O Servicio Galego de Saúde, para mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos, de varias ambulancias propiedade del. Algúns deses vehículos, en virtude do tempo transcorrido, non son útiles na actualidade para a realización de labores de ambulancia e, de acordo co Decreto 42/1998, do 15 de xaneiro, polo que se regula o transporte sanitario, superan o tempo máximo establecido para o seu destino con fins sanitarios. Por todo isto, os concellos de Antas de Ulla, Lalín, Ordes, Paderne, Ponteareas, Rianxo e Tui solicitan a cesión dos vehículos que utilizan para seren destinados a outros fins que redunden no interese xeral do municipio.
Con este fin o Servicio Galego de Saúde tramitou o expediente de cesión dos ditos vehículos de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto).
Por todo o exposto, e en uso das facultades que me confire o artigo 38 da Lei 1/1983, do 22 de
febreiro, reguladora da Xunta e do seu presidente, reformada pola Lei 11/1988, do 20 de outubro,
DISPOÑO:
Artigo 1º
Acórdase a cesión de varios vehículos determinados no anexo a esta orde a favor dos concellos de Antas de Ulla, Lalín, Ordes, Paderne, Ponteareas, Rianxo e Tui.
Artigo 2º
A cesión queda sometida ás seguintes cláusulas:
a) Os bens cedidos destinaranse a fins de utilidade pública ou interese social do concello tal e como esixe o artigo 96 bis do Decreto 50/1989 e 35 bis da Lei 3/1985, do patrimonio da Comunidade Autónoma.
b) Coa cesión outorgaráselle ó concello a propiedade do vehículo, comprometéndose este a realizar ante a Xefatura Provincial de Tráfico os trámites precisos para o cambio da titularidade del.
c) Os bens cedidos destinaranse a outros fins de utilidade pública ou interese social do concello. O concello deberá proceder a retirar do vehículo todo anagrama ou rotulación que o puidese identificar como vehículo sanitario, así como a aboa-los gastos que puidese orixina-la transformación do dito vehículo.
Artigo 3º
A cesión formalizarase mediante acta subscrita polo director xeral da División de Recursos Económicos do Sergas e o órgano competente dos distintos concellos e deben constar nela o acordo de cesión e a aceptación do cesionario.
Disposición derradeira
O Servicio Galego de Saúde, a través de seu órgano competente, realizará os trámites necesarios para a efectividade de canto se dispón nesta orde.
Santiago de Compostela, 30 de maio de 2002.
José María Hernández Cochón
Conselleiro de Sanidade e presidente do Servicio
Galego de Saúde
ANEXO
Relación de vehículos:
VehículoMatrículaConcello
Nissan VanetteLU-4998-KAntas de Ulla
Nissan PracticC-2090-BGLalín
Renault 900 FLU-3232-SOrdes
Nissan VanetteC-1826-ATPaderne
Nissan SerenaC-1161-BLPonteareas
Nissan VanetteC-6138-BSRianxo
Renault TraficC-7259-BCTui