O Decreto 224/2002, do 20 de xuño, polo que se regula a hemodoazón e hemoterapia na Comunidade Autónoma de Galicia crea a Rede de hemodoazón e hemoterapia de Galicia, que actuará a tres distintos niveis: Centro de Transfusión de Galicia,

bancos de sangue hospitalarios e depósitos de sangue hospitalarios. A través destas unidades levaranse a cabo as distintas funcións da organización da hemoterapia, e en concreto, a obtención, preparación, conservación, almacenamento, tráfico e subministración do sangue e os seus compoñentes.

O gran incremento da actividade asistencial e a necesidade de cubrir tódalas necesidades dos hospitais galegos esixe unha organización hemoterápica eficaz que permita a promoción da doazón do sangue para acada-lo autoabastecemento mediante unha acción coordinada que aglutine tódolos medios humanos e materiais, públicos e privados, existentes na Comunidade Autónoma.

Por todo isto, os bancos e depósitos de sangue de Galicia quedan integrados na Rede de hemodoazón e hemoterapia da Galicia, unha vez sexan autorizados. Esta autorización levarase a cabo consonte o procedemento disposto no Decreto 77/2001, do 29 de marzo, sobre centros, servicios e establecementos sanitarios da Comunidade Autónoma de Galicia, e a Orde do 29 de marzo de 2001 que a desenvolve. Logo entón, dada a proximidade no tempo do procedemento recollido na devandita normativa reguladora de autorización de centros sanitarios, e en relación coa renovación dos bancos e depósitos de sangue, considérase axeitado simplificar e axiliza-los trámites do procedemento.

Por último, subliñar que, dado que o contido desta orde é aclaratorio do sentido no que debe ser interpretado o parágrafo 1º da disposición transitoria do Decreto 224/2002, e segundo a doutrina sinalada polo Tribunal Supremo respecto á retroactividade tácita das normas interpretativas e aclaratorias (entre outras, sentencias de 24 de maio de 1943, 23 de outubro de 1982 e 5 de xuño de 1996), a eficacia da presente orde retrotráese á entrada en vigor do devandito Decreto 224/2002.

En consecuencia, de acordo coas facultades que me confiren os artigos 34 e 38 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro,

DISPOÑO:

Artigo único.-Sen prexuízo do disposto no artigo 6 do Decreto 224/2002, do 20 de xuño, (DOG nº 127, do 3 de xullo) polo que se regula a hemodoazón e hemoterapia na Comunidade Autónoma de Galicia, e para os efectos do establecido no parágrafo 1º da súa disposición transitoria, considerarase que os bancos e depósitos de sangue terán renovada a autorización mediante a obtención do correspondente informe técnico e a conseguinte acta de conformidade coa normativa de aplicación, que se levará a cabo de oficio no prazo de seis meses recollido na devandita disposición transitoria.

Santiago de Compostela, 19 de xullo de 2002.

José María Hernández Cochón

Conselleiro de Sanidade