O Decreto 488/1997, do 26 de decembro (DOG do 20 de xaneiro de 1998) establece a estructura orgánica da Consellería de Familia e Promoción do Emprego, Muller e Xuventude.
A Resolución do 14 de setembro de 1998 (DOG do 22 de setembro) publica o acordo do Consello da Xunta de Galicia do 10 de setembro de 1998 polo que se aproba a relación de postos de traballo dos servicios periféricos da Consellería de Familia e Promoción do Emprego, Muller e Xuventude.
A entrada en vigor da Lei orgánica 5/2000, do 12 de xaneiro, reguladora da responsabilidade penal do menor supón para a Consellería de Familia e Promoción do Emprego, Muller e Xuventude, que é a competente na execución das medidas que se dicten ó abeiro desta lei, a reorganización dos recursos e da rede de centros de menores da propia consellería.
Neste sentido, por Orde do 3 de maio de 2002 (DOG do 7 de maio) autorízase o cesamento de actividades do centro de menores Xesús de Nazaret-Palavea (A Coruña) e polo Decreto 176/2002, do 10 de maio (DOG do 22 de maio) péchase o devandito centro.
Todo isto fai preciso modificar, por criterios organizativos e de xestión, a relación de postos de traballo
da Consellería de Familia e Promoción do Emprego, Muller e Xuventude adecuándose, así, ás necesidades reais e estructurais da citada consellería.
En consecuencia, por proposta do conselleiro da Presidencia, Relacións Institucionais e Administración Pública, oídas as organizacións sindicais presentes na Mesa Sectorial de Persoal Laboral da Comunidade Autónoma e a Comisión de Persoal, o Consello da Xunta de Galicia na súa reunión do día trece de xuño de dous mil dous, adoptou o seguinte
ACORDO:
Primeiro.-Modifica-la vixente relación de postos de traballo da Consellería de Familia e Promoción do Emprego, Muller e Xuventude, nos termos que se sinalan no anexo a este acordo.
Segundo.-Ordena-la publicación da dita modificación no Diario Oficial de Galicia para efectos da súa entrada en vigor a partir do día seguinte a ela.
Visto o acordo adoptado polo Consello da Xunta de Galicia na súa reunión do trece de xuño de dous mil dous, relativo á modificación da relación de postos de traballo da Consellería de Familia e Promoción do Emprego, Muller e Xuventude, coa finalidade de cumpri-lo dito acordo, dispoño que se publique no Diario Oficial de Galicia como anexo a esta resolución.
Santiago de Compostela, 13 de xuño de 2002.
Jaime Pita Varela
Conselleiro da Presidencia, Relacións Institucionais
e Administración Pública