unha vez transcorrido o dito prazo, a Dirección Xeral da Función Pública dictará resolución definitiva, contra a que se poderá interpoñer recurso contencioso-administrativo, perante o Tribunal Superior de Xustiza de Galicia no prazo de dous meses contados a partir do día seguinte ó da súa publicación.

O feito de figurar na relación de admitidos non prexulga que se lles recoñeza ós interesados a posesión dos requisitos esixidos no procedemento que se convoca. Cando da documentación que debe presentarse, no caso de supera-lo proceso selectivo, se desprenda que non posúen algún dos requisitos, os interesados decaerán en tódolos dereitos que pui

desen derivarse da súa participación no procedemento.

II. Concurso-oposición.

II.1. Procedemento xeral.

O procedemento establécese tendo en conta o disposto pola disposición adicional quinta da Lei 5/2000 do Parlamento de Galicia, que determina que a convocatoria se adaptará á normativa vixente sobre acceso do profesorado universitario ó Decreto 95/1991, do 20 de marzo da Xunta de Galicia, que aproba o Regulamento de selección de persoal da Administración da Comunidade Autónoma de Galicia, e demais normativa vixente de aplicación.

II.1.1. O concurso-oposición a que se refire esta orde realizarase onde determine o tribunal que xulga as prazas.

II.1.2. Dentro do prazo habilitado regulamentariamente para a constitución do tribunal, o presidente dictará unha resolución, que deberá ser publicada cunha antelación mínima de quince días naturais respecto da data do acto para o que se cita, convocando a tódolos aspirantes admitidos para a realización da primeira proba da fase de oposición, indicando o día, lugar e hora desta.

II.1.3. En calquera momento os aspirantes poderán ser requiridos polo tribunal correspondente coa finalidade de acredita-la súa personalidade.

II.1.4. Os aspirantes serán convocados para cada exercicio en único chamamento, sendo excluído da oposición quen non compareza, podéndose considera-los casos de forza maior, debidamente xustificados e libremente apreciados polo tribunal, para os efectos dun posterior chamamento.

II.1.5. A publicación dos sucesivos anuncios da celebración da fase de oposición será efectuada polo tribunal no lugar onde se celebrou o anterior exercicio, nos taboleiros de anuncios da consellería e nos das súas delegacións territoriais, e por calquera outro medio, se se xulga conveniente, para facilita-la súa máxima divulgación, con vintecatro horas, polo menos, de antelación á sinalada para a súa iniciación. Cando se trate de distintas partes da mesma fase, o anuncio será publicado nos locais onde se celebrase, e nalgún outro medio se se xulga conveniente con doce horas, polo menos, de antelación.

II.1.6. En calquera momento do proceso selectivo, se o tribunal tivera coñecemento de que algún aspirante non cumpre algún dos requisitos esixidos pola presente convocatoria, logo da audiencia ó interesado, deberá acorda-la súa exclusión, se procede.

Contra tal acordo poderase interpoñer recurso de alzada conforme o previsto no artigo 114 da Lei de réxime xurídico das administracións públicas e do procedemento administrativo común.

II.1.7. Rematado o proceso selectivo, o tribunal publicará a relación de aspirantes que o superen.

II.2. Fase de concurso.

Consistirá na valoración dos méritos alegados por cada concursante de acordo co baremo publicado no anexo IV, cunha puntuación máxima de 20 puntos. O concurso terá carácter eliminatorio, sendo necesario obter unha puntuación mínima de 12 puntos.

II.3. Fase de oposición.

A fase de oposición constará de dúas probas, cunha puntuación máxima de 40 puntos cada unha delas:

II.3.1. A primeira proba consistirá na exposición oral do proxecto docente presentado polo concursante, durante un tempo máximo de corenta e cinco minutos. O tribunal poderá debater co concursante, durante un tempo máximo de 1 hora, valorando a adecuación do proxecto ás necesidades da praza convocada. A proba terá carácter eliminatorio, sendo necesario obter un mínimo de 20 puntos.

II.3.2. A segunda proba consistirá na exposición oral polo concursante, durante un tempo máximo dunha hora, dun tema relativo a unha especialidade da área de coñecemento que corresponda ás actividades docentes especificadas en cada praza, elixido libremente por el. Seguidamente, o tribunal debaterá co concursante, durante un tempo máximo de corenta e cinco minutos, acerca dos contidos científicos expostos, a metodoloxía que vai utilizar na súa impartición ós alumnos e todos aqueles aspectos que estime relevantes en relación co tema. Para supera-la proba os concursantes deberán obter unha puntuación mínima de 20 puntos.

