A Deputación Provincial de Ourense, en sesión celebrada o día trinta de novembro de dous mil un, aprobou o proxecto de camiño veciñal Mugares-Toén, punto quilométrico 5,700 e, na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. Este informe tivo entrada no rexistro xeral da Consellería de Xustiza, Interior e Relacións Laborais o día vintecinco de abril de dous mil dous.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque, segundo sinala a deputación, a vía provincial Mugares-Toén é paso obrigado para os veciños de moitas parroquias da bisbarra e dos termos municipais de Bardabás e Cartelle, constituíndo por tanto unha importante vía de comunicación de carácter comarcal e intermunicipal, sendo necesaria a actuación en dous puntos da vía ó ser o largo da plataforma menor que no resto da estrada, o que provoca uns estrangulamentos perigosos tanto para o tránsito rodado como para os viandantes.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día dez de maio de dous mil dous,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, pola Deputación Provincial de Ourense, para efectos de expropiación forzosa, dos bens e dereitos concretados no expediente administrativo instruído para o efecto e necesarios para
a execución das obras do proxecto de camiño veciñal Mugares-Toén, punto quilométrico 5,700.
Santiago de Compostela, dez de maio de dous mil dous.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais
