O Decreto 306/2001, do 15 de decembro, polo que se establece a estructura orgánica da Xunta de Galicia, crea a Consellería de Asuntos Sociais como órgano da Administración autonómica ó que lle corresponde o exercicio das competencias e funcións en materia de política de servicios sociais.
Pola súa banda, o Decreto 310/2001, do 17 de decembro e o Decreto 402/2001, do 28 de decembro, de estructura orgánica da Consellería de Asuntos Sociais, crean a Dirección Xeral do Maior e de Persoas con Discapacidade como órgano superior da citada consellería.
A Orde do 16 de maio de 1995, modificada pola Orde do 8 de xullo de 2002, pola que se regula o establecemento de convenios de colaboración en materia de reserva e ocupación de prazas en centros residenciais e vivendas tuteladas para a terceira idade, establece a posibilidade de que estas poidan ofertar prazas para a súa reserva e ocupación, logo da sinatura do correspondente convenio.
A mesma orde no artigo 8.2º sinala que a Dirección Xeral do Maior e de Persoas con Discapacidade fixará anualmente o prazo para presentar solicitudes por parte das entidades interesadas na subscrición dos citados convenios, e o seu artigo 6 sinala que esta dirección xeral establecerá o custo máximo da praza/día ocupada.
Por todo isto, en uso das facultades que teño atribuídas,
RESOLVO:
Primeiro.-O prazo para presentar solicitudes para a formalización dos convenios ós que se refire a Orde do 16 de maio de 1995, modificada pola Orde do 8 de xullo de 2002, será de catro meses desde o día seguinte ó da publicación desta resolución no Diario Oficial de Galicia.
Segundo.-O custo máximo por praza/día ocupada nos centros/vivendas cos que a Consellería de Asuntos Sociais estableza convenios de reserva e ocupación de prazas durante o ano 2002 serán os seguintes:
-Prazas de persoas válidas: 23,30 euros/día.
-Prazas de persoas asistidas: 42,70 euros/día.
Terceiro.-As obrigas contraídas pola consellería para o financiamento das prazas conveniadas serán con cargo á aplicación orzamentaria 16.02.212.B.262, para a que se establece un crédito inicial de 44.972,61 euros.
Santiago de Compostela, 10 de xullo de 2002.
Armando González López
Director xeral do Maior e de Persoas
con Discapacidade