II.4. Cualificación global.

A cualificación global será a suma das puntuacións obtidas na fase de concurso e da oposición.

II.5. Tribunais.

II.5.1. Os tribunais cualificadores do proceso selectivo serán nomeados por orde da Consellería da Presidencia, Relacións Institucionais e Administración Pública.

II.5.1.2. Tendo en conta o disposto na disposición adicional quinta da Lei 5/2000, o previsto no Regulamento de selección do persoal da Administración da Comunidade Autónoma de Galicia, no convenio de adscrición do INEF de Galicia á Universidade da Coruña, e na normativa vixente de aplicación, cada tribunal constará de cinco membros coa seguinte composición:

Presidente:

Será proposto pola Consellería da Presidencia, Relacións Institucionais e Administración Pública, deberá ser funcionario e posuí-lo grao de doutor.

Vocais:

Un catedrático ou profesor titular de universidade, proposto polo rector da Universidade da Coruña.

Un membro en representación das organizacións sindicais, que deberá ser funcionario, estar en posesión do título de licenciado, enxeñeiro ou arquitecto e posuí-lo grao de doutor.

Un membro proposto pola Escola Galega de Administración Pública, en cumprimento do artigo 7 do Regulamento de selección de persoal da Administración da Comunidade Autónoma de Galicia, que deberá ser funcionario e posuí-lo grao de doutor.

Secretario:

Un funcionario proposto pola Consellería da Presidencia, Relacións Institucionais e Administración Pública.

Designarase o mesmo número de suplentes, coas mesmas características, e propostas.

II.5.1.3. O nomeamento como membro do tribunal é irrenunciable, salvo cando concorra causa xustificada ou algún dos motivos de abstención previstos no artigo 28 da Lei de réxime xurídico das administracións públicas e do procedemento administrativo común.

II.5.2. Os membros dos tribunais deberán absterse de intervir, notificándollo á directora xeral da Función Pública, cando concorran neles circunstancias das previstas no artigo 28 da Lei de réxime xurídico das administracións públicas e do procedemento administrativo común ou se realizasen tarefas de preparación de aspirantes a probas selectivas nos cinco anos anteriores á publicación desta convocatoria.

O presidente poderá solicitar dos membros do tribunal declaración expresa de non encontrarse incursos nas circunstancias previstas no artigo 28 da Lei de réxime xurídico das administracións públicas e do procedemento administrativo común.

Así mesmo, os aspirantes poderán recusa-los membros do tribunal cando concorran as circunstacias previstas na presente base.

II.5.3. A autoridade convocante publicará no Diario Oficial de Galicia resolución pola que se nomeen os novos membros do tribunal, que substituirán os que perdesen a súa condición por algunha das causas previstas na base II.5.2.

II.5.4. Logo da convocatoria do presidente, constituirase o tribunal. Á constitución deberá asistir a totalidade dos seus membros. A celebración da sesión de constitución terá lugar no prazo máximo de trinta días a partir da publicación do tribunal.

Na dita sesión, o tribunal, adoptará tódalas decisións que lle correspondan para o correcto desenvolvemento das probas selectivas.

II.5.5. A partir da sesión da constitución, o tribunal para actuar validamente, requirirá a presencia da maioría dos seus membros, titulares ou suplentes.

II.5.6. O procedemento de actuación do tribunal axustarase en todo momento ó disposto na Lei de réxime xurídico das administracións públicas e do procedemento administrativo común.

II.5.7. Por cada sesión do tribunal levantarase acta que, lida ó principio da sesión seguinte e feitas, se é o caso, as rectificacións que procedan, se autorizará coa sinatura do secretario e o visto e prace do presidente.

II.5.8. O tribunal poderá dispoñe-la incorporación ós seus traballos de asesores especialistas, co grao de doutor, para as probas correspondentes ós exercicios que coide pertinentes, limitándose estes asesores a presta-la súa colaboración nas súas especialidades técnicas. A designación de tales asesores deberá comunicárselle á directora xeral da Función Pública da Consellería da Presidencia, Relacións Institucionais e Administración Pública.

II.5.9. O tribunal cualificador adoptará as medidas precisas naqueles casos en que resulte necesario, de forma que os aspirantes con discapacidades gocen de similares condicións para a realización dos exercicios co resto dos demais participantes. Neste sentido estableceranse, para as persoas con discapacidades que o soliciten na forma prevista as adaptacións posibles en tempos e medios para a súa realización.

