O Pleno do Concello de Cospeito, en sesión do día 29 de xaneiro de 2002, adoptou o seguinte acordo:
Visto que o expediente de modificación foi aprobado inicialmente polo Pleno desta corporación en sesión celebrada o día 29 de maio de 2001 e sometido a información pública mediante anuncio publicado no DOG nº 122, do 24 de xuño, sen que se presentasen alegacións.
Visto que o proxecto de modificación recibiu informe favorable da Comisión Superior de Urbanismo de Galicia, en sesión do 4 de maio de 2001, para os efectos do disposto no artigo 51 da LSG, á vez que a Consellería de Política Territorial, Obras Públicas e Vivenda emitiu informe previo á aprobación inicial con data do 7 de maio 2001, para os efectos do disposto polo artigo 41 da LSG.
Visto que con data do 11 de decembro de 2001, o conselleiro de Política Territorial, Obras Públicas e Vivenda e para os efectos do previsto no artigo 42.5º da LSG, emitiu, en sentido favorable, o previo informe perceptivo e vinculante.
Visto que, de conformidade coa disposición adicional cuarta da LSG a competencia para a aprobación definitiva da mencionada modificación puntual das normas subsidiarias de planeamento queda asignada, en réxime de competencia delegada, a este concello, nos termos e condicións establecidos na Lei de delegación e distribución de competencias en materia de urbanismo.
Visto que a teor do disposto no artigo 47.3º i) da Lei 7/1985, do 2 de abril, reguladora das bases de réxime local, o acordo de aprobación definitiva da reiterada modificación puntual, require o voto favorable da maioría absoluta do número legal de membros desta corporación.
Visto o informe favorable da Comisión de Estudio, Informe e Consulta de Asuntos do Pleno.
A corporación, por unanimidade e en votación ordinaria, e por tanto, co quórum favorable de votación da maioría absoluta legal do número de membros que a compoñen,
ACORDOU:
Primeiro.-Prestar aprobación definitiva ó expediente de modificación puntual das normas subsidiarias de planeamento de Feira do Monte.
Segundo.-Dar cumprimento ó disposto no artigo 48 da Lei 1/1997, do 24 de marzo, do solo de Galicia.
Contra o devandito acordo, que pon fin á vía administrativa, poderase interpoñer recurso contencioso-administrativo ante o Tribunal Superior de Xustiza de Galicia no prazo de dous meses contados desde o día seguinte ó da publicación deste anuncio.
Cospeito, 26 de marzo de 2002.
Armando Castosa Alvariño
Alcalde