Se na súa realización se lle suscitasen dúbidas ó tribunal respecto da capacidade do aspirante para o desempeño das actividades habitualmente desenvolvidas polos funcionarios do corpo ó que opta, poderán solicita-lo correspondente dictame do órgano competente.

II.5.10. Os tribunais que actúen neste proceso selectivo terán a categoría primeira das recollidas no Decreto 144/2001, do 7 de xuño.

O número máximo de sesións de cada un dos tribunais será fixado por resolución da Dirección Xeral da Función Pública, podendo só amplia-lo número delas, con base en causa xustificada, a dita dirección xeral.

II.5.11. En ningún caso o tribunal poderá aprobar nin declarará que superaron o proceso selectivo un número de aspirantes superior ó de prazas convocadas. Calquera proposta de aprobados que contraveña o establecido será nula de pleno dereito.

II.5.12. As comunicacións que formulen os aspirantes ó tribunal dirixiranse á Consellería da Presidencia, Relacións Institucionais e Administración Pública, Dirección Xeral da Función Pública (edificio administrativo San Caetano-Santiago de Compostela).

III. Lista de aprobados.

III.1. Rematadas as fases de concurso e de oposición, o tribunal fará públicas no Diario Oficial de Galicia, nos taboleiros de anuncios da Consellería da Presidencia, Relacións Institucionais e Administración Pública, nos das súas delegacións territoriais e naqueles outros que coide oportuno, as relacións independentes de aspirantes que superaron o proceso selectivo, por orde de puntuacións acadadas, con indicación do seu documento nacional de identidade.

O presidente do tribunal enviaralle proposta conxunta de ámbalas dúas listas de aprobados á directora xeral da Función Pública, especificando, igualmente, o número de aprobados en cada unha das fases.

IV. Presentación de documentos e nomeamento de funcionarios.

IV.1. Os que dentro do prazo fixado, e salvo os casos de forza maior, non presentasen a documentación prevista no artigo 30 da Lei da función pública de Galicia ou do exame dela se deducise que carecen dalgún dos requisitos sinalados na base I.3. non poderán ser nomeados funcionarios de carreira, segundo corresponda, e quedarán anuladas as súas actuacións, sen prexuízo da responsabilidade na que incorresen por falsidade na solicitude inicial.

IV.2. Rematado o proceso selectivo, os que o superasen serán nomeados funcionarios de carreira mediante unha resolución do conselleiro da Presi

dencia, Relacións Institucionais e Administración Pública, que se publicará no Diario Oficial de Galicia.

IV.3. A toma de posesión dos aspirantes aprobados será efectuada no prazo dun mes, contado a partir da data de publicación do seu nomeamento no Diario Oficial de Galicia, de conformidade coas disposicións previstas na Lei 4/1988, do 26 de maio, da función pública de Galicia, modificada polas leis 4/1991, do 8 de marzo e 3/1995, do 10 de abril, e demais normas concordantes.

V. Norma derradeira.

Contra esta orde, que pon fin á vía administrativa, poderase interpoñer recurso potestativo de reposición ante esta consellería, no prazo dun mes contado desde o día seguinte ó da súa publicación no Diario Oficial de Galicia, de conformidade co establecido na Lei 30/1992, do 26 de novembro, ou poderase impugnar directamente ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados desde a mesma data, segundo o artigo 8.2º en conexión co artigo 10.1º da Lei 29/1998, do 13 de xullo, reguladora da xurisdicción contencioso-administrativa.

Santiago de Compostela, 7 de agosto de 2002.

Jaime Pita Varela

Conselleiro da Presidencia, Relacións Institucionais

e Administración Pública

ANEXO I

Código do posto	Denominación do posto	Actividades docentes especificadas Disciplinas do plan de estudios conducente ó título de licenciado en ciencias da actividade física e do deporte (BOE nº 272, do 13 de novembro de 2000)	Áreas de coñecemento vinculadas

PR.P49.40.101.15570.094	Profesor/a Didáctica da expresión corporal	Nº 1 Expresión corporal e danza (T).	Educación física e deportiva. Didáctica da expresión corporal. Psicoloxía educativa e da educación.
PR.P49.40.101.15770.095	Profesor/a Didáctica da expresión corporal	Nº 2 Educación física de base (T).	Educación física e deportiva. Didáctica da expresión corporal. Psicoloxía educativa e da educación.
PR.P49.40.101.15570.092	Profesor/a Didáctica da expresión corporal	Nº 3 Pedagoxía da actividade física e do deporte (OB). Practicum coordinación ámbito: E.F. escolar (T). Reeducación psicomotriz.(O).	Educación física e deportiva. Didáctica da expresión corporal e tódalas relacionadas no practicum.
PR.P49.40.101.15570.070	Profesor/a Educación física e deportiva	Nº 4 Habilidades acuáticas (T). Natación e a súa didáctica (O). Waterpolo e a súa didáctica (O). Mestría en natación I e II (O).	Educación física e deportiva. Didáctica da expresión corporal.

PR.P49.40.101.15570.018	Profesor/a Educación física e deportiva	Nº 5 Habilidades atléticas (T). Atletismo e a súa didáctica (O). Mestría en atletismo (resistencia e lanzamentos) I e II (O). Mestría en atletismo (velocidade e saltos) I e II (O).	Educación física e deportiva. Didáctica da expresión corporal.

Código do posto	Denominación do posto	Actividades docentes especificadas Disciplinas do plan de estudios conducente ó título de licenciado en ciencias da actividade física e do deporte (BOE nº 272, do 13 de novembro de 2000)	Áreas de coñecemento vinculadas

PR.P49.40.101.15570.017	Profesor/a Educación física e deportiva	Nº 6 Habilidades ximnásticas (T). Ximnasia e a súa didáctica (O). Mestría en ximnasia I (O). Mestría en ximnasia artística II (O).	Educación física e deportiva. Didáctica da expresión corporal.
PR.P49.40.101.15570.074	Profesor/a Educación física e deportiva	Nº 7 Fundamentos da iniciación deportiva (OB). Mestría en rugby I e II (O).	Educación física e deportiva. Didáctica da expresión corporal.
PR.P49.40.101.15570.014	Profesor/a Educación física e deportiva	Nº 8 Habilidades de esvaramento-rodas: patín, monopatín,... e a súa didáctica (OB). Mestría en hockey a patins I e II (O).	Educación física e deportiva. Didáctica da expresión corporal.
PR.P49.40.101.15570.075	Profesor/a Educación física e deportiva	Nº 9 Vela e a súa didáctica (O). Mestría en deportes náuticos I e II (O).	Educación física e deportiva. Didáctica da expresión corporal.
PR.P49.40.101.15570.081	Profesor/a Educación física e deportiva	Nº 10 Habilidades en loita (T). Judo e a súa didáctica (O). Mestría en judo I e II (O).	Educación física e deportiva. Didáctica da expresión corporal.
PR.P49.40.101.15570.016	Profesor/a Educación física e deportiva	Nº 11 Habilidades en loita (T). Judo e a súa didáctica (O). Mestría en judo I e II (O).	Educación física e deportiva. Didáctica da expresión corporal.
PR.P49.40.101.15570.060	Profesor/a Educación física e deportiva	Nº 12 Voleibol e a súa didáctica I (T). Voleibol e a súa didáctica II (O). Mestría en voleibol I e II (O).	Educación física e deportiva. Didáctica da expresión corporal.
PR.P49.40.101.15570.062	Profesor/a Educación física e deportiva	Nº 13 Fútbol e a súa didáctica I (T). I Fútbol e a súa didáctica II (O). Mestría en fútbol I e II (O).	Educación física e deportiva. Didáctica da expresión corporal.
PR.P49.40.101.15570.061	Profesor/a Educación física e deportiva	Nº 14 Balonmán e a súa didáctica I (T). Balonmán e a súa didáctica II (O). Mestría en balonmán I e II (O).	Educación física e deportiva. Didáctica da expresión corporal.
PR.P49.40.101.15570.078	Profesor/a Educación física e deportiva	Nº 15 Fútbol e a súa didáctica I (T). II Fútbol e a súa didáctica II (O). Mestría en fútbol I e II (O).	Educación física e deportiva. Didáctica da expresión corporal.
PR.P49.40.101.15570.077	Profesor/a Educación física e deportiva	Nº 16 Espacios e equipamentos lúdico-deportivos (T). Modelos de planificación e xestión (T). Análise comparado de políticas deportivas (O).	Educación física e deportiva. Organización de empresas. Proxectos arquitectónicos.
PR.P49.40.101.15570.080	Profesor/a Educación física e deportiva	Nº 17 Deporte e recreación (T). Marketing deportivo e medios de comunicación (O).	Educación física e deportiva. Comercialización e investigación de mercados.
PR.P49.40.101.15570.055	Profesor/a Educación física e deportiva	Nº 18 Habilidades de esvaramento -táboas en auga- e a súa didáctica (OB). Actividades no medio natural (T).	Educación física e deportiva. Didáctica da expresión corporal.
PR.P49.40.101.15570.069	Profesor/a Educación física e deportiva	Nº 19 Informática aplicada á intervención educativa (O). Informática aplicada ó rendemento deportivo (O). Informática aplicada á xestión deportiva (O). Procedemento de imaxe da técnica e/ou táctica (O)	Educación física e deportiva. Ciencia da computación e intelixencia artificial.
PR.P49.40.101.15570.063	Profesor/a Educación física e deportiva	Nº 20 Actividade física adaptada (T). Actividade física e disfuncións (O).	Educación física e deportiva. Fisioterapia.
PR.P49.40.101.15570.072	Profesor/a Educación física e deportiva	Nº 21 Investigación en actividade física e deporte (OB). Metodoloxía de investigación aplicada (O). Actividade física para persoas maiores de 60 anos (O).	Educación física e deportiva. Metodoloxía da ciencia do comportamento. Estatística e investigación operativa. Fisioterapia.
PR.P49.40.101.15570.082	Profesor/a Educación física e deportiva	Nº 22 Prevención de lesións e readaptación física (O). Valoración postural e artromuscular (O).	Educación física e deportiva. Fisioloxía. Ciencias morfolóxicas. Fisioterapia.

ANEXO IV

Méritos valorables na fase de concurso

1. Actividade docente en ensino superior (máximo 12 puntos)
-Servicios prestados en posto de traballo idéntico ó convocado, na Xunta de Galicia, por cada ano ou fracción superior a 6 meses-Servicios prestados en posto de traballo idéntico ó convocado, noutras administracións, por cada ano ou fracción superior a 6 meses-Impartición de programas de doutoramento, cada crédito impartido ou dirixido-Impartición en programas de posgraduación, seminario ou curso monográfico de recoñecemento universitario, por cada crédito impartido ou dirixido.	2 puntos 1 punto 0,25 puntos 0,05 puntos
2. Actividade investigadora e producción científica (máximo 6 puntos)
2.1. Actividade investigadora
-Posuí-lo grao de doutor-Investigador en proxecto de investigación financiado polas administracións públicas	2 punto 1 punto
2.2. Publicacións
-En revista con factor de impacto-En revista rexistrada en base de datos internacional-Libro científico como autor ou editor-Comunicación en libros de actas de congreso internacional de rango científico-Autor de capítulo de libro científico	1,50 puntos 0,50 puntos 0,40 puntos 0,35 puntos 0,30 puntos
2.3. Relatorios e comunicacións en congresos
-Relatorio encargado en congreso científico internacional ou nacional-Comunicación científica en congreso internacional-Comunicación científica en congreso nacional	0,50 puntos 0,40 puntos 0,25 puntos
3. Outros méritos (máximo 2 puntos)
3.1. Docencia noutros niveis educativos oficiais
-Servicios prestados en posto de traballo, na Xunta de Galicia, por cada ano ou fracción superior a 6 meses-Servicios prestados en posto de traballo noutras administracións, ou entidades recoñecidas, por cada ano ou fracción superior a 6 meses	0,50 puntos 0,25 puntos
3.2. Publicacións de ámbito profesional ou técnico
-Monografía, capítulo de libro, ou publicación audiovisual ou multimedia, de apoio á docencia universitaria.-Artigo en publicación periódica técnica-Publicación en libros de actas de congresos, xornadas ou simposiums profesionais ou técnicos	0,25 puntos 0,25 puntos 0,15 puntos
3.3. Exercicio profesional específico e formación permanente
-Estadía docente-investigadora noutro centro ou universidade, por cada 15 días-Exercicio profesional en ámbitos da actividade física e do deporte (agás docencia) por cada 6 meses-Membro de comités científicos en publicacións ou congresos internacionais-Títulos deportivos oficiais de nivel superior-Responsabilidades de xestión ou asistencia a actividades de formación, fomento, cooperación, encontro, visitas ou cursos de especialización científica ou universitaria, por mes acreditado-Asistencia a congreso científico-Responsabilidades de xestión académica no ámbito universitario por mes acreditado-Títulos propios universitarios: especialización, posgrao, ou máster, por cada crédito superado	0,15 puntos 0,10 puntos 0,05 puntos 0,05 puntos 0,05 puntos 0,05 puntos 0,01 puntos 0,01 puntos